ESIMWITITI
Na gwana yomulyo kupitakana mfumwa
Mo-1984 eparu lyange kwa rundurukire. Ame kwa winine kukara Miss Hong Kong. Efano lyange ngali kara nkenye apa kontunda zomakurante nonosaitunga. Ngani dimbi nokudana nokuuyunga komeho zovantu nomonotivi. Ntani ngani dwara yidwara yoyiwa yondiro nokukara novantu vekuto ngwendi nguuru gomoHong Kong.
Mvhura zokukwama ko yipo na tamekere kudana monomuvi. Vanambudi kwa here ehistoli lyange ano wokufaneka nawo kwa here mafano gange ntani ngava zigida nge koyilika ni ka zegurure matungo gomape paveta ntani nokukalya novanamakuto. Ame kwa divikwire.
Momuvi zokurwanangana
Konyima yipo na ya dimbwilire asi nayinye yina kapi ya kere nomulyo. Ngani dana unene monomuvi dokurwanangana. Nye ayo kwa kere siponga morwa pamwe na hepere kuronda posimoto nokusisinga si ka ronde pombando zetuwa. Nomuvi dimwe edi ngani dana kwa kere doruhonda nonyanya, dimwe doumpure.
Mo-1995, yipo na ya kwere mugendesi gonomuvi. Nampili ngomu na fumanene nokukara noungawo nomugara gomuwa nye kapi na gwene ruhafo. Yipo na tokwere kuhageka kudana nomuvi.
TANI DIWOROKA EYI NA LIRONGERE POUNONA
Ame kwa tamekere kudiworoka noruhafo eyi na lirongere pounona. Nkenye Mapeu name namukurwange gomukadi ngatu zi tu ka dingure epata limwe lyoNombangi daJehova. Joe McGrath nturagumbo gepata olyo nga lirongo nose Bibeli kumwe novana vendi vatatu wovakadona. Alyo kwa kere epata lyewa lyoruhafo, morwa Joe nga tekura nefumadeko mukadendi novana vendi. Ngani hafere pokuza kumwe nawo komapongo gawo. Pamwe ngatu zi koyigongi yoyinene. Ayo kwa kere yiruwo yoruhafo. Ame ngani lizuvhu emanguruko pokukara noNombangi.
Nye membo lyetu kwa kere mo maudigu gomanzi. Nkareso zotate ngazi guvisa unene onane. Komeho ni ka gwanese nomvhura murongo, onane va hagekere kulipakerera noNombangi daJehova. Ngani likoka-koka ngorooro kuza komapongo
makura tani ya gwana ekuho ame nomvhura 17. Nye konyima tani ya lihameke moyirugana yoyidona makura tani hageke kulipakerera noNombangi.TANI TOKORA KUTENGURA
Konyima tupu apa twa likwere, vakuronambunga vavali woNombangi daJehova tava ya dingura nge. Tava fatwilire nge omu nani vhura kutengura kwaJehova Karunga, ntani tava tura po ewapaiko nomutumwa gedina Cindy a vatere nge. Posiruwo oso ame na zumbanesere epuro lyange, yipo na mu pulire a likide nge asi Bibeli sili Nonkango daKarunga. Ga likidire nge yihonena yomauporofete gomoBibeli aga ga sikilire mo. Kanunu-kanunu tatu ya tulisa po ukaume ntani ta pura nge tu tameke kulironga Bibeli kumwe. Na yi tambwire. Yipo nye na ya tamekere kukwata egano asi Jehova age Karunga geharo, ana hara ni hafe.
Apa na tamekere kuza komapongo, ngani hafa unene pokukara noNombangi kupitakana ava ngani rugana nawo monomuvi. Eyi na pitire pounona ya ninkisire nge ni dire kuhuguvara vantu ntani nokudira kulihara nyamwange. Gumwe gomombungakriste ga vaterere nge pokulikida nge moBibeli omu nani funda po malizuvho gomadona ntani na lirongere kutulisa po vakaume wosili.
YOMULYO PO KUPITAKANA MFUMWA
Mo-1997 name namugara gwange tatu dirukire koHollywood, California, moAmerika. Oko na ka litulire mo kuvatera vantu va gwanene mo uwa mounongo womoNonkango daKarunga. Kuronga Bibeli vantu kwa retera nge ruhafo kupitakana wina ufuuli wokudana nomuvi. Pasihonena, mo-2002 yipo na ligwene naCheri ogu na lidivire nendi moHong Kong. Eparu lyendi neli lyange kwa lifene. Age kwa kere Miss Hong Kong mo-1983. Yige ga ya dwarekere nge nkata apa na winine mo-1984. Nage nga dana nomuvi ano konyima ta kara mugendesi gonomuvi. Nage kwa dirukilire koHollywood.
Ame na fililire nkenda Cheri apa na zuvhire asi mugara ogu ga mu vandekerere ana fu kouvera womutjima. Age kapi ga gwene ehengagwido koukareli wendi woVabuda. Nampili ngomu ga kere neparu lyewa ngwendi lyange eli ava nyenene vantu, kapi ga hefe ntani kapi ga huguvarere vantu. Yipo na tamekere kumutantera ko eyi na lirongere moBibeli, nye epuliro lyendi lyoVabuda lya mu digopesere kuyitambura.
Kaume kange Cheri kuna kudana momuvi
Mo-2003, Cheri kwa zire koKanada a ka dane muvi. Ano ezuva limwe ta toonene nge ngodi age ana hafa. Ta simwitire nge asi age kuna singi metuwa yiyo ana kanderere kuzigira asi: “Yilye Karunga gosili? Yilye edina lyoge?” Makura ta singi ta mono Sinyanga soUhompa pana kara edina lyaJehova. Age kwa lizuvhire asi Karunga ana limburura ekanderero lyendi makura yipo ga here kugwana poopo Nombangi daJehova. Tani tura po mawapaiko, ano konyima zomazuva gongandi ta tameke kuponga kombunga zoVatjina womoKanada.
Konyima Cheri ta tantere nge asi: “Ava vantu wovawa. Kuvhura ni va tantere malizuvho gange.” Ame na hefe sili, morwa Cheri apa nga dana nomuvi kapi ga kere novakaume. Cheri ga twikilire kuza komapongo. Mo-2005 ta saina kondaraka a rugane nomuvi mbali moTjina, yipo yi mu vhulike kutengura koHong Kong. Mo-2006, Cheri ta ligava kwaJehova nokugwana ekuho kosigongi soNombangi esi sa kere moHong Kong. Nampili ngomu ga here kulitura mo unene mokukarera Jehova, yirugana yendi yonomuvi kapi ngayi mu pulisire makura kapi ga hefe.
RUHAFO ROKUVATERA WOPEKE
Mo-2009, Cheri yipo ga tulire po marunduruko gomanene pokuhageka kurugana nomuvi yipo a liture mo unene kukarera Jehova. Age ga tulisire po vakaume mombungakriste. Ta ya kara muzuvhisi gombudi zongwa zoUhompa siruwo nasinye ntani ga haferere kuvatera vantu va gwane ruhafo meparu.—Mateusa 24:14.
Cheri yipo ga tamekere kulironga Runepalise a vatere mbunga zoNombangi domoHong Kong adi uyunga eraka olyo. Sinzi sovantu worudi oro moHong Kong kapi ava va pakere mbili morwa kapi va diva kuuyunga nawa Ruhingilisa ndi Rutjina ntani nompo dawo da lisiga. Cheri kwa tanterere nge ruhafo oru ga kere naro pokuvatera vantu owo va dive Bibeli. Pasihonena, ezuva limwe apa ga rugene tunda embo zende embo ta gwana mukadi goMunepalise ogu ga diva nakauke kuhamena Jesus nye kapi ga diva Karunga gosili, Jehova. Cheri kwa ruganesere Bibeli mokumulikida asi Jesus nga kanderere koGuhwe vemeguru. Apa ga yi dimbwilire asi nage kuvhura a kanderere kwaKarunga gosili, gedina Jehova, yipo ga tambwire mbudi zongwa. Ano mugara gwendi namunwendi gomukadi nawo tava tameke kulironga Bibeli.—Episarome 83:18; Rukasa 22:41, 42.
Cheri naina
Apa na mwene Cheri kuna kuhafera kuzuvhisa siruwo nasinye, tani lipura asi: ‘Ame yisinke yina kukondera nge kurugana yokulifana?’ Posiruwo oso, name na ka tengura moHong Kong. Yipo na tulire po marunduruko ni lihameke mo unene kuronga vantu usili womoBibeli. Na ya yi dimbwilire asi kupurakena nokuvatera vantu va kwate egano Nonkango daKarunga kuretera nge ruhafo rosili.
Na ya yi dimbwilire asi kuvatera vantu va kwate egano Nonkango daKarunga kuretera nge ruhafo rosili
Pasihonena, na lirongere Bibeli nomukadi goMuvietinamu ogu nga guwu nokulira nkenye apa. Ngesi ana hafa ntani kuza komapongo.
Name naCheri twa ya gwana yomulyo po kupitakana mfumwa. Nampili ngomu ya kere ufuuli kudana monomuvi nokudivikwa, nye kuronga vantu kuhamena Jehova Karunga ayo kureta ruhafo rorunene morwa ayo kumuyererepeka. Twa limonena usili weyi ga uyungire Jesus asi: “Kugava kwa kara nerago, kwa pitakana kutambura.”—Yirugana 20:35.