Ove ngapi o gazara? Karunga kukwatesa ko yita ndi? Nsene yimo, apa ayi horoka yita, mbunga musinke a kwatesa ko? Mokugwana malimbururo komapuro ogo tayi kundama mutaro goge kuhamena yita. Pasihonena, nsene no diva asi Karunga kupulisira yita ntani kukwatesa ko mbunga ezi wa hamena, ove no hafa morwa no kara nehuguvaro asi tomu ka funda. Nye ngapi no lizuvha nsene no diva asi Karunga kukwatesa ko mbunga ezi zina kumurwisa? Ove nampo no hara kurundurukira kombunga ozo.

Pwa kara sininke somulyo wa hepa kugazadara ko. Mokudiva omu Karunga a tara yita nayi kundama omu o mu tara. Nsene nove ya kukundama yita, no hara kudiva elimbururo kepuro eli asi: Karunga kukorangeda vantu va ze koyita ntani kapi ga kara nosinka kwava ava hepa morwa yita ndi?

Ayo nayi ku tetukisa pokulironga asi eyi za uyunga Bibeli ya lisiga nomagano ogo. Kutundilira pwanare dogoro naina, mutaro gwaKarunga kuhamena yita kapi gwa runduruka. Tu tareni eyi azi uyunga Bibeli kuhamena omu nga tara Karunga yita posiruwo sanare ntani apa Jesus ga kere pevhu. Ayo nayi tu vatera tu dive omu Karunga a tara yita naina ntani nsene asi komeho ngaku ka kara yita.