Nombangi daJehova da kara nosinka sosinene kovapuli vakwawo. (1 Peturusa 2:17) Sinzi setu kulizuvha ngwendi moomu ga lizuvhire munazinyetu gomukadi Tannis ogu ga kara moKenya. Age kwa tanta asi: “Ame kwa hara kudiva eyi yina kuhorokera vanavazinyetu navenye uzuni mudima.” Kupi Tannis novanavazinyetu mamiliyona mouzuni mudima ava diva eyi yina kuhorokera vanavazinyetu? Kutundilira mo-2013, ose ngatu gwana nombudi koRuha ronombudi oru rwa kara kointaneta zetu jw.org.

 KoRuha ronombudi kugava ko nombudi kuhamena Nombangi daJehova ntani kugava ko nombudi kuhamena mapwageso gonoBibeli, sirugana sokuvatera moyimpagwa, sirugana setu setungo ntani noyihorokwa yimwe. Ose hena kuresa ko kuhamena vanavazinyetu ava vana kutura modorongo morwa epuro lyawo. KoRuha ronombudi kugwana ko hena nombudi dokukorangeda ngwendi yilimonena yezuvhiso lyokulikarera ntani yomurarero gwaHompa. Yilye ogu a rugana epaparo ntani ngapi omu ava wapaike nombudi edi?

 Womomberewa ezi azi gava nombudi ndi asi OPI yiwo ava rugana koRuha ronombudi. Depatemente ezi kwa kara komberewa zonene ntani kuruganena kumwe noKomitiye zovawapaiki zoMbungagendesi. Mberewa ezi azi gava nombudi kwa kara mo vanavazinyetu wokupitakana po-100, sinzi sawo valizambeli wokuruganena komambo, amo kwa hamena mo wokutjanga, wokupapara nombudi, wokufaneka ntani novatoroki. Vamwe kurugana mokupuragera vanamberewa wopaveta, wokosure ntani novanambudi. Nomberewa dokusika po-80 uzuni mudima kuruganena kumwe noPublic Information Desks ndi asi PID yipo va kwateseko womberewa ezi azi gava nombudi.

 Mberewa ezi azi gava nombudi kuruganena kumwe noPID yipo va wapaike mbudi ezi vana hara kupwagesa. Apa vanavazinyetu ava gwana esimwititi eli vana hara kupwagesa, awo kurugana epaparo nokugwana nombudi dokuhuguvara. Eyi kwa kwatera mo kurugana epuragero nowo va hamene mo. Konyima zokugwana maumbangi, awo kutjanga mauzera ogo noku ga tarurura ntani ku ga resurura nokutura mo mafano ntani nye nava ga tuma koKomitiye zovawapaiki yipo va gwane epulisiro kwawo.

 Ngapi omu vanavazinyetu ava lizuvhu kuhamena Ruha ronombudi? Munazinyetu gomukadi Cheryl gomoPhilippines kwa tanta asi: “Ame nkenye apa kwa hara kuresa nombudi dokuhamena mbunga zaJehova novanavazinyetu.”

 Varesi ava ava resa nombudi koRuha ronombudi va dimburura elisigo eli lyakara po konombudi edi da kara koRuha rwetu ronombudi ntani komaruha gonombudi gomouzuni. Tatiana ga tunga moKazakhstan kwa tanta asi: “Ame kuvhura kuhuguvara nombudi edi ani resa ko-jw.org. Ado usili.” Munazinyetu gomukadi Alma gomoMexico kwa tanta asi: “Ose kuzuvha nombudi donondona kombudi, nye nombudi edi da kara koRuha ronombudi kukorangeda sili.”

 Nombudi edi a tu gwana koRuha ronombudi kapi tupu a di korangeda, ado kupameka hena epuro lyetu. Bernard ogu ga tunga moKenya kwa tanta si: “Ruha ronombudi rwa vatera nge ni mone vanavazinyetu asi awo ekoro lyange yikare asi kupi va kara. Ame kuvhura kuvatumbura momakanderero gange komadina nokutumbura maudigu aga vana kuligwanekera nago. Munazinyetu gomukadi Bybron ogu ga kara moKenya kwa tanta asi: “Ame kuhafa nkenye apa ani mono mbudi koRuha ronombudi kuhamena Bibeli vana pwagesa meraka lyapeke! Nombudi odo kudiworokesa nge asi Jehova kapi ga paka mpongo.”

 Nampili nombudi dokuhamena vanavazinyetu vana kuhepeka kuvhura kutuvatera. Jackline ogu ga kara moKenya kwa tanta asi: “Ayo kunkondopeka epuro lyange apa ani gazadara kouradi ou va kara nawo. Ame nkenye apa kutara eyi ayi va vatere va lididimikire. Ame na dimburura omu ekanderero, kuresa Bibeli ndi kudimba ayi vatere vanavazinyetu va twikire kukara noulimburukwi.”

 Munazinyetu gomukadi Beatriz ogu ga kara moCosta Rica kupandura konombudi dokuhamena yimpagwa yopaunsitwe. Age kwa tanta asi: “Ruha ronombudi kuvatera nge ni mone omu mbunga zetu azi vatere neharo ntani usimbu vanavazinyetu. Oyo kuvatera nge ni yi pure asi yousili ezi nani kuna kara mbunga zaJehova.”

 Ayo kutuhafesa apa a tu gwana nombudi dokuhamena vanavazinyetu! Eyi kapi ayi vhuru ngano kutompoka pwa hana yigava youzuni mudima eyi omu gava kupitira kodonate.pr418.com. Mpandu koyigava eyi omu gava.