Movhura zompe a mo2022, vantu mouzuni kuna kutwikira kuhepa kouvera woKorona. Ngomu va yi faturura mosirongwa “Evatero mouzuni mudima poudigu wouvera woKorona,” ose kwa ruganesa mamiliyona gonodola b mokuvatera posiruwo souvera woKorona ntani kwa tulisa po noKomitiye 950 dokuvatera poyimpagwa.

 Nampili ngomu simpe pwa kara uvera woKorona, yimpagwa younsitwe neyi yokuretesa po vantu kwa kundama vanavazinyetu. Mokuvatera poyimpwagwa yokusika po-200 eyi ya horoka, Komitiye zokuvatera zoMbungagendesi kwa pulisilire va ruganese mamiliyona 8, yimaliva eyi kapi ya kwateremo yimaliva eyi va ruganesa mokuvatera nouvera woKorona. Tara omu yigava yoge ya vaterere ava ya kundamene yimpagwa.

 Mo-22 Kudumonkuru 2021, Volcano ezi za kara mondundu zaNyiragongo ezi za kara moKongo kwa tamekere kuhanuka. Volcano ozo kwa zonagwire mambo, nosure ntani nomema. Nye kapisi yooyo yelike va zonagwire. Volcano ezi kwa kundamene hena sitata saGoma ntani kwa ninkisire makankamo gevhu ga horoke. Hambara harufa zovantu ava va kara mositata oso kwa va gusire mo. Masere mayovi kwa tjwayukire, vamwe kwa tjwayukilire moRwanda.

 Vantu wokusika po-5 000 ava va gusire modoropa zina kwa kere nombangi. Vamwe kwa zumbanesere mambo gawo ano vamwe momambo gawo kwa veke mo apa va tjwayukire. Komitiye zokuvatera posiruwo soyimpagwa moRwanda ntani moKongo kwa vaterere vanavazinyetu owo. Kuhamena komitiye zimwe zokuvatera posiruwo soyimpagwa, Mberewa zomoKongo (Kinshasa) kwa tente asi: “Nampili ngomu mositata mwa kere mapiyagano ntani komeho va gave mpangera zokuvatera vantu mositata, Komitiye azo za tamekere nare kugavera nondya, mema, mararo ntani noyidwra.” Modoropa zimwe omu va pongere vanavazinyetu wokusika po- 2 000, Komitiye kwa dikire tenta nokugava yinkumatere ntani noku va fatwilira omu nava likunga kouvera woKorona ntani nezimo lyokusinsana.

 Momakwedi ntazimwe vanavazinyetu kwa geve notona ntazimwe doRoso, notona ntazimwe dousura, notona ntatu domagadi gomomberera ntani notona ntatu domema. Mokusesupika kuruganesa unene yimaliva, Mberewa kwa tulire po ewapaiko lyokuranda nondya momukunda googo sa horokerere simpagwa mevango lyoku di randa koyirongo ya peke.

 Munazinyetu gomukadi ogu embo lyendi lyazonaukire kwa tante asi: “Ose kwa guvire sili unene.” Nye konyima epata lyendi kwali pereyihepwa yawo yopanyama neyi yopampepo. Konyima age kwa ya tente asi: “Nevatero lyaJehova, ose tuna kara neyi tuna hepa. Ose twa yi limonene omu Jehova a tu vatere tu simbe nomudigo detu ntani nomu ga di tu rerupikira.”

 Yikwaeparu yomoVenezuela kwa gwa. Vanavazinyetu ava va tunga moVenezuela kapi va kara nomararo gomawa, nonondya dokugwanena po ntani ukorokotji kwa ligwederera. Nye mbunga zaJehova kapi za va sigilira.

 Momvhura za ka pita, kwa ruganesa yimaliva emiliyona 1.5 yipo va randere nondya vanavazinyetu. Mberewa zomoVenezuela kwa rapotere asi: “Ayo kapisi ureru ku twara nondya dokusika ponotona 130 nkenye kwedi, noku divilisa asi vanavazinyetu navenye womosirongo ava vana di hepa vana di gwana.” Mokuninka asi vanavazinyetu va gwane nondya dokudira kuzonauka, vanavazinyetu kutuma nondya dokudira kuzonauka usimbu. Mberewa kwa tanta hena asi: “Ose kuranda nondya dononzi dokulifana pamwe tupu mevango lyokuranda zimwe ntani ose kuranda nondya poyinema apa ava di zangura, nonkedi odo kutuvatera tu dire kuruganesa yimaliva yoyinzi.”

 Munazinyetu Leonel gomoVenezuela ogu a rugana moKomitiye zokuvatera poyiruwo yoyimpagwa kwa hara sirugana sendi. Age kwa tanta asi: “Sirugana sokuvatera mulyo. Sirugana esi sa nkondopeka nge kutunda apa mukadange ga dogorokere koKorona. Ame kulitura mo yipo ni vatere vanavazinyetu. Ame na limonene omu Jehova a sikisa mo etumbwidiro lyendi asi age kapi nga sigilira vakareli vendi.”

 Munazinyetu gomugara ogu va vaterere ogu nga rugana moKomitiye zokuvatera nomvhura da ka pita, kwa tanta asi: “Ngesi nyame nina hepa evatero. Ose kapi tupu twa gwene yihepwa yopanyama, vanavazinyetu kwa vatererere nge name namukadange tu kare tuna litura. Awo kwa tu pakerere mbili nokutuhengagwida.”

 Yimpagwa yimwe kuhoroka hararasi. Nye mbunga zaJehova simpe kuvatera usimbu, mpandu ko yigava youzuni mudima eyi omu gava. Nonkedi dimwe omu no gava yigava kwa di faturura koruha donate. jw.org. Mpandu koyigava eyi omu gava.