1. Mokumona asi Karunga ga tu hara, ngapi omu atu lizuvhu?

MUPOSITOLI Johanesa kwa tjenge asi: “Karunga yige eharo.” (1 Joh. 4:8) Nonkango odo kutudiworokesa asi Karunga yige ga retesa po eparu ntani eharo kwendi lya tunda. Jehova ga tu hara. Mokumona asi ga tu hara, ose kulizuvha epopero noruhafo.

2. Kuliza naMateusa 22:37-40, yipango musinke yivali yoyinene po ntani morwasinke ayi tu karere udigu pamwe kulimburukwa sauvali?

² Kulikida eharo kuna kara mpangera koVakriste. (Resa Mateusa 22:37-40.) Nsene tu diva nawa Jehova, ngayi tu karera ureru kulimburukwa sipango sokuhova morwa Jehova age Karunga gombili ntani kutupakera sinka. Nye kuvhura yi tu karere udigu kulimburukwa sipango sauvali. Morwasinke? Morwa vanavazinyetu nawo kapi va sikilira mo. Poyiruwo yimwe awo kuvhura va uyunge ndi va rugane yininke eyi nayi likida asi awo kwato nkenda ndi kapi va tu hara. Jehova gayi divire asi kuvhura yi tu karere udigu kuhara vakwetu, ano eyi yiyo nye ga ruganesere vagara vamwe va tjange Bibeli yipo va tu ronge konda zeyi natu likidira eharo kovakwetu ntani nomu natu yi rugana. Johanesa kuna kara gumwe govatjangi owo.—1 Joh. 3:11, 12.

3. Yisinke ga uyungire Johanesa kuhamena eharo?

³ Nobuke domoBibeli edi ga tjenge Johanesa, age kwa nkondopekere mo asi Vakriste va hepa kulikida eharo. Mobuke ezi ga tjenge kuhamena eparu lyaJesus, age kwa ruganesere unene nkango “eharo” kupitakana omu va zi ruganesa mEvangeli lyaMateusa naMarukusa ntani Rukasa. Apa Johanesa ga tjenge buke zEvangeli lyaJohanesa nonombilive  dendi ntatu, nomvhura dendi kwa kere koyiha efere limwe. Nobuke edi ga tjenge kulikida asi eharo lya hepa kutumangeda Vakriste mwankenye eyi ava rugana. (1 Joh. 4:10, 11) Nye ayo kwa gusire siruwo komeho Johanesa a ya yi dive ngoso.

4. Johanesa ga here vakwawo nkenye apa ndi?

⁴ Apa Johanesa ga kere mudinkantu, age kapi nga likida eharo poyiruwo yimwe. Pasihonena, sikando simwe Jesus novarongwa vendi kwa zire koJerusarema makura tava piti moSamaliya. Vantu womomukunda gwaSamaliya kwa nyokere kuvatambura momukunda gwawo. Yisinke ga rugene Johanesa? Nage namukurwendi Jakopo kwa pulire Jesus nsene asi kuvhura va hundire mundiro meguru, gu va hanagure po. (Ruk. 9:52-56) Ano sikando simwe, Johanesa kapi ga here vapositoli vakwawo. Nage namukurwendi Jakopo kwa sininikire ozina va pure Jesus ava pe yipundi yoyinene po moUhompa. Vapositoli vakwawo kwa handukire apa va zuvhire eyi Jakopo naJohanesa va rugene. (Mat. 20:20, 21, 24) Nye Jesus kwa here Johanesa nampili ngomu ga rugene mapuko ogo.—Joh. 21:7.

5. Yisinke natu ka lironga mosirongwa esi?

⁵ Mosirongwa esi, tatu ka lironga sihonena saJohanesa noyininke yimwe eyi ga tjenge kuhamena eharo. Ngomu natu ka yi lironga, tatu ka tara omu natu hara vanavazinyetu. Tatu ka lironga hena nkedi zimwe zomulyo omu vanturagumbo nava yi likida asi va hara mapata gawo.

6. Yisinke ga rugana Jehova eyi ayi likida asi ga tu hara?

⁶ Rorunzi ose kugazara asi kuhara vakwetu kutanta asi kuvatantera nonkango donongwa. Nye nsene asi sili twa hara vantu, twa hepa kuyilikida mweyi atu rugana. (Hetakanesa Jakopo 2:17, 26.) Pasihonena, Jehova ga tu hara. (1 Joh. 4:19) Kupitira moNonkango dendi Bibeli, age kututantera asi ga tu hara. (Epis. 25:10; Rom. 8:38, 39) Yininke eyi a rugana kulikida hena asi ga tu hara. Johanesa kwa tjenge asi: “Karunga omu ga tu horwera eharo lyendi, mokututumina Munwendi thi asi tu parukire mwendi.” (1 Joh. 4:9) Jehova kwa geve Munwendi ogu ga hara yipo a ya tu hepere nokuyatufira. (Joh. 3:16) Yipo nye asi ose twa yi pura nawa-nawa asi Jehova ga tu hara.

7. Yisinke ga rugana Jesus eyi ayi likida asi ga tu hara?

⁷ Jesus kwa tanterere varongwa vendi  asi ga va hara. (Joh. 13:1; 15:15) Kupitira mweyi ga uyungire neyi ga rugene, age kwa yi likidire asi ga hara varongwa vendi kukwatera mo nose. Jesus kwa tente asi: “Nagumwe si ga kara neharo lyokupita lyogu a fire vakwawo.” (Joh. 15:13) Mokumona asi Jehova naJesus kwa tu ruganena yininke yoyinzi, yisinke natu rugana?

8. Kuliza na-1 Johanesa 3:18, yisinke twa hepa kurugana?

⁸ Ose kuyilikida asi twa hara Jehova naJesus pokuvalimburukwa. (Joh. 14:15; 1 Joh. 5:3) Jesus kwa tu pangerere asi twa hepa kulihara-hara. (Joh. 13:34, 35) Twa hepa kuyilikida asi twa hara vanavazinyetu, kapisi pokuuyunga tupu asi twa va hara nye hena mokurugana ko yuma. (Resa 1 Johanesa 3:18.) Yisinke natu rugana yipo tu yi likide asi twa va hara?

9. Mokumona asi Johanesa kwa here vantu, yisinke ga rugene?

⁹ Johanesa kwa sigire oguhwe nongesefa zawo zokukwata nomfi. Age kwa ruganesere eparu lyendi nalinye mokuvatera vantu va dive Jehova naJesus. Eparu eli ga horowere kapi lya kere ureru. Age kwa mu hepekere ano apa ga kurupire kwa mu tulire modorongo. (Yirug. 3:1; 4:1-3; 5:18; Ehor. 1:9) Nampili apa ga kere modorongo morwa kuzuvhisa kuhamena Jesus, Johanesa ga yi likidire asi ga hara vakwawo. Pasihonena, apa ga kere posirudi saPatimosa, age kwa tjenge buke zEhororo nokuzituma konombungakriste yipo di dive eyi “nayi horoka mongenderera.” (Ehor. 1:1) Ano ayo kumoneka asi apa va mu pwagesere modorongo posirudi saPatimosa, Johanesa kwa tjenge Evangeli lyaJohanesa kuhamena eparu lyaJesus nomu nga zuvhisa. Age hena kwa tjenge nombilive ntatu mokukorangeda vapuli vakwawo. Ngapi omu no honena elizambero lyaJohanesa?

10. Ngapi omu no yi likida asi wa hara vantu?

¹⁰ Ove kuvhura o yi likide asi wa hara vantu kupitira mweyi wa hara kurugana meparu. Satana ana hara o ruganese siruwo soge nasinye nononkondo doge nadinye mokuligazara tupu nyamoge pokukodjera yimaliwa ndi o divikwe. Nye Vakriste mouzuni mudima kuruganesa siruwo sawo sosinzi mokuzuvhisa mbudi zongwa nokuvatera vantu va dive Jehova. Vamwe kuzuvhisa siruwo nasinye.

11. Ngapi omu vanavazinyetu wovanzi ava yi likida asi va hara Jehova novapuli vakwawo?

¹¹ Vakriste wovanzi kurugana mazuva nagenye gomosivike yipo va li rere vene nomapata gawo. Nye nampili ngoso, vanavazinyetu owo kukwatesa ko mbunga zaKarunga mononkedi dimwe. Pasihonena, vamwe kuvatera moyimpagwa, vamwe kuvatera komatungo ano nkenye gumwe ga kara nompito zokugava yimaliwa koyirugana youzuni mudima. Awo kuyirugana nainye eyi morwa va hara Karunga novantu. Apa atu wiza komapongo nkenye apa nokulihameka mo, ose kuyilikida asi twa hara vanavazinyetu. Ose kuwiza komapongo nampili ngomu atu roroka. Nampili ngomu atu lizuvhu woma, ose simpe kugava malimbururo. Ntani nampili ngomu twa kara nomaudigu, ose kukorangeda vakwetu komeho nokonyima zepongo. (Heb. 10:24, 25) Tatu pandura vanavazinyetu koyirugana eyi ava rugana.

12. Monkedi musinke hena zimwe ga yi likidire Johanesa asi ga here vapuli vakwawo?

¹² Johanesa kwa yi likidire asi ga hara vapuli vakwawo, pokuvapandadeka nokuvapukurura.  Pasihonena, monombilive dendi, age kwa pandadekere vapuli vakwawo morwa epuro lyawo noyirugana yawo yoyiwa nye hena ga va pere mapukururo kuhamena nonzo. (1 Joh. 1:8–2:1, 13, 14) Mokulifana, twa hepa kupandadeka vanavazinyetu koyirugana yawo yoyiwa. Nye nsene tuna mono gumwe ana kara nonkareso zondona ndi kuna kurugana yininke eyi nayi tura elikwatakano lyendi mosiponga, twa hepa kumupukurura. Pwa hepa uradi mokuyirugana oyo. Nye Bibeli kutanta asi vakaume wousili kulitwepeka ndi kulipukurura-pukurura.—Yis. 27:17.

13. Yisinke natu nyokere po kurugana?

¹³ Poyiruwo yimwe, ose kuyilikida asi twa hara vanavazinyetu apa atu nyokere po kurugana yininke yimwe. Pasihonena, ose kunyokera po kuhanduka usimbu apa vanavazinyetu ava uyunga yuma yongandi. Gazadara ko eyi ya horokere kouhura weparu lyaJesus lyepevhu. Age kwa tanterere varongwa vendi asi mokukagwana mwenyo gwanarunye va hepere kulya nyama zendi nokunwa honde zendi. (Joh. 6:53-57) Sinzi sovarongwa vaJesus kapi va haferere nonkango odo, makura yipo va hagekere kumukwama. Nye vakaume vendi wovalimburukwi kukwatera mo Johanesa, kapi va mu sigire. Awo kapi va kwete egano eyi ga tembe Jesus ntani nampo kwa va tetukisire. Nye nampili ngoso, varongwa vaJesus wovalimburukwi kapi ya va handukisire ntani kapi va gazarere asi eyi ga uyungire Jesus kwa kere epuko. Nye awo kwa huguvarere mwendi morwa va yi divire asi age kwa uyungire usili. (Joh. 6:60, 66-69) Yininke eyi ava uyunga vakaume vetu kapisi yi tu handukise usimbu. Nye twa hepa kuvapulisira va tu fatwilire mauzera nagenye.—Yis. 18:13; Muud. 7:9.

14. Morwasinke natu dilira kupulisira nyengo monomutjima detu?

¹⁴ Johanesa kwa tu korangedere hena tu dire kunyenga vanavazinyetu. Nsene tu dira kukwama epukururo olyo, Satana ngatu pukisa. (1 Joh. 2:11; 3:15) Eyi yiyo ya horokerere vamwe kouhura wosiruwo sovapositoli. Satana kwa rugene paapa ga hulira mokureta malinyengo mokatji kovantu vaKarunga ntani nokuvagaununa. Apa Johanesa ga tjenge nombilive  dendi, vamwe ava ngava rugana eyi ga rugene Satana, kwa kere mombungakriste. Pasihonena, Diwoterefesi kwa retesere po maligaunuko mombungakriste zimwe. (3 Joh. 9, 10) Age kapi nga fumadeke vakuronambunga ava ngazi tumu Mbungagendesi. Age hena kwa hetekerere ko kutjida mombungakriste vamwe ava ngava tambura vantu ava ga nyengere. Esi kwa kere sininke sosidona sili. Satana kuna kukondja hena naina yipo a gaunune vakareli vaKarunga. Yipo nye, kapi tuna hara kunyenga vanavazinyetu ndi tu hageke kuvakwatesa ko.

15. Yisinke va hepa kudiworoka vanturagumbo?

¹⁵ Nkedi zimwe zomulyo omu nturagumbo nayi likida asi ga hara epata lyendi kuna kara pokuvapa yihepwa yawo yopanyama. (1 Tim. 5:8) Nye ga hepa kudiworoka asi ayo mulyo unene a vatere vemepata va kare nelikwatakano lyewa naJehova. (Mat. 5:3) Tu tareni sihonena saJesus esi ga tulira po vanturagumbo. Buke zaJohanesa kututantera asi apa Jesus va mu dipagere kositji, age simpe kwa diworokere epata lyawo. Johanesa kwa sikeme naMariya, ozina vaJesus pevango apa va dipagerere Jesus. Nampili ngomu Jesus ga zuvhire kukora, age kwa pulire Johanesa a pakere mbili Mariya. (Joh. 19:26, 27) Jesus ga kere novamumbya vendi ava va pakerere mbili yihepwa yozina yopanyama, nye ayo kumoneka asi kwato gumwe gwawo ogu ga kere murongwa gwaJesus. Yipo nye, Jesus kwa here kudivilisa asi pweli gumwe ogu nga vhura kupakera mbili ozina nokuvakorangeda va twikire kukarera Jehova.

16. Yitumbukira musinke ga kere nayo Johanesa?

¹⁶ Johanesa kwa kere noyitumbukira yoyinzi. Mokumona asi age kwa kere mupositoli, ga hepere kukara nomupampi mosirugana sokuzuvhisa. Age nampo ga kwere hena, yipo nye, ga hepere kupakera mbili epata lyendi panyama ntani nokuvavatera va kare nelikwatakano lyewa naJehova. (1 Kol. 9:5) Yisinke nava lirongera ko vanturagumbo?

17. Morwasinke ya karera nomulyo kwa nturagumbo a pakere mbili yihepwa yopampepo yepata lyendi?

¹⁷ Munazinyetu gonturagumbo, kuvhura a kare noyirugana yoyinzi. Pasihonena, age nampo kurugana unene koyirugana  yendi yipo nkareso zendi zi ninkise vantu va fumadeke Jehova. (Efe. 6:5, 6; Tit. 2:9, 10) Ntani kuvhura a kare noyirugana mombungakriste ngwendi kukorangeda vapuli vakwawo ntani nokuzuvhisa noupampi. Ntani ya kara hena nomulyo a lironge Bibeli nkenye apa namukadendi novana vendi. Epata lyendi nga li yi hafera kweyi ava vatere va kare vana kanguka parutu nokukara noruhafo ntani va kare nelikwatakano lyewa naJehova.—Efe. 5:28, 29; 6:4.

18. Yisinke ga pulire nawa-nawa Johanesa?

¹⁸ Johanesa kwa parukire siruwo sosire ntani yinzi ga li monenene. Age kwa li gwanekerere nomaudigu gomanzi aga ngano ga mu ninkisire a dire kukara nepuro lyokupama. Nye age nkenye apa nga kondjo a sikise mo nompangera daJesus, kukwatera mo kuhara vapuli vakwawo. Ngoyitundwamo, Johanesa ga yi pulire nawa-nawa asi Jehova naJesus va mu hara ntani ngava mu pa nonkondo a lididimikire maudigu. (Joh. 14:15-17; 15:10; 1 Joh. 4:16) Satana nouzuni wendi kapi ya ninkisire Johanesa a dire kulikida eharo.

19. Yisinke ali tu korangeda etjangwa lya-1 Johanesa 4:7 tu rugane ntani morwasinke?

¹⁹ Ngwendi Johanesa, nose kuna kuparuka mouzuni ou ana kupangera Satana ogu ga nyenga vantu. (1 Joh. 3:1, 10) Nampili ngomu ana hara asi tu hageke kuhara vanavazinyetu, ayo kapi ngayi mu tompoka nsene tu dira kumupulisira. Tu twikireni kuhara vanavazinyetu nokuyilikida asi twa va hara kupitira mweyi atu uyunga nomoyirugana. Nsene tu likida eharo, ose ngatu hafa kweyi twa hamena kepata lyaJehova.—Resa 1 Johanesa 4:7.