SIRONGWA SOKUHOVA | NGAPI KARUNGA A TARA YITA?
Omu Karunga ga tere yita posiruwo sanare
Vaisraeli kwa kere vakareli vaKarunga. Awo ngava va hepeke. Makura ngava kanderere kwaKarunga va gwane evatero, nye kapi va li gwene poopo. Vaegipite kwa kere muhoko gononkondo ogu ngagu hepeke Vaisraeli. (Exodus 1:13, 14) Nomvhura dononzi, Vaisraeli kwa ndindilire Karunga a va mangurure mo momawoko goVaegipite. Makura siruwo tasi siki mo sokuvamangurura. (Exodus 3:7-10) Bibeli kwa likida asi Karunga mwene ga rwisire Vaegipite. Age kwa va tuminine mahepeko gokulisiga-siga ano moruhura ta ya zonagura po hompa goVaegipite novakwayita vendi pEfuta lyEgeha. (Episarome 136:15) Jehova Karunga kwa kere “mukwayita” ogu ga rwililire po vantu vendi.—Exodus 15:3, 4.
Mokumona asi Karunga mwene yige ga rwisire Vaegipite kulikida asi kapi ga silikire yita nayinye. Poyiruwo yimwe, nga pangere Vaisraeli va rwe yita. Pasihonena, age kwa va pangerere va ka rwise Vakanani wovadinikarunga. (Deuteronomium 9:5; 20:17, 18) Karunga kwa tanterere hompa Ndafita goVaisraeli a ka rwise Vafilisiti ava ngava va hepeke. Age hena kwa pere Ndafita magano omu na vhura kufunda.—2 Samwere 5:17-25.
Yihorokwa va tumbura moBibeli kulikida asi apa udinikarunga wa vhukire ntani apa Vaisraeli ngava va hepeke, Karunga nga popere vantu vendi noukareli wousili pokurwa yita. Nye koneka yitwa yitatu kuhamena yita eyi nga pulisire Karunga:
-
KARUNGA GELIKE GA TOKWERE AVA VA VHULIRE KUKARWA. Posiruwo simwe Karunga kwa tanterere Vaisraeli asi: “Yita eyi kapisi nyone wokuyirwa.” Morwasinke? Karunga mwene ga va rwililire po. (2 Histoli 20:17; 32:7, 8) Nga yi rugana yikando yoyinzi, ngwendi sihorokwa tuna tumbura petameko mosirongwa esi. Posiruwo simwe Karunga kwa pangerere Vaisraeli va rwe yita, eyi ya hamenene mo kukwata sirongo sEtumbwidiro.—Deuteronomium 7:1, 2; Josuwa 10:40.
-
KARUNGA GELIKE GA TOKWERE SIRUWO VA VHULIRE KURWA YITA. Vakareli vaKarunga ngava ndindire kwendi a va tantere siruwo esi va vhulire kukarwisa ava ngava va hepeke ntani vadinikarunga. Awo kapi va vhulire kutokora pwavene asi tava ka rwa morwa ngano Karunga kapi ga va tungikire. Bibeli za likida asi apa Vaisraeli ngava zi va ka rwe pwa hana epulisiro lyaKarunga kapi ngayi va tompoka. *
-
Apa Karunga ga rwisire Vakanani, ga parwire vamwe ngwendi Rahabu nekoro lyendi
KARUNGA KAPI A HAFERE NOMFA DOVANTU NAMPILI VADONA. Jehova Karunga yige ntundiliro zeparu ntani yige ga sita vantu. (Episarome 36:9) Yipo nye, kapi a hafa apa a mono vantu kuna kufa. Nye pwa kara vantu wovadona unene ava ava hepeke vakwaawo ntani kuvadipaga. (Episarome 37:12, 14) Mokuhagekesa po udona owo, Karunga ga pulisilire yita mokuzonagura po vantu owo. Nye apa Vaisraeli ngava ru yita, age ga fililire ‘nkenda’ ntani ‘kapi nga handukire usimbu’ owo ngava va hepeke. (Episarome 86:15) Pasihonena, komeho va ka rwise sitata age ga va pangerere va ‘hove tanko kupa vantu ruveze rokuligava mombili’ yipo va gwane mpito va rundurure nkareso zawo. (Deuteronomium 20:10-13) Eyi kwa likidire asi Karunga ‘kapi a hafere kumona munzoni ana kufa. Hasa kumumona ta hageke kuzona a kare nomwenyo.’—Hesekiyeli 33:11, 14-16. *
Kuliza neyi tuna konakona, posiruwo sanare Karunga nga pulisire yita mokuhagekesa po mahepeko noudinikarunga. Nye Karunga mwene ga tokwere siruwo va vhulire kurwa yita nava va vhulire kuyirwa. Ngoso Karunga nga ru yita morwa nyanya ndi? Hawe. Bibeli kulikida asi age ga nyenga nyanya. (Yisewe 6:16-19) Mutaro gwaKarunga koyita gwa rundurukire apa Munwendi, Jesus Kristusa ga ya kere pevhu ndi?
^ para. 7 Pasihonena, apa Vaisraeli va ka rwisire Vaamareki noVakanani pwa hana epulisiro lyaKarunga awo va ka va fundire. (Numeri 14:41-45) Konyima zonomvhura, apa hompa Josiya ga ka rwire yita pwa hana epulisiro lyaKarunga va ka mu dipagere.—2 Histoli 35:20-24.
^ para. 8 Apa Vaisraeli va ka rwisire Vakanani kapi va hepere hena kuvapa ruveze rokuligava mombili. Morwasinke? Vakanani kwa va pere nomvhura 400 va rundurure nkareso zawo zondona. Nye apa Vaisraeli va zire va ka va rwise, awo Vakanani vana donapa unene. (Genesis 15:13-16) Yipo va hepere kuvazonagura po. Nye pwa kere Vakanani vamwe ava va dilire kuzonagura morwa va rundwilire nkareso zawo.—Josuwa 6:25; 9:3-27.
