SIRONGWA SOKUHOVA | WOLYE NOMBANGI DAJEHOVA?
Kupi atu gwana yimaliwa?
Nkenye mvhura ose kurugana Nobibeli noyimbapiratjangwa mamiliyona. Ose kudika nomberewa nomatungo gokundurukira yimbapiratjangwa mouzuni mudima. Ntani twa kara nonombungakriste mayovi, edi adi pongere momavango ava tumbura asi Yinyanga yoUhompa. Kupi ayi tundu yifutwa?
Yirugana yetu kuyifutira yigava yokutundilira komutjima. (2 Vakolinte 9:7) Sifo soRuhungu mo-1879 kwa tente asi: “Ose twa yi pura asi JEHOVA yige a kwatesa ko yirugana yoUhompa, ano morwa oyo ose kapi ngatu hundagera yimaliwa.” Ose simpe kwa pura nonkango odo.
Yigava oyo kuyituma kuvyukilira konomberewa detu ndi kuyitura moyikesa eyi va tura moYinyanga yoUhompa. Kapi atu pura siumurongo ndi tu sininike vantu va gave yigava ntani kapi atu futisa yirugana yetu youkareli ndi yimbapiratjangwa yetu. Apa atu zuvhisa mbudi zongwa nokuronga mombungakriste ndi pokutunga matungo aga atu pongere, kapi ava tu futu. Jesus kwa tente asi: “Mawoko-woko muna yi gwana, none ka yi gaveni mawoko-woko.” (Mateusa 10:8) Nombangi daJehova edi adi rugana konomberewa detu, kukwatera mo womoMbungagendesi zoNombangi daJehova, kapi ava va futu.
Mberewa zonene zaEuropa zountu womuntu mo-2011 kwa tente asi: “Yirugana yoNombangi daJehova kuyikwatesa ko yigava yokutundilira komutjima, nkenye gumwe kutokora asi yingapi na vhura kugava ntani yikando yingapi na gava.”
Yigava kuyiruganesa hena mokuvatera ava vana kara mosimpagwa. Vakriste womosiruwo sanare nawo ngava hafere kuvatera ava sa kundamene simpagwa. (Varoma 15:26) Nose kuvatera vapuli vakwetetu owo ayi kundama yimpagwa pokuvatungira mambo gawo nomavango goukareli nokuvapa nondya noyidwara ntani nouhaku.
Kuvhura o hafere hena
RUHUNGU (SIFO SELIRONGO)
Omu natu vatera ava vana hepa ekwafo
Lironga omu no gava yigava kosirugana souzuni mudima soNombangi daJehova yipo o vatere wopeke panyama nopampepo.
