APA ono resa eyi va tente vagara vavali owo, yilye ono kwatesa ko? Sinzi sovantu kutara nonkango daSauru goMutaruso ogu hena ava tumbura asi mupositoli Paurusa asi ado kukorangeda nokuhafesa. (Yirugana 17:26, 27) Bibeli kwa gava hena magano gamwe. Pasihonena, ekanderero lyaJesus kwa kara negano eli asi vasikuli vendi kuvhura va dive Karunga ntani nokugwana matungiko.—Johanesa 17:3.

Nye sinzi sovalirongi kukwatera mo Philo kapi va tambwire magano ogo. Awo kwa tente asi vantu kapi ngava diva Karunga. Nonkango dawo mouhunga ndi?

Bibeli kwa vyukilira kutanta asi koyili yininke yimwe kuhamena Karunga eyi natu dira kukwata egano. Pasihonena, ekaropo lyaKarunga nonondunge ntani unongo wendi kapi tatu vhuru kuyihetakanesa. Vantu kapi tava vhuru kuyikwata egano. Nye yininke oyo kapi tayi tu kondere mokudiva Karunga. Nye kugazadara ko koyininke oyo tayi tu vatere tu ‘hedere Karunga pepi.’ (Jakopo 4:8) Tarurura yihonena yongandi kuhamena yininke oyo. Ntani natu ka tarura hena yininke yimwe kuhamena Karunga eyi natu vhura kukwata egano.

KARUNGA KWA KARA PO NARUNYE: Bibeli kuronga asi: ‘Karunga kapi ga paka etameko nouhura.’ (Episarome 90:2) Vantu nokuvhura si “tu varure sivaro sonomvhura dendi.”—Joba 36:26.

Omu no gwanena mo uwa: Karunga kwa tumbwidira mwenyo gwanarunye nsene o mu diva nawa. (Johanesa 17:3) Ose kuvhura tu huguvare egano olyo morwa Karunga kuparuka narunye. “Hompa gwanarunye” gelike gokuvhura kusikisa mo etumbwidiro olyo.—1 Timoteusa 1:17.

NONDUNGE DAKARUNGA: Bibeli kuronga asi: “Nagumwe si a kwata egano yigazo yendi” morwa magazaro gendi kwa likara ure naga getu. (Jesaya 40:28; 55:9) Yiyo Bibeli azi uyungire asi: “Yilye ogu ga diva matedo gaHompa, asi ngano a vhure kumuronga?”—1 Vakolinte 2:16.

Omu no gwanena mo uwa: Karunga kuvhura kupurakena makanderero govantu mamiliyona posikando simwe tupu. (Episarome 65:2) Age kumona nkenye enzunge eli ali gwire pevhu. Karunga kuvhura yi mu vhukire yininke eyi a gazara yipo a dire kulimburura makanderero goge ndi? Hawe, morwa nondunge dendi nonzi unene. Ntani ‘ose twa pitakana manzunge gomanzi momulyo.’—Mateusa 10:29, 31.

YIRUGANA YAKARUNGA: Bibeli kutanta asi “narumwe si kapi ga tu pa egwaneko lyesikiliromo lyekwategano lyeyi a rugana.” (Muudisi 3:11) Ose kapi ngatu diva yininke nayinye kuhamena Karunga. Unongo woyirugana yendi ‘nokuukwata si egano.’ (Varoma 11:33) Nye simpe Karunga kuhorwera yirugana yendi kowo va hara kumuhafesa.—Amosa 3:7.

Omu no gwanena mo uwa: Nsene o resa nokulironga Bibeli kapi ngo hageka kulironga yininke yoyipe kuhamena Karunga ntani noyirugana yendi. Eyi kutanta asi ose kuvhura kuhedera Karunga pepi narunye.

Kudira kudiva yininke yimwe kuhamena Karunga kapi ayi tanta asi kapi tatu vhuru kumudiva. Bibeli kutupa nombudi edi twa hepa yipo tu dive nawa Jehova. Tarura yihonena:

EDINA LYAKARUNGA: Bibeli kuronga asi Karunga ga kara nedina. Age kwa tanta asi: “Ame nyame Jehova olyo yilyo edina lyange.” Edina lyaKarunga kwa li tjenge moBibeli yikando yokupitakana po-7 000 kupitakana madina nagenye va tumbura moBibeli.—Jesaya 42:8, NW.

Omu no gwanena mo uwa: Mekanderero lyendi Jesus kwa tente asi: “Guhyetu gemeguru. Edina lyoge ava li pongore.” (Mateusa 6:9) Nove kuvhura o ruganese edina lyaKarunga apa o kanderere. Jehova nga popera nkenye ogu a likida efumadeko kedina lyendi.—Varoma 10:13.

KARUNGA KWA KARA MEGURU: Bibeli kuronga asi ‘eguru’ kwa kara pavali, eguru omu mwa kara yisitwa yopampepo ntani eguru limwe lyeli atu mono omu mwa hamena uzuni. (Johanesa 8:23; 1 Vakolinte 15:44) Yikando yoyinzi Bibeli kuruganesa nkango ‘eguru’ pokutamba keguru eli va kara vaengeli. Karunga nage ‘kwa kara meguru’ olyo.—1 Vahompa 8:43.

 Omu no gwanena mo uwa: Ngayi ku vatera o kwate nawa egano kuhamena Karunga. Age kapisi mpepo ezi azi pepe nkenye oku, nye age Muntu ogu ga kara meguru. Nye nampili ngoso, “kutupu sisitwa esi sa mu horama.”—Vahebeli 4:13.

YIKARA YAKARUNGA: Bibeli kuronga asi Karunga ga kara noyikara yoyiwa. “Karunga yige eharo.” (1 Johanesa 4:8) Age kapi a tanta yimpempa. (Titusa 1:2) Age kapi ga paka mpongo age mufenkenda nombili ntani mudidimiki. (Exodus 34:6; Yirugana 10:34) Ntani Karunga kwa hara kutura po “ukwawo” kumwe nava ava mu fumadeke.—Episarome 25:14.

Omu no gwanena mo uwa: Kuvhura o kare kaume kaJehova. (Jakopo 2:23) Ngomu ngo ya diva yikara yaJehova, ngo kwata nawa egano yihorokwa eyi va tjanga moBibeli.

Bibeli kusingonona nawa Jehova Karunga. Age kuna hara o mu dive. Nonkango dendi Bibeli kwa tumbwidira asi: “Nsene o za kwendi, age ta ku tambura.” (1 Histoli 28:9) Nsene ono hara kudiva Karunga, lironga Bibeli ntani nokuteda ko. Nsene ngo yi rugana, Karunga nga ku ‘hedera pepi.’—Jakopo 4:8.

Nye kuvhura o lipure asi: ‘Ngapi omu nani vhura kudiva nawa Karunga nsene yininke yimwe yokumuhamena kapi atu yi kwata egano?’ Tarurura sihonena: Kaume kandokotora ga hepa kudiva kuhamena uhaku ndi? Hawe. Kaume ogo kuvhura a dive sirugana sapeke. Nye simpe kuvhura va kare vakaume. Somulyo po kaume kandokotora ga hepa tupu kudiva eyi ga nyenga neyi ga hara ndokotora. Mokulifana kuvhura o lironge moBibeli kuhamena Jehova yipo o tunge po ukaume kumwe nage.

Bibeli za kara nonombudi edi twa hepa mokudiva kuhamena Karunga. Ono hara kulironga ko yoyinzi kuhamena Jehova Karunga ndi? Nombangi daJehova kuronga vantu Bibeli pwa hana mfuto. Kuna kukuhundira ngo gwanekere kumwe noNombangi daJehova domomukunda goge ndi tara koIntaneta zetu www.pr418.com.