Mouzuni mudima sinzi somapangero kwa tura po veta asi vantu kapisi va likundame ntani kapi vana kupulisira vantu va ponge kumwe. Nombangi daJehova dina tokomene kulimburukwa veta ozo nye awo simpe kuna kuponga kumwe monkedi zapeke. Mokuyisikisa mo oyo, nombungakriste kurugana mapongo kupitira movidiyo, pokuruganesa app ava tambura asi Zoom.

 Mokuninka asi mawapaiko gomapongo ga gende po nawa ntani ga kare mepopero, Mbungagendesi za gava epulisiro mokuruganesa yimaliwa yoyigava va randere nombungakriste app ava tumbura asi Zoom. Eyi ya vatera unene nombungakriste dimwe edi ngadi dili kuvhura kufutira app zokurugana mapongo kupitira movidiyo ezi ngazi kosa yimaliwa yokusika $15-$20 ndi kupitakana opo. Nombungakriste odo ngadi ruganesa noapps domawoko-woko edi ngadi pulisire tupu vantu wovasesu ntani kwa kere siponga. Nombungakriste nadinye dina kuruganesa app zoZoom ezi za randa mbunga zaJehova da gwanena mo uwa morwa ureru kuziruganesa ntani kupulisira vantu wovanzi va lihamene mepongo. Dogoro ngesi, nombungakriste dokupitakana 65 000 moyirongo yokupitakana 170 kuna kuruganesa app ozo.

 Mbungakriste zaKairagi zomoManado koMuzogo gwaSulawesi, mosirongo saIndonesia, za hageka kuruganesa app zomawoko-woko yiyo zina kuruganesa Zoom zombunga zaJehova. Munazinyetu Hadi Santoso kwa faturura asi: “Nampili vanavazinyetu ava va dira kudiva kuruganesa yikwakonentu kuvhura ngesi kuhafera mapongo, morwa kapi va hepa kulogamo yikando yoyinzi posiruwo sepongo.”

 Mukuronambunga Lester Jijón, Jr., gomombungakriste zaGuayacanes Oeste zomoGuayaquil, moEcuador, kwa tanta asi: “Morwa sinzi sovanavazinyetu kapisi nongawo, nombungakkriste dimwe ngano kapi ya di tompoka kuranda Zoom ezi nazi pulisira navenye womombugakriste va lihameke momapongo. Ngesi morwa Zoom zombunga zaJehova kupulisa vantu wovanzi, ose kuvhura kuzigida vantu va ya ponge nose kupitira movidiyo, twa hana kukara nosinka kuhamena sivaro sovantu ava nava hamena mo.”

 Johnson Mwanza, mukurongambunga gomombungakriste zaNgwerere North moLusaka, mosirongo saZambia, kwa tjanga asi: “Sinzi sovanavazinyetu kwa ruguruka kutanta asi: ‘Zoom ezi za randa mbunga zaJehova kapi azi tu ninkisa tupu tu lizuvhe asi tuna kara pepi novanavazinyetu nye hena kutuvatera tu lizuvhe asi Jehova ga tu hara nokutupakera mbili.’”

 App Zoom ezi kwa zi randa noyimaliwa eyi ava ruganesa koyimpagwa. Yimaliwa oyo kutundilira koyigava eyi ava gava vantu mokukwatesa ko yirugana youzuni mudima. Sinzi soyigava oyo kuyigava kupitira ko-donate.pr418.com. Mpandu konkareso zeni zokugava yigava, eyi hena yina kuvatera kosirugana sokukwafa moyimpagwa uzuni mudima.—2 Vakolinte 8:14.