MwaMurongagona 2021, Mbungagendesi kwa divisire siruganeso sosipe sokurongesa, Hafera eparu narunye! a Ngapi wa lizuvhire apa wa zuvhire ediviso olyo? Matthew gomoKanada kwa tanta asi: “Ame kwa hefe! Nye ame kwa hefe unene apa va geve siuyungwa nonovidiyo edi da fatwilire eyi va tokwerere kuruganesa siruganeso sosipe mokuronga ntani omu va si hetekere kusiruganesa. Ame kwa si ndindilire nononkondo kusiruganesa.”

 Monkedi omu natu ruganesa buke Hafera eparu narunye! za lisiga. Olyo kapisi yilyo tupu elisigo lya kara po pokatji kosiruganeso esi ntani nobuke ezi ngatu ruganesa nare. Nsene o ruganesa buke Hafera eparu narunye zokunduruka no dimburura asi pwa kara malisigo. Moku yi kwata egano eyi, tu tareni omu va zi wapaika.

 Mapepa manzi. Morwasinke? Mobuke Hafera eparu narunye! kwa kara mo mafano gomawa gokusika po 600 hambara ku yi vhukisa yikando murongo nsene tu zi hetakanesa nobuke erongo lyoBibeli! Buke ezi zompe hena za kara nomavega aga va dira kutjanga ndi kufaneka yuma. Ano eyi kwa reta maudigu: Kuvhura o mone efano lyakara pepenuno lyokukwamako. Mokunyokera po oyo yi dire kuhoroka, vanavazinyetu womoDepatemende zokunduruka ndi asi IPD moWallkill, New York, Amerika, kwa hetekere mapepa gane gokulisiga-siga, aga twa kuruganesa ngesi menduruko. Komitiye zokutjanga zombungagendesi kwa tarwilire nkenye epepa nokuhorowora po sipepa simwe esi sa dilire kumonekesa unene. Nampili ngomu yipepa eyi ya kosere noperesenta 16 kupitakana yipepa eyi atu ruganesa moyimbapiratjangwa yetu, ayo kuvatera varongwa va rese nkenye epenuno lyobuke Hafera eparu narunye! va hana kuvadonganesa efano lina kara pepenuno ekwawo.

 Kontunda zobuke kumoneka nawa. Ntunda zobuke ezi, za lisiga nonontunda donobuke detu edi twa pwagesa, morwa za lisiga omu va zi rugana. Awo kwa ruganesa ntunda zokudira kuvembera, ano oyo kuninkisa mafano gopontunda ga moneke nawa. Ntunda ozo hena kuvatera buke zi dire kukurupa usimbu kontunda. Nye ntunda zokufana ngoso, ndiro unene kupitakana ntunda zokuvembera. Nomberewa dokulisiga-siga kwa ruganenene kumwe mokuhorowora ntunda ezi nazi dira kupura yimaliva yoyinzi.

 Morwasinke va ruganeserere yininke eyi ya kosere yimaliva yoyinzi? Munazinyetu ogu a rugana moDepatemende zokunduruka ndi asi IPD kwa faturura asi: “Morwa buke ezi ngava zi ruganesa unene, yipo nye ose kwa here zi moneke nawa nampili ngomu vana ku zi ruganesa unene.” Eduardo ogu a rugana momberewa zokunduruka moBrazil kwa tanta asi: “Tatu pandura kombunga zaJehova ezi za ruganesa yiruganeso yoyiwa mokuninka buke ezi zi moneke nawa ntani pokuruganesa nawa yigava.”

 Ose kwa tamekere kunduruka buke Hafera eparu narunye! mwaNsinano 2021. Opo azo Korona za tameke nare, ano eyi kwa tu reterere maudigu. Morwa noBeteli kwa kere mesiliko, vanavazinyetu woponze kapi va vhulire kutuvatera ntani kapi va tambwire vaBeteli wovape. Ano oyo ya ninkisire mahina gamwe ga dire kugaruganesa morwa kwato vantu ntani gamwe kwa ga pete morwa veta zepangero.

 Ngapi va fundire po maudigu ogo? Apa enduruko lya tamekere, vanavazinyetu womonodepatemende da peke kwa va pulire va ya vatere. Joel ogu a rugana moIPD kwa tanta asi: “Elizambero lyawo ntani neharo lyawo lyokulironga sirugana sosipe ya vaterere sirugana sipwe.

 Nampili ngomu twa gwanekerere nomaudigu ogo, ose ngesi twa nduruka mamiliyona getoroko lyobuke Hafera eparu narunye! Moku zi nduruka pwa hepere yiruganeso yoyinzi, kukwateramo mahina, mapepa, inka noraima. Momakwedi tupu gatano gokunduruka, koyiruganeso tupu, ose kwa ruganesere yimaliva yokusika po mamiliyona 2.3 gonodola daAmerika. Mokudira kuruganesa yimaliva yoyinzi, ose kwa nduruka sivaro sonobuke edi va hepa womombungakriste.

 Ngapi omu ava lizuvhu varongwa novarongi kosiruganeso esi sosipe? Munazinyetu Paul gomoAustralia kwa tanta asi: “Hafera eparu narunye! kuna kara sirugana sosiwa kuruganesa ntani ame kuhafera kusiruganesa. Buke kumoneka nawa. Azo za kara nomauzera gomawa, mapuro gomawa, novidiyo, mafano, tukende ntani noyitambo eyi na litulira po murongwa. Aso siruganeso sosiwa esi asi tumangeda nge ni rugane elirongo lyoBibeli.”

 Murongwa gobibeli ga tunga moAmerika kwa tanta asi: “Ame na zi hara ezi buke. Mafano kuvatera nge ni kwate egano sitwa esi vana hara kunkondopeka. Novidiyo kuguma mutjima ntani kuvaterra nge ni rugane ko yuma.” Murongwa ogu kulironga Bibeli yikando yivali mosivike ntani kuza komapongo nkenye apa.

 Mamiliyona gobuke Hafera eparu narunye! simpe kuna kundindira va ga nduruke. Mbungagendesi za pulisira kunduruka buke ezi momaraka 710 kupitakana yikando 340 eyi va pulisilire buke Erongo lyoBibeli!

 Kupi atu gwana yimaliva eyi atu ruganesa mokunduruka? Pokugava yigava youzuni mudima, eyi ava gava kupitira ko donate.pr418.com. Tatu mu pandura kougavi weni, yigava yeni kuvatera tu pwagese yiruganeso eyi nayi vatera owo vana hara kulironga kuhamena Jehova ntani va “hafere eparu narunye.”—Episarome 22:26.