MwaNsinano 2020, Mbunga ezi za karera po uhaku mouzuni mudima kwa divisire asi Korona kuna kara uvera womukagu mouzuni mudima. Uvera ou kwa kundamene mamiliyona govantu ntani noNombangi daJehova dimwe pamalizuvho, pamukaro ntani yikweparu. Ngapi omu Nombangi daJehova da wapaikire ntani nokugava evatero moukaro woudigu?

 Komitiye zovawapaiki zoMbungagendesi kwa tulisire po nokomitiye dokukwafa moyimpagwa dokupitakana 950 mouzuni mudima yipo di vatere posiruwo esi souvera wokorona. Momaukaro gamwe awo kwa tulisire po ewapayiko novanavazinyetu womomukunda va vatere vanavazinyetu ava va ligwanekere noyimpagwa, ano vanavazinyetu vamwe kwa gwene evatero lyokutunda kepangero. Nokomitiye dokukwafa moyimpagwa kwa tura po ewapayiko lyokuvatera moyimpagwa yoyinzi.

 Tu tareni kosihonena seyi ya horekere moParaguay. Saitunga zimwe kwa tente asi: “Ngoyitundwamo youvera woKorona wovanzi ava va tunga moParaguay kapi vana kara nonondya dokugwanena po.” Komitiye zokukwafa moyimpagwa zomoParaguay kwa tamekere kugava evatero kovanavazinyetu, evatero eli kwa hamenene mo nondya dokugwanena po ntani yininke yokuzeresesa ntani yimwe eyi lya hepere epata lyokusika kovantu vane. Yininke eyi lya gwene nkenye epata kwa kosere yimaliwa yokusika ko-30 US $.

 Ngapi omu vavateli womoyimpagwa ava likungu vene ntani wopeke kouvera woKorona? Awo kudwara yinkumatere ntani nokulikara ure nava wopeke. Awo kudivilisa nsene asi koyitora oku ava randa nondya kwazera ntani nokukwama mavyukiso goukanguki. Eyi kwa kwatera mo kudivilisa asi ava nava ka gava nondya vana dwara yininke yokulipoperesa, yipo va zerese matuwa gawo ntani nokuzeresa evega eli nava tulikira nondya. Ava ava gava nondya, kudivilisa hena asi vana li kara ure nava vana kugwana nondya.

 Kutundilira mwaMurongagona 2021, Komitiye zovawapaiki kwa geve epulisiro lyokuruganesa yimaliwa yokupitakana po mamiliyona $25 (U.S.). Nobeteli nonokomitiye dokukwafa moyimpagwa kuruganesa nawa yimaliwa yoyigava ntani awo kurugana unene mokugwana ndando zongwa. Pasihonena vanavazinyetu womoChile, kwa here kuranda makunde gonokilograma 750 va vaterese ko moyimpagwa. Nye mokwedi kumwe tupu ndando zomakunde kwa zerukire unene. Konyima zonovili mbali apa va tokwere kukaranda makunde ogo, murandesi kwa va tanterere asi vamwe ava kava rende makunde vana ga rugwida. Mevango lyoku va randesa makunde pondando zokuzeruka, murandesi kwa tokwere kurandesa makunde gena va rugwidire pondando zombiliha kovanavazinyetu.

 Apa vanavazinyetu va zire va ka hare makunde aga va rende, murandesi kapi ga here kugava makunde nye age kwa va rundilire asi awo kapi ava gavere nondya monkedi zokuhetakana ngwendi nombunga dapeke. Konyima zokukanderera momutjima vanavazinyetu kwa tanterere murandesi asi awo kwa konakonene mwa nkenye mbungakriste yipo va dive ava vana hepa evatero. Vanavazinyetu kwa tanterere hena murandesi asi vantu ava ngava ka gwana evatero wokutunda konontundiliro dokulisiga-siga yipo nye, nondya ntani yininke yimwe ngava kava pa yeeyi va diva ntani eyi nayi ka va vatera. Awo kwa mu tanterere hena asi yigava noyirugana nayinye yoNombangi daJehova yelizambero. Eyi kwa mu hafesere unene. Murandesi kapi tupu ga pulisilire vanavazinyetu va rande makunde pondando zombiliha nye age kwa va pere ko hena nokiligrama 400 domakunde apa va ya rende sikando sokukwamako.

 Munazinyetu gomukurupe Lusu ogu hena ga fisa mugara gwendi ogu ga tunga moLiberia, kwa kara novanekoro vatano. Ezuva limwe kongurangura konyima zokuresa kabuke konakona matjangwa nokulihaka, mutekurwendi gomumati gonomvhura ntambali apa ga mwene asi nondya dina pu ta pura asi: “Mama kupi natu gwana hena nondya?” Lusi kwa tanterere mutekurwendi asi ana kanderere nare kwa Jehova ntani ana diva asi ngava pa nondya. Ezuva lyoolyo kongurova, munazinyetu Lusu kwa mu belele vakuronambunga a ze koSinyanga aka simbe nondya. Age kwa tente asi: “Mutekurwange kwa uyungire asi ngesi ana diva asi Jehova kupurakena nokulimburura makanderero, morwa Jehova kwa limburura ekanderero lyange.”

 Mukadi ogu ga tunga moDemocratic Republic of Congo kwa kara pepi noNombangi daJehova. Apa ga mwene epata lyoNombangi daJehova kuna kugwana nondya kovapuli vakwawo, age kwa uyungire asi: “Apa nga zi pwa Korona, nose ngatu kara Nombangi daJehova, morwa awo kuli kwafa-kwafa mosiruwo esi sosidigu.” Mugara gwendi kwa mu pulire asi: “Ngoso ono hara kukara Mbangi zaJehova morwa nsako zo reyisi?” Mukadi kwa limbwilire asi: “Hawe, nye sanko ozo zo reyisi sihonena seharo lyosili.”

 Nombangi daJehova ya di tompoka kugava evatero pangenderera kovanavazinyetu posiruwo esi souvera woKorona, morwa yigava yeni. Mpandu koyigava yeni eyi mwa gava kupira ko donate.pr418.com.