1. Ngwendi hompa Ndafita, yisinke ava lipura vamwe?

NATUVENYE kwa hara kuparuka mombili. Kwato gumwe gwetu ga hara kukara noyinka. Nye poyiruwo yimwe, ose kukara noyinka. Eyi yiyo vakareli vamwe vaJehova ava lipulire epuro ngwendi eli hompa Ndafita ga pulire Jehova asi: “Dogoro ezuvake ngani lididimikira kukora, noruguwo momwenyo gwange?”—Epis. 13:2.

2. Yisinke natu ka zogera mosirongwa esi?

² Nampili ngomu atu kara noyinka poyiruwo yimwe, nye koyili natu rugana yipo tu dire kukara nosinka sosinene. Mosirongwa esi, pomuhowo tatu ka zogera yininke yimwe eyi nayi tu ninkisa tu kare nosinka. Ano konyima natu ka zogera yitwa ntazimwe eyi nayi tu vatera tu liture nsene kuna kuligwanekera nomaudigu.

3. Yininke musinke ayi tu retere sinka ntani kuvhura tu yi hagekese po ndi?

³ Yininke yinzi eyi nayi vhura kuturetera sinka ntani ose kapi tatu vhuru kuhagekesa po yininke oyo. Pasihonena, mokumona asi nondya, yidwara ntani mambo kuna kuzeruka mukoso gwayo nkenye mvhura, ose kapi tatu vhuru kuhagekesa po mukoso ogo. Ntani kapi tatu vhuru kuhagekesa po makondjeso aga atu li gwanekere nago kosure ndi koyirugana kuhamena kukumbagera ndi eligwanekero panyama. Kapi hena tatu vhuru kuhagekesa po ukorokotji ou una kuhoroka momukunda gwetu. Ose kuna kuligwanekera nomaudigu aga morwa kuna  kuparuka mouzuni omu sinzi sovantu ava gazara yininke eyi ya dira kuliza nonompango doBibeli. Ntani Satana mupangeli gouzuni ou ga yi diva asi vamwe kapi ngava twikira kukarera Jehova morwa ngava pulisira “sinka seyi youzuni ou” si va tjilise. (Mat. 13:22; 1 Joh. 5:19) Eyi kapi ayi tu tetukisa kweyi uzuni una karere nomaudigu gomanzi aga gana kuninkisa vantu va kare nosinka sosinene!

4. Yisinke na yi horoka nsene tu kara nosinka sosinene?

⁴ Maudigu kuvhura kutuninkisa tu kare nosinka sosinene, ano eyi kuvhura kutukarera udigu tu gazare nayopeke. Pasihonena, ose nampo kuvhura tu kare nosinka asi kapi natu gwana yimaliwa yokugwanena po yokuranda yihepwa yetu ndi nampo kuvhura hena tu kare nosinka asi kuvhura tu vere nokuzumbanesa yirugana yetu. Nampo kuvhura hena tu kare nosinka asi kuvhura ngatu dire kulimburukwa nompango daKarunga apa ngatu ligwanekera nomakondjeso. Satana ntaantani nga ninkise vantu ava ava mu kwatesa ko ngava homokere vantu vaKarunga, ano eyi kuvhura yi tu ninkise tu kare nosinka kuhamena eyi ngatu rugana apa ngava tu homokera. Eyi kuvhura yi tu ninkise tu lipure asi: ‘Ayo epuko kwange kukara nosinka koyininke oyo ndi?’

5. Yisinke ga tembe Jesus apa ga tente asi: ‘Walye omu lipakere sinka’?

⁵ Twa yi diva asi Jesus kwa tanterere vasikuli vendi asi: ‘Walye omu lipakere sinka.’ (Mat. 6:25) Ngoso Jesus kwa tembe nye asi kapisi tu kare nosinka kwankenye eyi ndi? Hawe! Diworoka asi nampili vakareli vaJehova vamwe wovalimburukwi womosiruwo sanare, nawo kwa kere nosinka, nye Jehova simpe ga va here. * (1 Vah. 19:4; Epis. 6:3) Jesus pokuuyunga nonkango odo, age kwa geve ehengagwido kwetu morwa kapi ana hara tu kare nosinka unene esi nasi tu ninkisa tu lizuvhe asi kukarera Jehova kapisi sininke somulyo po unene meparu lyetu. Yisinke natu rugana nsene tuna kara nosinka?—Tara kakende “ Eyi norugana.”

6. Kuliza noVafilipi 4:6, 7, yisinke nayi tu vatera tu kare tuna litura?

⁶ (1) Kanderera nkenye apa. Nsene ono kara nosinka kuhamena udigu wongandi, kanderera kwaJehova a ku vatere. (1 Pet. 5:7) Jehova kuvhura kulimburura makanderero goge pokukupa ‘mbili ezi za pitakana unene nondunge [dovantu] navenye.’ (Resa Vafilipi 4:6, 7.) Kupitira mompepo zokupongoka, Jehova nga ku pa mbili ozo yipo zi ku vatere o dire kukara nosinka sosinene.—Gar. 5:22.

7. Yisinke twa hepa kudiworoka nsene kuna kukanderera?

⁷ Nsene kuna kukanderera, tantera Jehova nayinye eyi yina kara komutjima goge. Mutantera maudigu goge ntani nomu ono kulizuvha. Nsene udigu owo kuvhura kuukohonona po, hundira unongo nononkondo yipo yi ku vatere o dive eyi norugana. Nsene kwato eyi novhura kurugana ko mokukohonona po udigu owo, hundira Jehova a ku vatere yipo o dire kukara nosinka sosinene koudigu owo. Nsene o tumbura udigu woge kuvyukilira momakanderero goge, ove ngo limonena omu Jehova ngaga limburura. Nsene makanderero goge kapi vana kugalimburura usimbu, kapisi o hageke kukanderera. Jehova ana hara hena o twikire kukanderera kwendi kupitakana tupu kumutantera maudigu goge.—Ruk. 11:8-10.

8. Yisinke natu tumbura hena momakanderero getu?

⁸ Ngomu ono kutantera Jehova yinka yoge nayinye mekanderero, mupandura hena. Ya kara nomulyo tu gazadare ko  koyininke nayinye yoyiwa eyi tuna kara nayo ngesi, nampili tu kare nomaudigu gomanzi. Nye yisinke norugana nsene kuna kukudigopera kutantera Jehova omu ono kulizuvha? Diworoka asi Jehova nga limburura ekanderero lyoge nampili nsene o uyunga tupu asi ‘na kanderere vatera nge!’—2 Hist. 18:31; Rom. 8:26.

9. Yisinke natu rugana nsene tuna kara nowoma?

⁹ (2) Huguvara mounongo waJehova mevango lyokulihuguvara nyamoge. Mosiruwo somuporofete Jesaya, Vajuda kwa tjilire asi Vaasiliya kuvhura va va homokere, makura yipo va pulire ekwafo koVaegipite. (Jes. 30:1, 2) Jehova yipo ga va rondwere asi nsene va tura ehuguvaro lyawo moVaegipite, nga yi va retera ezonauko. (Jes. 30:7, 12, 13) Kupitira momuporofete Jesaya, Jehova kwa tanterere vantu omu nava gwana epopero. Age kwa tente asi: ‘Huguvareni mwange nawa-nawa, makura ngomu nkondope tomu yoworoka.’—Jes. 30:15b.

10. Momaukaro musinke gamwe natu yi likida asi twa huguvara Jehova?

¹⁰ Momaukaro musinke natu yi likida asi ose twa huguvara Jehova? Tu tareni yihonena eyi yina kukwama ko. Tu tante nye asi ono gwana yirugana yokufuta yimaliwa yoyinzi, nye ngayi hepa siruwo soge sosinzi, ano pamwe ngo rugana rutayima ntani kapi ngo gwana nawa-nawa siruwo sokukarera Jehova ngwendi momu ono kuyirugana ngesi. Ndi tu tante nye asi murugani mukweni ogu o rugana nage kuna kulihoresa koge nye age kapisi gumwe goNombangi daJehova. Ndi nampo gumwe gekoro ta ku tantere asi: “Ngani kutjida mo membo nsene o twikira kukarera Jehova.” Yosili, ayo kapi ngayi kara ureru kutokora momaukaro nagenye ogo, nye Jehova nga ku pa mavyukiso. (Mat. 6:33; 10:37; 1 Kol. 7:39) Epuro kuna kara asi ngo huguvara Jehova nokulimburukwa mavyukiso gendi ndi?

11. Yihonena musinke yomoBibeli natu lironga yipo tu kare tuna litura nsene wopeke tava tu hepeke?

¹¹ (3) Lirongera ko koyihonena yoyiwa neyi yoyidona yomosiruwo sanare. MoBibeli kwa kara mo yihonena yoyinzi eyi ayi likida mulyo gokukara tuna litura nokuhuguvara mwaJehova. Ngomu no ka lironga yihonena eyi, gazadara ko eyi ya vaterere vakareli vaJehova va twikire kumukarera nampili momahepeko. Pasihonena, apa vantu ava va hamenene mosigongi somasimbi va tanterere vapositoli va hageke kuzuvhisa, awo kapi va tjilire. Mevango lyokukara nowoma, awo kwa uyungire nouradi asi: “Ose twa hepa po kulimburukwa unene Karunga, kupitakana vantu.” (Yirug. 5:29) Awo kapi va kere nowoma nampili ngomu vava toonene. Morwasinke va dililire kukara noutjirwe? Morwa va yi divire asi Jehova kwa heme kwawo ntani kwa mu hafesere. Yipo nye, awo kwa twikilire kuzuvhisa mbudi zongwa. (Yirug. 5:40-42) Mokulifana, apa Sitefanesa va mu toonene komeho a fe, age kwa kere ana litura ano sipara sendi “kwa fene ngwendi somuengeli.” (Yirug. 6:12-15) Morwasinke? Aso kwa kere sidiviso asi Jehova kwa mu haferere.

12. Kuliza na-1 Peturusa 3:14 ntani 4:14, morwasinke natu dilira kudompa mutjima nsene tava tu hepeke?

¹² Vapositoli va yi dimbwilire asi Jehova kwa kere kumwe nawo. Age kwa va pere nonkondo dokurugana yitetu. (Yirug. 5:12-16; 6:8) Jehova naina kapi a tu pe nonkondo dokurugana yitetu. Nye nampili ngoso, age kututantera kupitira moNonkango dendi Bibeli asi nsene tava tu hepeke morwa kurugana youhunga, age kutuhafera ntani mpepo zendi zokupongoka ngazi kara nose. (Resa 1 Peturusa 3:14; 4:14.) Yipo nye, mevango lyokukara nosinka kuhamena eyi ngatu rugana nsene ngava tu hepeka komeho, ngano twa hepa kunkondopeka elikwatakano  lyetu naJehova nokukara nehuguvaro asi nga tu vatera. Ngwendi varongwa vaJesus womosiruwo sanare, nose twa hepa kuhuguvara nonkango daJesus edi ga uyungire asi: “Ame ngani mu pa nonkango nounongo, asi nonkore deni ngadi ka yi vhure kumulimburura ndi kumupatanesa.” Jesus kwa tu tumbwidira hena asi: “Mokudidimika kweni yimo ngomu gwanena mwenyo.” (Ruk. 21:12-19) Ntani ayo mulyo tu diworoke nkenye apa asi Jehova kapi ga divara vakareli vendi wovalimburukwi ava va fa, age nga ka va vhumbura.

13. Yisinke natu lirongera ko koyihonena yava va dilire kutwikira kuhuguvara mwaJehova?

¹³ Kuvhura hena tu lirongere ko koyihonena yava va dilire kutwikira kuhuguvara mwaJehova. Pokulironga yihonena oyo yoyidona, ta yi tu vatere yipo tu nyokere po kurugana mapuko aga va rugene. Pasihonena, apa hompa Asa ga tamekere kukara hompa goVajuda, age kwa huguvarere Jehova apa mbunga zovakwayita wovanzi za va homokerere, ano Jehova kwa mu vaterere a funde vakwayita owo. (2 Hist. 14:9-12) Nye sikando simwe apa kambungagona kovakwayita vahompa Basa ka homwene sirongo saJuda, Asa kapi ga huguvarere mwaJehova. Age kwa futire sisiliveli hompa gwaSiliya yipo a mu vatere. (2 Hist. 16:1-3) Ntani apa ga verere unene, age kapi ga huguvarere Jehova yipo a mu vatere.—2 Hist. 16:12.

14. Yisinke natu lirongera ko kepuko eli ga rugene Asa?

¹⁴ Pomuhowo, apa hompa Asa ga ligwanekerere nomaudigu, age kwa huguvarere mwaJehova. Ano konyima kapi ga huguvarere Jehova. Age kwa kambadarere kukohonona po maudigu pwa mwene. Pomuhowo, evatero eli ga pulire Asa koVasiliya kwa monekere ngwendi nayinye yiwawa. Nye Vajuda kapi va kere mombili siruwo sosire. Jehova kwa tanterere Asa kupitira momuporofete asi: “Morwa ove ono lihameke kwahompa gwaSiliya, kapi ono lihameke kwaHOMPA, Karunga goge, yipo nye vana yoworokere mo momawoko goge vakwayita vahompa gwalsraeli.” (2 Hist. 16:7) Nsene kuna kukohonona po udigu wongandi, twa hepa kutakamesa pokulihuguvara nyamwetu mevango lyokuhuguvara Jehova yipo a tu vatere kupitira moNonkango dendi Bibeli. Ya wapa kupura Jehova evatero, nampili nsene kuna kutura po etokoro lyousimbu-usimbu. Age nga tu vatera tu ture po etokoro lyouhunga.

15. Yisinke natu rugana nsene kuna kuresa Bibeli?

¹⁵ (4) Kwata novelise domoBibeli momutwe. Nsene ono gwana novelise dimwe edi da uyunga kuhamena mulyo gokukara ono litura nokuhuguvara mwaJehova, hetekera ko kudikwata momutwe. Mokuninka asi o dire kudidivara, di resa kuziguruka ndi di tjanga yipo o di lidiworokese nkenye apa. Jehova kwa tanterere Josuwa a rese Nonkango dobuke zoVeta nkenye apa, yipo nga ture po matokoro gomawa. Ano eyi nga resa moVeta ozo kwa mu vaterere a kare nouradi wokupitisira vantu vaKarunga mevango lyokukara nowoma. (Jos. 1:8, 9) Sinzi sonovelise edi da kara moBibeli kuvhura kukuvatera o kare ono litura nsene kuna kara moukaro ou na u kuninkisa o lizuvhe woma.—Epis. 27:1-3; Yis. 3:25, 26.

16. Ngapi omu Jehova a ruganesa vanavazinyetu va tu vatere yipo tu kare tuna litura nokumuhuguvara?

¹⁶ (5) Kara kumwe novanavazinyetu. Jehova kuruganesa vanavazinyetu va tu vatere yipo tu kare tuna litura ntani nokutwikira kumuhuguvara. Apa atu wiza komapongo, ose kugwanena mo uwa moyiuyungwa, momalimbururo ntani nononzogera dokukorangeda edi atu zogere apa atu kara novanavazinyetu. (Heb. 10:24, 25) Ntani ayo kutukorangeda unene apa atu tantere vakaume vetu womombungakriste kuhamena sinka esi tuna kara naso. Apa vakaume vetu  ava tu tantere “nonkango donongwa,” ayo kutuvatera tu dire kukara nosinka sosinene.—Yis. 12:25.

17. Kuliza noVahebeli 6:19, ngapi omu ehuguvaro a li tu vatere tu lididimikire maudigu?

¹⁷ (6) Twikira kunkondopeka ehuguvaro lyoge lyokomeho. Ehuguvaro kwa fana ngwendi “sisikameso sowato womwenyo,” eli ali tupe nonkondo yi kare asi maudigu musinke tuna kuligwanekera nago. (Resa Vahebeli 6:19.) Teda ko kuhamena meho ezi ga tumbwidira Jehova ntani posiruwo oso kwato ogu nga ka kara nosinka. (Jes. 65:17) Li gazara nyamoge mouzuni woupe wombili omu ngamu dira kukara yininke eyi ayi tu retere sinka. (Mika 4:4) Nsene o tantera ko wopeke kuhamena meho ozo, ove ngo pameka ehuguvaro lyoge. Litura mo unene mokuzuvhisa nokutulisa po varongwa. Nsene o yi rugana, ove ‘ngo sikilira mo nawa-nawa mehuguvaro dogoro kouhura.’—Heb. 6:11.

18. Yisinke nga yi vhura kuhoroka komeho ntani yisinke ngatu rugana?

¹⁸ Mokumona asi ose kuna kuparuka kehagero lyouhura wouzuni, ose nga tu ligwanekera nomaudigu gomanzi aga ngaga tu retera sinka sosinene. Ano etjangwa lyetu lyomvhura 2021 kutuvatera tu lididimikire maudigu ogo nokukara tuna litura. Ose kapi atu yi rugana mononkondo danyamwetu, nye pokuhuguvara mwaJehova. Momvhura ezi, tu yi likideni kupitira mweyi atu rugana asi ose twa kara nepuro metumbwidiro lyaJehova eli asi: “Huguvareni mwange nawa-nawa, makura ngomu nkondope tomu yoworoka.”—Jes. 30:15.