1. Ngapi omu siuyungwa esi va geve posigongi somo-1935 sa kundamene mudinkantu?

MUDINKANTU gumwe gomumati kwa gwene ekuho mo-1926 apa ga kere nonomvhura 18. Vakondi vendi kwa kere Nombangi daJehova edi ngava tumbura posiruwo sina asi Valirongi woBibeli. Awo kwa kere novanona vatatu wovamati ntani vavali wovakadona ava va rongere va karere Jehova Karunga nokuhonena Jesus Kristusa. Ngwendi moomu tupu ngava yi rugana Valirongi woBibeli navenye, mudinkantu ogo ngali nage komboroto nokunwa kovinyu poMurarero gwaHompa. Nye ehuguvaro lyendi kwa rundurukire apa ga purakenene kosiuyungwa sosiparatjangwa asi: “Emukurumbunga.” Munazinyetu J. F. Rutherford yige ga geve siuyungwa oso posigongi esi sa karerere moWashington, D.C., moAmerika mo-1935. Yisinke va lirongere Valirongi woBibeli posigongi oso?

2. Usili musinke ga fatwilire munazinyetu Rutherford mosiuyungwa sendi?

² Munazinyetu Rutherford kwa fatwilire kuhamena ava va hamena ‘kemukurumbunga’ eli va tumbura mEhororo 7:9. Nomvhura nadinye komeho zosigongi oso, Valirongi woBibeli kwa gazarere asi emukurumbunga kuna kara mbunga ezi ngazi za nazo meguru nye awo kapi ava limburukwa nainye. Munazinyetu Rutherford kwa ruganesere Matjangwa a faturure asi emukurumbunga kapi ngali ka parukira  meguru, nye alyo kwa hamena kononzwi dapeke * daKristusa. Alyo ngali ka pita “momahepeko gomanene” nokukaparuka narunye pevhu. (Ehor. 7:14) Jesus kwa tumbwidilire asi: “Ame kwa kara nononzwi dapeke hena, da hana si domohambo ezi. Nado na hepa kudipitira komeho, makura ngadi ya zuvha ezwi lyange, ntani nye ngapa kara siunda simwe tupu nomusita gumwe tupu.” (Joh. 10:16) Nonzwi dapeke kwa tamba kovakareli vaJehova wovalimburukwi ava va kara nehuguvaro lyokukaparuka narunye pevhu. (Mat. 25:31-33, 46) Tu tareni asi ngapi omu usili woupe wa kundamene vakareli vaJehova wovanzi, kukwatera mo munazinyetu gwina gomudinkatu.—Epis. 97:11; Yis. 4:18.

3-4. Yisinke va ya kwete egano vantu wovanzi posigongi somo-1935, kuhamena ehuguvaro lyawo ntani morwasinke?

³ Vantu kwa hefe apa mugavi siuyungwa ga pulire ava va kere posigongi asi: “Kuvhura namuvenye ava mwa kara nehuguvaro lyokukaparukira pevhu mukatuke ndi?” Munazinyetu gumwe ogu ga kere posigongi oso kwa tente asi sinzi sovantu ava va kere posigongi oso kwa si keme. Makura munazinyetu Rutherford yipo ga uyungire asi: “Tareni emukurumbunga!” Konyima zoyo, vantu yipo va tamekere kuzigira noruhafo. Ava va si keme va yi dimbwilire asi kapi vava horowora ngava ze meguru. Awo va yi divire asi kapi vava gwaveka nompepo zokupongoka. Ezuva eli lya kweme ko lyosigongi, vantu 840 kwa gwene ekuho, ano sinzi sawo kwa kere nonzwi dapeke.

⁴ Konyima zosiuyungwa oso, mudinkantu ogu ka tu tumbura ntani navamwe, kwa hagekere kulya komboroto nokunwa kovinyu poMurarero gwaHompa. Sinzi sovantu kwa lizuvhire ngwendi moomu tupu munazinyetu gumwe gomugara ga tente asi: “Murarero gomo-1935 kwa kere Murarero gokuhulilira ogu na lire mboroto nokunwa vinyu. Na yi divire asi Jehova kapi ga ruganesere mpepo zendi zokupongoka a penge ehuguvaro lyokukaparukira meguru. Nye na kara nehuguvaro lyokukaparukira pevhu nokukalininka li kare paradisa.” (Rom. 8:16, 17; 2 Kol. 1:21, 22) Kutunda pena, emukurumbunga kwa li gwederera ntani alyo kuruganena kumwe novagwaveka ava vana kara simpe pevhu.

5. Ngapi omu a lizuvhu Jehova kuhamena ava va hageka kulya komboroto nokunwa kovinyu poMurarero?

⁵ Ngapi omu Jehova a lizuvhu kuhamena ava va hageka kulya komboroto nokunwa kovinyu poMurarero kutundilira mo-1935? Ntani ngapi nsene munazinyetu ogu ga gwana ekuho a lya komboroto nokunwa kovinyu poMurarero ano konyima a ya dimburure asi kapi va mu gwaveka? (1 Kol. 11:28) Vamwe kulya komboroto nokunwa kovinyu morwa kapi va kwata nawa egano ehuguvaro lyawo. Nye nsene vayi tambura asi va tura epuko ntani nokuhageka kulya komboroto nokunwa kovinyu ntani nokutwikira kukarera Jehova noulimburukwi, age ngava tambura asi awo nonzwi dapeke. Nampili ngomu ava dili kulya komboroto nokunwa kovinyu, awo simpe kukara poMurarero morwa va  kara norupandu kweyi ga va ruganena Jehova naJesus.

6. Yisinke Jesus ga tanterere vaengeli va rugane?

⁶ Mokumona asi udigu wounene ntaantani u tameke, ose kuvhura tu gwanene mo uwa nsene tu konakona eyi va uyunga mobuke zEhororo egaununo 7 kuhamena Vakriste wovagwaveka ntani nemukurumbunga lyomononzwi dapeke. Jesus kwa tanterere vaengeli va twikire kukwaterera nompepo ne dezonauko. Awo ngava twikira kukwaterera nompepo odo dogoro apa vagwaveka navenye ngava va tura sinongweneso sokuhulilira esi ngasi likida asi Jehova ana va tambura. (Ehor. 7:1-4) Vamumbya vaJesus wovagwaveka ngava ka kara vahompa novapristeli kumwe naJesus meguru morwa ulimburukwi wawo. (Ehor. 20:6) Jehova naJesus novaengeli ngava ka hafa apa ngava ka mona vagwaveka 144 000 kuna kugwana mfeto zawo zemeguru.

7. Ngomu va yi tumbura mEhororo 7:9, 10, wolye ga mwene Johanesa memoneko ntani yisinke va rugene? (Tara efano lyopontunda.)

⁷ Konyima zapa Johanesa ga uyungire kuhamena vahompa novapristeli 144 000, age kwa mwene hena “emukurumbunga” eli ngali paruka yita yaHarumagedoni. Ava va hamena memukurumbunga vanzi kupitakana vagwaveka 144 000, ntani kapi tuna diva asi vantu wokusika kupi vememukurumbunga ngava ka pita moHarumagedoni. (Resa Ehororo 7:9, 10.) Awo kwa dwere yikoverero yoyizera, eyi kulikida asi awo kwa ‘likerera’ ndi kwa ligusa ko kouzuni waSatana nokutwikira kulimburukwa Karunga naKristusa. (Jak. 1:27) Awo kuzigira asi vava parura morwa eyi ga rugana Jehova naJesus. Awo hena kwa kwaterera yekereva, eyi ayi likida asi awo va tambura Jesus ngaHompa ogu ga tura po Jehova.—Hetakanesa Johanesa 12:12, 13.

8. Yisinke ali tu tantere Ehororo 7:11, 12, kuhamena epata lyaJehova lyemeguru?

⁸ Resa Ehororo 7:11, 12. Ngapi va lizuvhire ava va kara meguru apa va mwene emukurumbunga? Johanesa kwa mwene asi navenye ava va kara meguru kwa hefe ntani kwa hamberere Jehova. Epata lyaJehova lyemeguru ngali ka hafa pokukamona esilikiliro mo lyemoneko olyo apa emukurumbunga ngali ka pita moudigu wounene.

9. Kuliza nEhororo 7:13-15, yisinke lina kurugana emukurumbunga?

⁹ Resa Ehororo 7:13-15. Johanesa kwa tente asi emukurumbunga kwa “kuhwa yikoverero yawo va yi zeresa kohonde zoNzwigona.” Eyi kutanta asi awo kwa kara nezwi lyewa lyokomutjima ntani va kara nelikwatakano lyewa naJehova. (Jes. 1:18) Awo Vakriste ava va li gava, va gwana ekuho nokutura epuro lyenene monzambo zaJesus ntani va kara nelikwatakano naJehova. (Joh. 3:36; 1 Pet. 3:21) Eyi yiyo nye Karunga ga va hafera ntani awo “kumukarera mutenya nomasiku montembeli zendi.” Ngesi awo kulitura mo unene mosirugana sokuzuvhisa nokutulisa po varongwa morwa Uhompa waKarunga kuna kara sininke somulyo kwawo.—Mat. 6:33; 24:14; 28:19, 20.

10. Ehuguvaro musinke va kara nalyo emukurumbunga ntani etumbwidiro musinke ngava ka mona kuna kusikilira mo?

¹⁰ Emukurumbunga eli ngali ka pita moudigu wounene, va kara nehuguvaro asi Karunga ngaka va pakera mbili morwa Bibeli kuuyunga asi: “Ano ogu ana hingire kosipundi souhompa, kwa tunga mwawo  oku ta va gamene.” Ano etumbwidiro eli va ndindira nononkondo ngali ka sika mo. Alyo kuna kara asi: “Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena.”—Ehor. 21:3, 4.

11-12. (a) Kuliza nEhororo 7:16, 17, matungiko musinke ngali ka gwana emukurumbunga? (b) Yisinke nadi rugana nonzwi dapeke poMurarero ntani morwasinke?

¹¹ Resa Ehororo 7:16, 17. Ngesi vakareli vaJehova vamwe kuna kufa konzara morwa yita ntani kapi vana kara noyimaliwa yokugwanena po yokuranda nondya. Vamwe kwa va tura modorongo morwa epuro lyawo. Nye emukurumbunga lina hafa morwa va yi diva asi apa ngava ka paruka ezonauko lyouzuni ou woudona, awo ngava ka kara nonondya dononzi dopanyama nedi dopampepo. Apa uzuni waSatana ngava u zonagura po, Jehova nga vatera emukurumbunga yipo li gwane epopero. Konyima zoudigu wounene, Jesus ngaka twara vantu owo komema gomwenyo kutanta asi ngaka va pa mwenyo gwanarunye. Yosili, emukurumbunga kwa kara nehuguvaro lyewa. Mabiliyona govantu kapi ngava ka fa hena.—Joh. 11:26.

¹² Nonzwi dapeke kupandura Jehova naJesus morwa da kara nehuguvaro lyewa. Awo kapi vava horowora va ze meguru, nye nampili ngoso nawo mulyo kwaJehova. Nye yi kare asi vagwaveka ndi nonzwi dapeke, navenye kuhamberera Karunga naKristusa. Nkedi zimwe omu ava yi rugana oyo, kuna kara pokukara poMurarero gwaHompa.

13-14. Morwasinke natu karera poMurarero natuvenye?

¹³ Monomvhura edi, vantu wovasesu tupu ava li komboroto nokunwa vinyu poMurarero. Eyi kutanta asi sinzi sonombungakriste edi da kara mouzuni, kapi mwa kara ava ava li komboroto nokunwa vinyu. Eyi kulikida asi sinzi sovantu ava ava kara poMurarero kwa kara nehuguvaro lyokukaparukira pevhu. Morwasinke nye ava karere poMurarero gwaHompa? Ayo yalifana ngwendi moomu tupu vantu ava zi kekwareko lyovakwawo. Awo kuza  kekwareko mokulikida asi va va hara ntani nokukavakwatesa ko. Mokulifana, nonzwi dapeke kukara poMurarero morwa kwa hara kukwatesa ko Kristusa novagwaveka ntani morwa kwava hara. Nonzwi dapeke kukara hena poMurarero mokulikida rupandu konzambo zaJesus zosizoweseso. Azo kuna kara nzambo ezi zava pa mpito va ka gwane mwenyo gwanarunye pevhu.

¹⁴ Konda hena zimwe zeyi nonzwi dapeke adi zire koMurarero kuna kara mokulimburukwa mpangera zaJesus. Apa Jesus ga tulisire po Murarero novapositoli vendi wovalimburukwi, age kwa va tanterere asi: “Omu yi rugane mokudiworokera nge po.” (1 Kol. 11:23-26) Yipo nye, awo kutwikira kukara poMurarero morwa vagwaveka vamwe simpe poveli pevhu. Nonzwi dapeke kuzigida hena vantu navenye va wize koMurarero.

15. Ngapi omu natu hamberera Karunga naKristusa poMurarero?

¹⁵ Pomurarero, ose twa kara nompito zokuhamberera Karunga naKristusa kupitira mononsumo nemekanderero. Siparatjangwa sosiuyungwa somvhura ezi kuna kara asi: “Likida rupandu kweyi ga ku ruganena Karunga naKristusa!” Aso ngasi tu vatera tu pandure Jehova naKristusa. Ngomu mboroto novinyu ngava yi pitisa, ayo ngayi tu diworokesa eyi ya fanekesa. Ayo kwa fanekesa rutu rwaJesus nohonde zendi. Ntani ngayi tu diworokesa asi Jehova kwa geve Munwendi aya tu fire yipo ngatu ka gwane eparu. (Mat. 20:28) Nkenye ogu ga hara Guhyetu gemeguru naMunwendi, nga kara poMurarero gwaHompa.

16. Monkedi musinke vagwaveka nononzwi dapeke va lifana?

¹⁶ Nonzwi dapeke novagwaveka valifana. Navenye mulyo kwaJehova morwa Jehova kwa geve Munwendi yipo a ya va zowore navenye. Elisigo eli lya kara po lyeeli asi awo kwa kara nehuguvaro lyokulisiga. Nye navenye va hepa kulimburukwa Karunga naKristusa. (Epis. 31:23) Ntani tu diworokeni asi Jehova kugava mpepo zokupongoka kuliza noukaro womuntu yi kare asi nonzwi dapeke ndi vagwaveka.

17. Yisinke vana kundindira nononkondo vagwaveka ava vana kara simpe pevhu?

¹⁷ Vakriste wovagwaveka kapi vava reta nehuguvaro lyokukaparukira meguru. Karunga yige a va pe ehuguvaro olyo. Awo kugazadara ko kehuguvaro lyawo nokukanderera ntani awo kuna kundindira nononkondo ngava ka gwane mfeto zawo meguru. Awo kapi va yi diva asi ngapi omu ngaga ka fana marutu gawo gopampepo.  (Fil. 3:20, 21; 1 Joh. 3:2) Nye nampili ngoso, awo kundindira nononkondo va ka mone Jehova naJesus novaengeli novagwaveka navenye ntani nokukakara kumwe nawo meguru.

18. Yisinke dina kundindira nononkondo nonzwi dapeke?

¹⁸ Nonzwi dapeke kuna kundindira nononkondo ngadi ka paruke narunye pevhu. Eli yilyo ehuguvaro va hara vantu navenye. (Muud. 3:11) Awo kuna kundindira nononkondo apa ngava ka ninka evhu nalinye li kare paradisa. Awo kuna kundindira siruwo apa ngava ka tunga mambo gawo nokukatapeka moyipata ntani nokukarera vana vawo. (Jes. 65:21-23) Awo kuna kundindira nononkondo ngava ka dingure mavango gomanzi ngwendi nondundu nomusitu, efuta ntani nokukalironga yininke nayinye eyi ga sita Jehova. Nye unene po, awo vana hafa morwa elikwatakano lyawo naJehova ngali ka nkondopara unene.

19. Mpito musinke atu gwana poMurarero ntani ezuvake nagu kara momvhura ezi?

¹⁹ Jehova kwa pa vakareli vendi navenye ehuguvaro lyewa lyokomeho. (Jer. 29:11) Murarero gwaHompa kugava mpito kwa natuvenye yipo tu hamberere Karunga naKristusa kweyi va tu ruganena yipo ngatu ka hafere eparu lyanarunye. Murarero gwaHompa kuna kara epongo lyenene po eli ava rugana Vakriste wousili nkenye mvhura. Ago ngagu kara moMapeu 27 Nsinano 2021. Mvhura ezi, sinzi sovantu ngava pongera komavango oku va kara noumanguruki wokuponga. Vamwe ngava ponga nampili ngomu ava ligwanekere nomahepeko. Vamwe ngava pongera monodorongo. Ngano natuvenye ngatu hafere Murarero gwaHompa.