Bibeli za pumba asi pomazuva aga tuna kuparuka ngapa kara yita, makankamo gevhu, mauvera gomukagu ntani “mamoneko gokutjilisa.” (Rukasa 21:10, 11) Nonkango odo kuna kusikilira mo nampili momvhura zompe zo 2022 zoNombangi daJehova. a Pasihonena, yita yomoUkraine simpe kwa kutwikira, yita oyo kuna kukundama mamiliyona govantu momudona. Ntani sinzi sovantu simpe kuna kuhepa morwa uvera woKorona. Ntani hena, vantu wovanzi kwa va kundama yimpagwa younsitwe ngwendi ekankamo lyevhu eli lya kere moHaiti ntani ekundungu eli lyakere moCentral America, Philippines ntani mosoutheastern Africa. Ngapi omu Nombangi daJehova da vaterere ava va ligwanekerere noyimpagwa?

 Momvhura zetu zo-2022, mbunga zetu kwa vaterere ava ya kundamene yimpagwa yokusika po-200! Ose kwa ruganesa yimaliwa yokusika po mamiliyona 12. b Tara omu twa ruganesere yigava mokuvatera ava ya kundama yimpagwa.

 Mo-14 Siwogedi 2021, ekankamo lyevhu lyokusika po 7.2 kwa horokere kombindakano zaHaiti. Vanavazinyetu wovagara vavali ntani namunazinyetu gomukadi gumwe kwa fire. Ava va parukire va hepere kulididimikira yitundwamo eyi lyaretere ekankamo lyevhu. Munazinyetu gomugara Stephane kwa tanta asi: “Vantu vanzi va fire mositata ntani vantu ngava horeke nkenye sivike kupitakana makwedi gavali.” Munazinyetu gomugara Éliézer kwa tanta asi: “Sinzi soNombangi kapi va kere nomambo, yikoverero, nonkaku ntani noyihepwa yimwe. Awo kwa kere nowoma.”

 Mbunga zetu kwa rugene ko yuma usimbu yipo zi vatere. Mberewa zomoHaiti kwa geve notona 53 donondya ntani kwa geve hena notende, tarpalinu, matarase nonosola dokutjatjesa nofunguna. Momvhura zetu zo-2022, mambo gokupitakana po 100 kwa ga tungire, ano gamwe kwa ga wapukwilire. Yimaliwa yokupitakana pemiliyona limwe kwa yi ruganesere mokuvatera mosimpagwa esi.

 Eyi ya veterere vanavazinyetu. Lorette kwa tente asi: “Ekankamo lyevhu kwa zonagwire embo lyetu nongesefa zetu. Kapi twa kere nonondya, nye mbunga zaJehova za tu pere nayinye eyi twa hepere.” Micheline kwa tanta asi: “Ekankamo lyevhu kwa zonagwire embo lyetu omu twa kere name novana vange vavali wovagara. Kapi na divire asi yisinke nani rugana, ame kwa kanderere ano Jehova ga limbwilire ekanderero lyange kupitira mombunga zendi. Ose ngesi twa kara nonzugo zokurara. Ame nina tokomene kurugana nkenye eyi nani vhura yipo ni likide rupandu kwaJehova.”

 Vemepangero va dimbwilire yirugana yetu. Mugendesi gohall zomositata saL’Asile kwa tente asi: “Tatu mu pandura kweyi mwa rugene ko usimbu mokuvatera. Tatu mu pandura kweyi mwa likidire efumadeko kepangero. Ame na hafa mokudiva asi one kuna tokomene mokuvatera wopeke nye kapisi mokugwana yimaliwa. One mwa yi likida asi mwa kara neharo.”

 Mo-24 Murongagona 2022, ekundungu lyedina Ana kwa kundamene Mozambique ntani Malawi. Eyi kwa retesere po mvhura zonene ntani nompepo zonene zokusika posinano sonokilometa 100 movili ndi asi 100km/h (62 mph). Ayo kwa zonagwire marutjeno, nontopa ntani kwa retesere po ruhanzo rorunene.

 Vanavazinyetu wokusika po 30 000 womoMalawi ntani Mozambique kwava kundamene. Munazinyetu Charles ogu a vatere moyimpagwa kwa tente asi: “Ayo kwa guvisire nge unene apa na mwene omu vanavazinyetu vana kuhepa ntani noyininke yawo eyi va zumbanesere.” Nondya dawo ntani noyininke eyi va kunine kwa zonaukire po. Sinzi sawo kwa zumbanesere mambo gawo. Munazinyetu gomugara kwa zumbanesere mukadendi ntani vana vendi vavali wovakadona apa wato ou va rondere, ou wa rondekere vantu mokuvapopera koruhanzo rwa gadumukire nokuliswika.

 Alyo kwa kere ekundungu lyenene. Povili zo 1:00 ngurangura moNchalo, Malawi, epata lyaSengeredo kwa zuvhire mema omu gana kupupa. Nomukuro mbali kwa hanzerere. Munazinyetu Sengeredo yipo ga tokwere asi va hepa kutunda mo monzugo. Alyo kwa kere etokoro lyewa morwa konyima nzugo za ya zungurukire. Yininke yawo kwa yi zonagwire, ano yimwe kwa pupire nomema. Konyima yipo va tokwere ku za koSinyanga soUhompa, sinano sokutunda pembo lyawo o ze kosinyanga kugenda po nominute 30 nye posiruwo esi kwa gendere po novili mbali. Awo kwa ka sikire vana roroka.

 Mberewa zaMalawi ntani zaMozambique kwa tamekere kugava evatero. Awo kwa tantere vatareli wonombunga novakuronambunga va tare eyi vana hepa vanavazinyetu ntani noku va pa nondya dopampepo noku va korangeda. Awo kwa tulisire po nokomiti dokuvatera moyimpagwa (DRC) yipo va vatere vanavazinyetu. Nokomiti edi kwa tamekere kugava nondya ntani noyininke yokulisiga-siga. Yimaliwa yokupitakana po $33 000 kwa yi ruganesere mokuvatera vantu, ano yimaliwa yokupitakana po $300 000 kwa yi ruganasere mokutungurura nokutunga mambo.

 Vanavazinyetu ava va hamenene mokomitiye zoDRC kwa ruganesere nawa yimaliwa, morwa yininke kwa rondere. Pasihonena, momakwedi ntambali gokuhova apa va rugene sirugana sokuvatera, mukoso gousura moMalawi kwa rondere nonoperesenda 70. Maholi nago kwa rondere. Mokudira kuruganesa yimaliwa yoyinzi, vanavazinyetu kwa rende nondya momukunda ntani kwa di rende dononzi kumwe. Ano oyo ya va ninkisire va va pe discount ntani ya va vaterere va dire kuruganesa maholi gomanzi.

 Evatero olyo lya gumine vantu vaJehova. Munazinyetu gomugara Felisberto gomoMozambique kwa tente asi: “Kapi na mona rumwe mbunga ezi za gava: yininke yokutungisa, maugendero, vantu wokutunga, nondya ntani nomapukururo gomawa. Sirugana esi kwa likidire eharo lyosiumbya eli ga tente Jesus mwaJohanesa 13:34.” Munazinyetu Ester gomufisayendi ogu ga tunda moMalawi ogu embo lyendi lya zonaukire kwa tanta asi: “Ame kwa kere nosinka sosinene morwa kapi na kere noyimaliwa yokudikisa nzugo za peke. Nye apa vanavazinyetu va wizire noku dikira nge nzugo za peke, ame kwa lizuvhire ngwendi moParadisa nina kara nare.”

 Ngatu li gwanekera noyimpagwa yoyinzi ngomu tuna kuhedera pepi nouzuni woupe. (Mateusa 24:7, 8) Nye mpandu sili zonene kougavi weni, ose twa kara nawa-nawa nehuguvaro asi vantu vaJehova ngava gwana nayinye eyi vana hepa. Nonkedi omu no gava yigava kwa di faturura ko donate.pr418.com. Mpandu kougavi weni.