Nombangi daJehova kugwana nondya dononzi dopampepo kupitira moyikwakonentu. Nye moyirongo yimwe vanavazinyetu kapi ava vhuru kugwana intaneta. Vamwe kwa tunga monomukunda omu mwa pira intaneta ndi pamwe mozili nye kapi azi rugana nawa-nawa.

 Nampili ngoso vanavazinyetu ngesi kuvhura va kwateke yimbapiratjangwa pwahana intaneta. Yisinke nava ruganesa? sininke ava tumbura asi JW Box, kusigava konombungakriste edi da kara asi intaneta kapisi nawa-nawa. Mosininke oso vanavazinyetu woDepatemende soyikwakompuita kwa tura mo yimbapiratjangwa ntani nonovidiyo edi atu gwana ko jw.org. Nkenye sininke oso kukosa $75 U.S.

 KoSinyanga vanavazinyetu ku gwanekedesa ndi kukonecta yikwakonentu yawo kosininke oso yipo va kwateke yimbapiratjangwa nonovidiyo. Nampili yikwakonentu yawo yakurupa ndi kapisi yondiro, nawo kuvhura kugwanekesa ko. Nye ngapi nsene mbungakriste kapi za kara nointaneta, ngapi omu JW Box namu wiza yimbapiratjangwa yoyipe? Beteli ndi mberewa zomutayi nkenye apa kutuma USB ezi azi kosa $4 U.S omu va tura yimbapiratjangwa yoyipe yoko jw .org, eyi nava vhura kukwatekera moJW Box.

 Ngapi omu JW Box za vatera vanavazinyetu? Nathan Adruandra guhya ogu ga kara moKonga kwa tanta asi: “Ame kwa kondjere siruwo sosire mokukwateka yidanauka eyi ‘Jehova, ...moge yimo na huguvara’ ntani Gazareni mukada Roto. Nye kapi ya tompokere nge ntani kwa guvisire nge. Nye ngesi ame kuvhura kukwatekera yidanauka eyi mo foni zange, eyi kutuvatera ngovakurona tu ronge nawa vana vetu.”

 Munazinyetu ogu a vatere kutura yuma moJW Box moNigera kwa tanta asi: “Vanavazinyetu kutara JW Box asi uhwi wokutunda kwaJehova. Awo ngesi vana hafa morwa kuvhura va kwateke yimbapiratjangwa nonovidiyo edi atu ruganesa mokuzuvhisa.”

 JW Box yokusika 1 700 kwa yi tuma kovanavazinyetu moAfrika nomoCeania ntani moAmerika zokoMbindakano, ntani kuna kutura po mawapaiko yipo va vhure kuyituma konombungakriste hena dimwe. Kupi ayi tundu yimaliwa eyi ava futu koyininke eyi? Koyigava eyi ava gava youzuni mudima, sinzi sayo kuyigava kupitira kointaneta donate.pr418.com. Mpandu kougavi weni ntani nekwatesoko.