BIBELI KURUNDURURA EPARU LYOVANTU
Ame kwa gazarere asi kuna kuhafera eparu
-
MVHURA ZEHAMPURUKO: 1982
-
SIRONGO SOMVHARERWA: PORANDA
-
HISTOLI: NYANYA NOKUKOKA EPANGWE NTANI KUKONDJERA ERONGO LYOKUZERUKA
EPARU LYANGE LYANARE:
Ame kwa hampurukilire nge mokadoropa komosirongo saPoranda, pepi nomururani gosirongo soVandovesi. Ame kwa haferere eparu morwa kwa tungire pepi nonofarama noyitji yoyinzi. Vakurona vange ngava korangeda nge ni kare muntu gomuwa, ni pite nawa kosure nokuza kerongo lyokuzeruka.
Maudigu gange kwa tamekere apa na zire kounivesiti mositata saWrocław ni ka lirongere uhahende. Morwa kukara ure novakurona vange na ka tulisire po vakaume vepuko. Ame kwa here mbara nye morwa mazedo govakaume na ya litulire mo unene mombara. Sipana sange esi na here kwa kere somoWrocław ano nkenye sikondovike ngani va kwama nkenye oku vana kukadanena. Oku ngatu zi ngatu nu unene nokukoka epangwe ntani pamwe kurwanangana novakwatesiko woyipana yapeke. Ame kwa lizuvhire asi nkareso zangoso tazi vatere nge ni divare yinka yange, nye na yi divire asi nsene va kwata nge vaporosi kuvhura va tjide nge mounivesiti.
Name novakaume vange kwa here kuza konombaha nokonodisiko. Pamwe ngatu rwanangana moyitarata. Yikando yoyinzi ngava kwata nge vaporosi, nye pamwe ngani va futu ni dire kukara momaudigu. Ame kwa gazarere asi kuna kuhafera eparu. Nampili ngoso, na yi divire momutjima gwange asi eyi ngani rugana epuko. Ngani zi kongereka nkenye Sondaha ni ka tongonone nonzo dange.
OMU BIBELI ZA RUNDURWIRE EPARU LYANGE:
Mo-2004, yipo Nombangi daJehova da wizilire nge tani va tambura tatu zogere nawo kuhamena Bibeli. Ngomu na lirongere eyi ya hamena mo kukara Mukriste gousili, ezwi lyange lyokomutjima tali pangura nge. Na yi divire asi na hepere kuhageka kunwa unene marovhu nokukoka epangwe nokukara novantu ava ava dili kuparuka kuliza nonompango doBibeli. Na nongwenene hena asi na hepere kusiga nkareso zange zokuhanduka zonyanya. Nampili ngomu na dimbwilire asi na hepere kutura po marunduruko, kapi ya rerupilire nge.
Poyili yimwe ya horokere ya ninkisire nge ni ture po marunduruko. Ezuva limwe kwa rwene novagara ntantatu, tava toona nge nonyongo nokusanga nge momutwe. Tava sigi nge na rara mositaura, apa na lizuvhire asi na hara kufa tani kanderere asi: “Gusira nge po Jehova, mokudira kutambura Nonkango doge. Nsene nani paruka, kuna kukutumbwidira asi ngani lironga Bibeli noNombangi nokutura lyokulironga Bibeli.
po marunduruko meparu lyange.” Ame na parukire ntani na sikisire mo etumbwidiro lyangeMo-2006 yipo na dirukilire koIngiranda. Sitambo sange kwa kere ni gwane yimaliwa yoyinzi yipo ni tengure koPoranda ni ka gwederere ko hena ko harade zange zouhahende. Ngomu na twikilire kulironga Bibeli, etjangwa limwe kwa twire nge komutjima. Mupositoli Paurusa kwa tjenge asi: “Nayinye yosili omu nina kuyitara, ayo yininke yomawoko-woko tupu, ntene ni yi faneka nokudiva Hompa gwange Jesus Kristusa. Mwarwendi ame yiyo nye na yi nyokekera yininke nayinye eyi. Ame kuna yi nyokere asi ni kongwere po Kristusa.” (Vafilipi 3:8) Ngwendi nyame, mupositoli Paurusa kwa kere mulirongi goveta ntani muntu gonyanya unene. (Yirugana 8:3) Nye ga ya nongwenene asi muntu mokugwana ruhafo meparu ga hepa kukarera Karunga nokuhonena Jesus. Apa na gazadarere ko kosihonena saPaurusa, na nongwenene asi kukara noharade zokuzeruka nonkareso zonyanya kapi ayi reta ruhafo. Na yi nongwenene asi nsene Paurusa ga vhulire kutura po marunduruko, name tani yi vhuru. Yipo na tokwere kukara moIngiranda nokuhageka kukondjera kugwederera ko koharade zange zouhahende.
Moomu na lirongere kuhamena Jehova yimo na ya kere pepi nendi. Etumbwidiro lyendi lyokudongwenena po ava vana hara kutura po marunduruko kwa twire nge komutjima. (Yirugana 2:38) Apa na gazadarere ko ketjangwa lya-1 Johanesa 4:16 eli lya uyunga asi “Karunga yige eharo,” yipo na ya kwete egano eyi ga nyengera nyanya.
Name kwa here kuhamena kombunga zoNombangi zoruhafo
Ame kwa tetukisire nge nkareso zoNombangi daJehova. Ame na yi nongwenene asi awo kuhetekera ko kuparuka kuliza nonompango doBibeli. Name kwa here kuhamena kombunga ozo zoruhafo. Makura yipo na kondjere unene nokutura po marunduruko meparu lyange, tani gwana ekuho mo-2008 ngagumwe goNombangi daJehova.
Name naEsther kuhafera kuronga Bibeli vantu ava ava uyunga Rupolisi
MAUWA AGA NA GWANENA MO:
Bibeli za vatera nge ni sige nkareso zange zonyanya zokunwa unene marovhu zokukoka epangwe zokukondjera harade zokuzeruka ntani zokuhara unene mbara. Ngesi ame kuna kara mukareli gwaKarunga nina kuhafera kuronga wopeke Bibeli. Ame simpe kwa hara kutarera mbara, nye na tokomena mokudira kulitura mo unene.
Ame ngesi na hafa kumwe namukadange Esther nage gumwe ogu a karere Jehova. Ose kuhafera kuronga Bibeli vantu ava ava uyunga Rupolisi ava va tunga moIngiranda. Ngesi ntani nina kulizuvha ruhafo rosili. Nina kara nezwi lyewa lyomomutjima ntani nositambo meparu.