“MORWASINKE yina horokerere nge? Morwasinke ana yi pulisire Karunga?” Ogo yigo mapuro ga lipulire Sidnei gonomvhura 24 ogu ga tunga moBrazil. Age kwa ligwanekerere nosimpagwa ta kara sirema.

Vantu kuhandukira Karunga morwa mauvera nonomfa noyita ntani yimpagwa eyi ava ligwanekere nayo. Kapisi velike ava lizuvhu ngoso. Joba nage ga ligwanekerere nomaudigu gomanene. Age kwa pere Karunga usima pokutanta asi: “Karunga, ame nyove nina kukuga, nye ove nakumbu si. Ano nsene tani kanderere ove nombili ko si. Ove kuna kurugana nge momudona; kuna kuhepeka nge nononkondo doge nadinye.”—Joba 30:20, 21.

Joba kapi ga divire ogu ga retesere po maudigu gendi. Nye ose Bibeli za tu fatwilira konda zeyi aga horokere maudigu neyi natu vhura kurugana nsene kuna kupita momaudigu.

Bibeli kututantera kuhamena Karunga asi: “Nonzira dendi nadinye nongwa, ado kwa hungama. Karunga gweni Mulimburukwi, age Munasili, age kurugana eyi ya vyuka, ya hungama.” (Deuteronomium 32:4) Nsene asi Karunga ‘muhungami’ kuvhura nye a harere vantu va hepe ndi ava tengeke pokuvaretera yimpagwa ndi?

Hawe, Bibeli kututantera asi: “Karunga Munankondo kapi a rugana yoyidona.” (Joba 34:12) Azo kututantera hena asi Karunga kwa ungire vantu wokusikilira mo. Adamu naEva kwa va pere embo lyewa neyi va hepere meparu ntani noyirugana yoyiwa. Karunga kwa va tanterere asi: “Livhareni mu zwide evhu, makura ruvharo rweni ngaru li pangere.” Adamu naEva kapi va kere nokonda zokuhandukira Karunga.—Genesis 1:28.

Morwa kudira kusikilira mo, eparu naina kapi lina wapa. Maudigu govantu gana ligwederere. Ayo kuna kukwatesa ko nonkango edi asi: “Unsitwe mudima kukema dogoro nantaantani ngesi, awo kuzuvha kukora ngwendi mukadi goporuzega.” (Varoma 8:22) Yisinke ya horoka?

Mokukwata egano eyi pwa karera ruhepo, twa hepa kudiva omu rwa tamekere. Satana Muzonaguli kwa zedere Adamu naEva va nyoke mpangera zaKarunga ezi ga va pere mokudira kulya ‘kositji esi asi gava ediwo lyeyi yoyiwa neyi yoyidona.’ Muzonaguli kwa tanterere Eva asi kapi ngava fa nsene va teza po mpango zaKarunga. Satana hena kwa rundilire Karunga asi age kapi ga pa vantu umanguruki wokutokora yoyiwa neyi yoyidona. (Genesis 2:17; 3:1-6) Age kwa uyungire hena asi vantu kapi va hepa upangeli waKarunga. Nayinye oyo kwa retesere po nompata dononene asi: Karunga ga wapera kupangera ndi?

Muzonaguli kwa retesere po hena nompata dimwe. Age kwa rundilire vantu asi awo kukarera Karunga morwa kuhara kugwanena mo mauwa tupu. Muzonaguli kwa tanterere Karunga kuhamena Joba mugara gomulimburukwi asi: “Ove kumugamena narunye kumwe nepata lyendi noyiweka yendi. . . . Nye nsene o mu gusa nkenye aka ga weka, ngano ta teka koge, ove kuna kutara!” (Joba 1:10, 11) Nonkango odo, kapi tupu da tembe kwaJoba nye kovantu navenye.

Nkedi musinke zongwa mokuhagekesa po nompata odo? Karunga ga diva omu nga hagekesa po nompata odo morwa ediwo lyendi enzi unene. (Varoma 11:33) Age kwa pulisira vantu va lipangere vene yipo yitundwamo yi likide ogu ga wapera kupangera.

 Eyi yina kuhoroka mouzuni kulikida asi vantu kapi tava vhuru kulipangera vene. Mapangero kapi tupu ya ga sumpira kuretesa po mbili nompora noruhafo nye hena kwa zonagura evhu. Eyi kupameka eyi za uyunga Bibeli asi: “Kutupu ogu a pangere kukaramwenyo kwamwene.” (Jeremiya 10:23) Epangero lyaKarunga lyelike lyokuvhura kureta po mbili nompora noruhafo morwa yiso sitambo saKarunga.—Jesaya 45:18.

Ngapi Karunga nga ka sikisa mo sitambo sendi kovantu? Jesus kwa rongere vasikuli vendi va kanderere asi: ‘Uhompa woge au wize. Mpango zoge ava zi sikise mo pevhu ngwendi meguru.’ (Mateusa 6:10) Ntaantani Uhompa waKarunga ngau ka guse po ruhepo. (Ndaniyera 2:44) Nzara nomauvera ntani nomfa kapi ngayi kara ko hena. Kuhamena vahepwe, Bibeli kuuyunga asi Karunga nga ‘yoworora vahepwe ava ava mu kugu.’ (Episarome 72:12-14) Kovaveli, Bibeli kwa tumbwidira asi: “Nagumwe si gomosirongo esi twa kara nga sivana asi ta vere.” (Jesaya 33:24) Kuhamena vafe, Jesus kwa uyungire asi: “Siruwo ngasi wiza, apa ngava zuvha ezwi lyendi navenye ava va kara monontoko, makura tava pwaga mo.” (Johanesa 5:28, 29) Ee, matumbwidiro musi kouwa!

Konyima zonomvhura 17, Sidnei, ogu vana tumbura ketamekero lyosirongwa esi kwa tente asi: “Kapi na pere Jehova Karunga usima kosimpagwa esi na ligwanekerere naso, nye kutanta usili pomuhowo na mu handukilire. Poyiruwo yimwe ame kuguva nokulira apa ani gazara urema wange. Pokulironga Bibeli na kwete egano asi Karunga kapisi yige ga retesere po simpagwa. Bibeli kuuyunga asi ‘ehudi kuhorokera nkenye ogu.’ Pokukanderera kwaJehova nokuresa matjangwa ya pameka nge ntani nokuretera nge ruhafo.”—Muudisi 9:11; Episarome 145:18; 2 Vakolinte 4:8, 9, 16.

Pokudiva konda zeyi Karunga ga pulisira ruhepo ntani nomu nga ka ru gusa po kutuvatera tu dire kumuhandukira nsene tuna kara nomaudigu. Twa kara nehuguvaro asi Karunga nga ‘futa ava ava mu papara.’ Nkenye ogu nga tura epuro mwendi ntani mwaMunwendi kapi ngava mu fisa nomuga.—Vahebeli 11:6; Varoma 10:11.