Harvey yige ga kere mukondi povamumbya vendi wovagara. Vakondi vendi kwa gwene usili modoropa zaMidland Junction koUtokero waAustralia. Ngesi pana piti nomvhura 80 ntani posiruwo sina, mosirongo kwa kere mo ruhepo rorunene. Harvey kwa here Jehova ntani age kwa gwene ekuho apa ga kere nonomvhura 14. Konyima, age ga ya lirongere kutambura nkenye situmbukira somombungakriste esi ngava mu pe. Sikando simwe kwa mu pulire a rese Ruhungu age opo simpe mumati, makura ta nyoka nokugazara asi kapi ta yi vhuru. Nye munazinyetu ogu ga uyungire naHarvey kwa mu vaterere a kare nomutaro gouhunga pokuuyunga asi: “Apa gumwe gomombunga zaJehova a ku pe sirugana, age ga yi diva asi ngo si sikisa mo.”—2 Kol. 3:5.

Ame kwa lirongere usili moIngiranda ngwendi moomu tupu va yi rugene onane namukurwange gomukadi. Otate kapi va here Nombangi pomuhowo, nye konyima va ya tambwire usili. Nampili ngomu ngava tu rwanesa, ame kwa gwene ekuho apa na kere nonomvhura ntane. Ame kwa litulilire po sitambo sokukara  muzuvhisi gokukarerera nokuyakara mutumwa. Nye otate kapi va pulisilire nge ni rugane uzuvhisi wokukarerera, awo kwa here asi ntudi dogoro ni kare nonomvhura 21. Kapi na here kundindira. Makura apa na kere nonomvhura 16, otate yipo va pulisilire nge ni dirukire koAustralia ni ka kare namukurwange gomukadi ogu ga hovere kudirukira ko. Ano apa na kere nonomvhura 18 yipo na tamekere uzuvhisi wokukarerera.

Ose kwa ka ligwene naHarvey moAustralia. Natuvenye kwa here kukara vatumwa. Ose kwa likwere mo-1951. Konyima zokuzuvhisa kumwe uzuvhisi wokukarerera nomvhura mbali, yipo va tu pulire tu rugane sirugana sokudingura nombungakriste. Mukunda ogu va tu pere gokoUtokero waAustralia munene, ano twa hepere kusinga sinano sosire yipo tu ka sike komavango aga ga likarera.

Mo-1954, kwa tu zigidire koSikora zaGiliyata. Ezi kwa kere mpito mokusikisa mo sitambo setu sokukara vatumwa. Ose kwa zire koNew York nosikepa ntani ose kwa ka lirongere Bibeli momunene. Ose kwa ka lirongere hena Rusipanye, ayo kwa kere udigu kwaHarvey mokurulironga.

Ezuva limwe, varongi vetu kwa tu tanterere asi ava vana hara ngava ze koYapani kuvhura va litjangese yipo va va ronge Ruyapani. Ose kwa here mbunga zaJehova zi tu tantere oku natu za. Konyima tupu zosiruwo, Albert Schroeder gumwe govarongi, ga ya dimbwilire asi kapi tuna litjangesa. Makura tatu tantere asi: “Gazadareni ko hena.” Nye kapi twa li tjangesere hena, makura munazinyetu Schroeder ta uyunga asi: “Name novarongi vakwetu vamwe tuna mu tjangesa. Hetekeni kulironga Ruyapani.” Ayo kwa kere ureru kwaHarvey a tumbure nonkango moRuyapani kupitakana Rusipanye.

Ose kwa ka sikire moYapani mo-1955, posiruwo sina kwa kere mo tupu vazuvhisi 500. Harvey kwa kere nonomvhura 26 ano ame 24. Kwatu tumine mositata saKobe, omu twa zuvhisilire nomvhura ne. Ose kwa hefe apa va tu zigidire hena mosirugana sokudingura nombungakriste ntani ose ngatu ruganene pepi nositata saNagoya. Yinzi ngayi tu hafesa mosirugana setu, pasihonena vanavazinyetu, nondya ntani mavango aga ngatu tara. Konyima zosiruwo, Jehova kwa ya tu pere ko hena sirugana simwe.

Konyima zokukara nomvhura ntatu mosirugana sokudingura nombungakriste, Beteli zaYapani kwa tu pulire tu ze koTaiwan tu ka  zuvhisire vantu worudi roVaamis. Vanavazinyetu vamwe woRuamis kwa kere varwanesi usili, ano Beteli zomoTaiwan za hepere munazinyetu gomugara ogu ga divire Ruyapani a ka vatere mokuhagekesa po varwanesi usili. * Eli kapi lya kere etokoro lyoureru morwa twa here sirugana setu somoYapani. Nye Harvey ga lirongere kutambura nkenye sirugana, makura yipo twa tokwere kuza.

Ose kwa ka sikire mwaMangundu mo-1962. Posiruwo sina, moTaiwan kwa kere mo vazuvhisi 2 271, sinzi sawo kwa kere worudi roVaamis. Nye pomuhowo twa hepere kulironga Rutjina. Ose kwa kere tupu nobuke zimwe ntani nogu ngatu rongo, age kapi ga divire Ruingilisa, nye twa lirongere.

Konyima tupu zokukasika moTaiwan, Harvey kwa mu tulire a gendese sirugana somosirongo oso. Beteli kapi za kere zonene, yipo nye, Harvey ga kere nosiruwo sokurugana yirugana yendi yomomberewa ntani ga kere hena nosiruwo sokurugana novanavazinyetu woRuamis yivike yitatu nkenye kwedi. Ntani hena, age kwa kere mutareli gonomukunda, kukwatera mo kugava yiuyungwa poyigongi. Harvey ngano ga vhulire kugava yiuyungwa moRuyapani, ano vanavazinyetu ava ava uyunga Ruamis ngano va yi kwete egano. Nye epangero kwa pulisilire mapongo ga kare moRutjina. Yipo nye, Harvey kwa geve yiuyungwa moRutjina nampili ngomu ga dilire kurudiva nawa, ano munazinyetugara gumwe kwa yi torokere moRuamis.

Poyiruwo yimwe twa hepere kugwana epulisiro komeho tu kare nosigongi. Ayo kwa kere udigu kugwana epulisiro ano poyiruwo yimwe ngayi gusa siruwo. Apa vaporosi ngava dili kugava epulisiro sivike sosigongi, Harvey nga kara poopo positasi dogoro a gwane epulisiro. Mokumona asi vaporosi ngava lizuvhu nomuga pokukara novanayirongo mositasi sawo, awo ngava gava epulisiro usimbu.

Yivike eyi ngatu kara novanavazinyetu, rorunzi ose ngatu gendi ure wokupitakana povili zimwe pokuronda nondundu nokugenda konontere domukuro. Tani diworoka sikando sange sokuhova kuronda ndundu. Konyima zomulihako, ose kwa katukire nombesa povili zautano zongurangura tu ze komukunda gokoure. Apa twa ka sikire, ose kwa gendere konontere domukuro nokuronda ndundu. Azo kwa kere ndundu zonde, ngomu na rondere ame namwene nompadi damunazinyetu ogu ga kere nge keguru.

Kongurangura mezuva olyo, Harvey kwa zuvhisire novanavazinyetu womomukunda ogo, ano ame kwa zuvhisilire momukunda gumwe omu va kere vantu ava ngava uyunga Ruyapani. Poyiha yovili zozimwe, ame kapi na kere nononkondo morwa kapi na lire yuma ure wonovili dongandi. Apa na ya ligwene naHarvey, age ana ligaunuka novanavazinyetu nare. Harvey kwa lisintire novantu ava ga pere yifo ano awo kwa mu pere mauta gokudira kutereka. Age kwa likidire nge omu ava ga li pokulitomona nakauke ntani nokusipa mo eyi ya kara mo. Ame kwa hetekere limwe nampili ngomu lya dilire kutovara. Nye yilye ga vhulire kulya lyautatu? Harvey kwa li pere nge nalyo morwa kwa  gazarere asi nsene nani pwilira kapi na vhura kudamuna nge.

Posigongi simwe, ame kwa ligwanekerere noukaro ou na dira kuligwanekera rumwe. Ose kwa kere membo limwe lyovanavazinyetu ava va kere pepi noSinyanga soUhompa. Mokumona asi vantu worudi roVaamis ngava tara asi kulikuhwa mulyo, mukada mutareli gonombunga kwa tu ninkire tu likuhwe. Harvey kwa kere noyirugana, makura ta tantere nge ni hove. Mokulikuhwa, pwa hepere kukara yininke yitatu, pasihonena, mbalisa zomema gomatenda, zimwe zomema goupyu ntani zokudira mema. Ame kwa tetukire morwa mukada mutareli kwa tulire nombalisa odo poruzera ponze zonzugo pepi noSinyanga soUhompa oku vanavazinyetu va vaterere mokuwapaika sigongi. Yipo na mu pulire nsene ekehe ko yipo tu li vive. Makura ta retere nge ekehe lyokumonekerera lyosiplastika. Ame kwa gazarere kuza konyima zonzugo, nye na tjilire asi mapato taga ka huma nge. Makura yipo na gazarere ame na hepa tupu kulikuhwa morwa vanavazinyetu kuna kurugana kuvhura va dire kumona nge, ano nsene ni dira kulikuhwa kuvhura yi va pundukise.

Harvey ga dimbwilire asi vanavazinyetu woRuamis ngayi va karere udigu kutura po ezokomeho pampepo morwa sinzi sawo kapi va divire kuresa ntani kapi va kere noyimbapiratjangwa meraka lyawo. Mokumona asi posiruwo sina eraka lyoRuamis kwa tamekere kulitjanga nonondanda doSiroma, ayo ya wepe kuronga vanavazinyetu va rese meraka lyawo. Ayo kapi ya kere ureru kuyirugana, nye mwaza siruwo, vanavazinyetu va ya tamekere kulironga kuhamena Jehova meraka lyawo. Yimbapiratjangwa yoRuamis kwa ya tamekere kuyipwagesa koyiha yomvhura 1967 ano mo-1968 yipo va pwagesere Ruhungu rokuhova roRuamis.

Nye epangero kapi lya here yimbapiratjangwa eyi ya kere momaraka ga peke lya hana asi lyoRutjina. Yipo nye, mokunyokera po udigu owo, Ruhungu roRuamis kwa ru pwagesere mononkedi dokulisiga-siga. Ure wongandi, Ruhungu kwa ru pwagesere meraka lyoRutjina ntani lyoRuamis. Apa vantu ngava kara nomapuro, ayo kwa monekere asi ose ngatu ruganesa Ruhungu tu ronge vantu Rutjina. Kutundilira posiruwo sina dogoro ngesi, mbunga zaJehova kwa pwagesa yimbapiratjangwa yoyinzi moRuamis mokuvatera vantu va lironge Bibeli.—Yirug. 10:34, 35.

Nomvhura dononzi, vanavazinyetu wovanzi woRuamis kapi ngava kwama nompango daKarunga. Mokumona asi kapi va kwete nawa egano nompango domoBibeli, vamwe ngava nu dogoro kukorwa ntani nokukoka makanya. Harvey nga dingura nombungakriste dononzi mokuvatera vanavazinyetu va kwate egano omu Jehova a tara yininke eyi ngava rugana. Sikando simwe, ose kwa ligwanekerere noukaro ou nina tumbura ketameko.

Vanavazinyetu wokulinunupika kwa tulire po marunduruko, nye sinzi sawo kapi va yi rugene, ano ure wonomvhura 20, sivaro sovazuvhisi moTaiwan kwa gurumukire kutunda ko-2 450 dogoro 900. Kwatu guvisire sili. Nye twa yi divire asi Jehova kapi ta vhuru kutungika mbunga ezi za dira kuzera. (2 Kol. 7:1) Konyima zosiruwo, nombungakriste kwa tamekere kukarera Jehova monkedi zongwa. Naina moTaiwan kwa kara mo vazuvhisi wokupitakana po-11 000.

Kutundilira mo-1980 yi tware komeho, ose twa dimbwilire asi vanavazinyetu womonombungakriste doRuamis va tungire po epuro lyokupama, ano Harvey nga ruganesa siruwo sendi sosinzi mokuvatera vanavazinyetu woRutjina. Age kwa lirongere Bibeli novagara wovahapuli ava va kwere vanavazinyetukadi. Tani diworoka ezuva limwe, age kwa tanterere nge asi age kwa hefe apa gumwe govagara owo ga kanderere sikando sendi sokuhova kwaJehova. Name kwa hefe kweyi na rongere vantu wovanzi va hedere pepi Jehova. Ame hena kwa hefe kweyi ngani rugana moBeteli zaTaiwan kumwe novana vavali wovalirongi vange woBibeli.

Ngesi kapi nina kara namugara gwange. Age kwa dogorokere mo-1 Murongagona 2010 kokankera konyima zokukara mononkwara nomvhura hambara 59. Age kwa kere mosirugana sosiruwo nasinye hambara nomvhura 60. Ngesi kuna kumurongora sili. Ayo kwa hafesere nge sili kurugana kumwe nendi moyirongo yivali yoyiwa. Ose twa divire kuuyunga maraka, ano Harvey ga divire hena kutjanga maraka gavali goudigu gomoAsia.

Konyima zonomvhura dongandi, Mbungagendesi kwa tokwere ni tengure koAustralia morwa ame kwa kere mukurupe ntani na hepere evatero. Pomuhowo ame kwa gazarere asi kapi tani vhuru kutunda mo moTaiwan. Nye Harvey ga rongere nge ni tambure nkenye sirugana sokutunda kombunga zaJehova. Konyima na ya dimbwilire asi na wapekere kweyi na dirukire.

Ame ngesi kurugana moBeteli zaAustralasia ntani kuzuvhisa kumwe nombungakriste zetu mosikondovike. Ame kutambura vagenda moBeteli pokuruganesa Ruyapani noRutjina. Ame kwa kundindira nononkondo evhumbuko eli ga tumbwidira Jehova. Na yi diva asi nga ka diworoka Harvey ogu nga sikisa mo nkenye eyi nga mu pura Jehova.—Joh. 5:28, 29.