Novidiyo doposigongi somazuva gatatu kuguma nomutjima detu ntani kutuvatera tu kwate nawa egano eyi azi rongo Bibeli. Sigongi somazuva gatatu 2020 “Omu hafe nkenye apa”! kwa kara nonovidiyo 114, kukwatera mo yiuyungwa 43 va gava womoMbungagendesi ntani novavateli vawo. Wa lipura rumwe asi yimaliwa yokuhura kupi ayi piti mo ntani nelituromo mokurugana novidiyo odo ndi?

 Vanavazinyetu wokusika 900 mouzuni mudima kwa ruganesere siruwo sawo noudivi wawo yipo va vatere mokurugana novidiyo. Awo kwa ruganesere novili konyara dokusika 100 000 mosirugana esi sonomvhura mbali. Ayo kwa kwaterere mo novili 70 000 edi da hepere po mokumana sidanauka sonominute 76 somoBibeli Nehemiya: “Ehafo lyomwaJehova, yilyo nonkondo deni.”

 Yosili, mokumana sirugana esi kwa hepere po yimaliwa yoyinzi mokupakera mbili valizambeli owo ntani nokuvapa yikwamahina eyi va ruganesere noyikwakonentu noyiruganeso yimwe ntani nomavango omu va ruganenene.

 Jared Gossman, ogu a rugana konovidiyo kwa tanta asi: “Komitiye zerongo zoMbungagendesi kwa hara kuhamesera mo nompo nomavango gokulisiga-siga monovidiyo detu. Eyi kuyiruganena morwa vanavazinyetu kwa tundilira konomuhoko dokulisiga-siga mouzuni mudima ntani tuna hara kuyilikida monovidiyo. Mokuyisikisa mo eyi, twa hepere kutulisa po nombunga 24 moyirongo yokusika 11 di ruganene kumwe mosirugana esi. Ose twa hepere ewapaiko negendeso lyewa ntani noyimaliwa yoyinzi yipo nombunga odo di ruganene kumwe.”

 Mokuninka asi tu rugane novidiyo dononzi twa hepere yiruganeso yokulikarera ntani notuntau totunzi toyipirangi. Pasihonena, tuntau toyipirangi va ruganesere kosidanauka Nehemiya: “Ehafo lyomwaJehova, yilyo nonkondo deni” kwa tu tungilire mostudio zaMt. Ebo pepi naPatterson, New York, moU.S.A. Mokuruganesa nawa yigava posiruwo sooso sihorokwa si kare sousili sokuvyuka, vanavanzinyetu kwa tulire kumwe tuntau oto toyipirangi momaruha yipo tu moneke ngwendi makuma gaJerusarema zanare. Nkenye ruha kwa kere nonometa 6 monaure noku pombera ko ndombo yipo ru moneke ngwendi mamanya. Maruha ogo ngava ga rundurura-rundurura kuliza noyihorokwa, pokuruganesa tupu tuntau otu tuna lizi nosihorokwa. Nampili ngoso, mokurugana tuntau otu va hepere mosidanauka oso kwa ruganesere konyara nodola daAmerika dokusika $100 000. a

 Pokudiva mauzera gangesi kunkondopeka rupandu rwetu kosigongi somazuva gatatu somvhura ezi. Tuna kara nehuguvaro asi elituromo eli lya hamenene mo mokurugana novidiyo edi kututumangeda tu hamberere Jehova uzuni mudima. Mpandu sili konkareso zeni zokugava yigava kosirugana souzuni mudima kupitira ko-donate.pr418.com ntani mononkedi dimwe hena dapeke.