Nomusika kuna kara uhwi wokutunda kwaJehova. Ado kuvhura kukundama magazaro getu, nokutjindja omu tuna kulizuvha ntani nokutukorangeda. Eyi yiyo adi rugana nonsumo domoBroadcast. Nonsumo odo kuvhura di tu kundame momunene: ado kuvhura kutuhedesera pepi naJehova.

 Kutundilira 2014 ose kwa rugana nonsumo domoBroadcast dokusika po-70 ntani nonsumo odo kuvhura kudigwana momaraka gokupitakana po-500! Nye ove nampo kuna kulipura asi, ‘Yilye a rugana nonsumo odo ntani ngapi ava di rugana?’

 Vanavazinyetu ava ava rugana novidiyo ava ava ruganene kumwe noKomitiye zerongo zoMbungagendesi yiwo ava rugana nonsumo odo. Vanavazinyetu wokusika po-13 yiwo ava vatere mokuwapaika nokukwateka nonsumo. Komitiye zerongo za pulisira hena valizambeli wokuruganena komambo mouzuni mudima va vatere nosirugana esi. Vanavazinyetu ava kuruganesa udivi wawo mokuvatera nosirugana esi ntani awo kapi va hara kuvapa mfumwa kweyi ava rugana.

 Ngapi ava wapaike nonsumo domoBroadcast? Pomuhowo, Komitiye zerongo kuhorowora etjangwa omu siparatjangwa sorusumo nasi tunda ntani malizuvho aga nava tura mo. Kutunda opo, vanavazinyetu tava ru wapaike nokurutjanga ntani tava ru heteke kurudimba. Makura womoKomitiye zerongo tava ru purakene ntani nokugava ko magano apa nava hepa kutjindja. Ano konyima, kambunga kovanavazinyetu ava ava rugana nonsumo tava tura mo malitjindjo nokururugana hena. Nonsumo edi kudikwatekera komavango gokulisiga-siga, ngwendi konoBeteli nokomambo.

 Vanavazinyetu kuruganesa yininke yokulisiga-siga mokurugana nokukwateka nonsumo domoBroadcast. Apo hena kuhepa yiruganeso yokulisiga-siga eyi ava ruganesa mokukwateka rusumo. Embako limwe kuvhura kukosa nodola daAmerika 100 yitware konodola daAmerika 1 000. Mo-2020, ose kwa rende yiruganeso yokuruganesa nomusika eyi ya kosere nodola daAmerika dokusika 116 000.

 Yisinke atu rugana yipo tu dire kuruganesa yimaliva yoyinzi? Ose kuruganesa valizambeli wokuruganena komambo wovanzi, mevango lyokuninka vanavazinyetu wovanzi wokurugana nonsumo va kare moBeteli. Ntani mevango lyokuninka asi vanavazinyetu va wize pevango limwe noku ya rugana rusumo, vanavazinyetu kuruganesa elikwamo lyomokomputa mokurugana rusumo.

 Vanavazinyetu kwa hara kupurakena kononsumo domoBroadcast. Munazinyetu gomukadi Tara ogu ga tunga moGermany kwa tanta asi: “Nonsumo edi kuvatera nge apa ani kara noyinka. Apa ani di purakene meraka lyange, ame kulizuvha ngwendi Jehova kuna kulidingira nge.” Munazinyetu gomugara Dmitry ogu ga tunga momberewa zomoKazakhstan kwa tanta asi: “Apa ani purakene kononsumo detu, ame kapi ani kara nosinka asi ado kuvhura di ninkise nge ni rugane yininke yoyidona. Ado hena kuvatera nge ni demenene kweyi yopampepo.”

 Munazinyetu Delia ogu ga kara moSouth Africa kwa faturura omu a lizuvhu kuhamena nonsumo domoBroadcast asi: “Ado kunkondopeka epuro lyange. Apa ani guwu ndi apa ani li gwanekere nomaudigu, ame kupurakena korusumo oru rwa liza nomu na kulizuvha ndi oru rwa liza noukaro ou na kupita. Rorunzi, omu rusumo a ru zuvhika, kutjindja nge omu na kulizuvha!”

 Nonsumo dimwe domoBroadcast kwa di hara unene. Munazinyetu gomukadi Lerato gomoSouth Africa kwa tanta asi: “Rusumo ‘Uzuni woupe pepi’ ntani ‘Uzuni woupe ou ngau wiza’ kudiworokesa nge apa ngani ka tambura oyina mouzuni woupe. Nkenye apa ani purakene kononsumo odo, kuninkisa nge ni va mone momagano omu vana kuduka nokulidingira nge.”

 Rusuno rumwe romononsumo domoBroadcast kwa vaterere unene mudinkantu gumwe gomoSri Lanka. Age kwa tanta asi: “Murongi gwange ogu nga rongo nge sirongwa soscience, kwa uyungilire nge yininke yoyidona komeho zovakwetu, morwa yeeyi na kara mbangi. Ame kwa lizuvhire woma ntani kapi na divire eyi nani rugana. Apa na wizire kembo, oyina yipo va tanterere nge ni purakene korusumo ‘Study Makes You Strong.’’ Rusumo oro rwa vaterere nge ni dimburure asi na hepa kurugana epaparo nokuliwapaikira elimbururo. Ezuva lyokukwama ko yipo na ka uyungire nomurongi gwange. Age kwa purakenene nge ntani ga tanterere nge asi age ngesi ana kwata egano eyi twa pura. Tani pandura mbunga zaJehova kweyi za wapaika rusumo oro.”

 Kupi ayi tundu yimaliwa eyi atu ruganesa mokuwapaika nonsumo? Koyigava youzuni mudima eyi omu gava, eyi omu gava pokuruganesa nonkedi edi va tumbura kodonate jw.org. Mpandu koyigava eyi omu gava.