Jehova Karunga kuna hara vantu navenye, va lironge kumuhamena ntani nokulironga kuhamena Uhompa wendi wemeguru, yikare asi ukaro wawo musinke va kara nawo. (1 Timoteusa 2:3, 4) Oyo yiyo Nombangi daJehova adi ruganene noBibeli noyimbapiratjangwa yimwe momaraka gokulisiga-siga, kukwatera mo rupurupuru. Mbunga zetu za rugana yimbapiratjangwa yoyinzi morupurupuru, morupe ronovidiyo, a eyi ya kara momaraka gokupitakana po 100! Ngapi a tu rugana yimbapiratjangwa eyi ntani ngapi a tu yi gavere? Marunduruko musinke twa tura po?

 Yimbapiratjangwa yorupurupuru kuyitoroka vatoroki mouzuni mudima. Vatoroki kutarurura pomuhowo simbapiratjangwa oso vana hara kutoroka. Makura tava tara asi ngapi omu nava si toroka morupurupuru. Nsene va mana, makura tava si toroka morupe rovidiyo. Ngesi tu mbunga 60 tovatoroki kurugana nkenye ezuva yimbapiratjangwa morupurupuru, ano tumbunga 40 kutoroka mazuva gamwe.

 Nare kwa kere ndiro kurugana novidiyo dorupurupuru. Mafano noyiruganeso yimwe nare kwa kere ndiro unene. Ntani novidiyo ngava di kwatekere monostudiyo, yipo nye, ose twa hepere kudika nostudiyo ndi kuwapukurura makuma gamwe yipo tu ga ruganese. Ayo nga yi kosa yimaliva yokusika ponodola $30 000 b mokuwapaika kambunga ketoroko kamwe korupurupuru.

 Mokuninka asi tu dire kuruganesa yimaliva yoyinzi, mbunga zetu kwa papara nonkedi omu natu rerupika etoroko. Ose kwa ruganesa yiruganeso yoyiwa nye yombiliha. Mevango lyokuruganena mostudiyo, vatoroki kuvhura kuruganesa screen zoruvara rosinamahako oru ava tumbura asi green screen yipo va kwateke novidiyo monomberewa omu ava ruganene. Nsene asi pwa hepa vatoroki wovanzi mokutoroka simbapiratjangwa, kapisi hepero va ze kostudiyo va ka va kwateke, vanavazinyetu kuvhura kukwateka turuha twawo kembo ndi monomberewa dawo.

 Ose kwa rugana hena noSoftware edi adi vatere vatoroki. Ano oyo ya vatera vatoroki va toroke simbapiratjangwa monovili dononsesu tupu. Vanavazinyetu kupandura komawapukururo aga. Munazinyetu Alexander kwa tanta asi: “Novidiyo dorupurupuru kwa kudipwagesa nosiruwo. Ayo kuhafesa nge. Ame ku di tarera nkenye ezuva.”

 Ngesi, ayo kuvhura tupu kukosa nodola 5 000 mokuwapaika kambunga kamwe kovatoroki worupurupuru. Ngoyitundwamo, ose kutoroka novidiyo dorupurupuru momaraka gomanzi.

 Nsene vana mana kutoroka simbapiratjangwa morupurupuru, novidiyo odo ku di tuma kwava vana di hepa. Nare ngatu rugana yikasete nonoDVD, ano oyo kwa kere ndiro, ngayi gusa siruwo ntani kuhepa yirugana yoyinzi. Ntani ngava yi tumu konokampani dapeke. Konyima ntani nye yikasete nonoDVD na va di tuma konombungakriste. Mo-2013 ose kwa ruganesere yimaliwa yokusika ponodola 2 000 000 mokurugana noDVD dorupurupuru.

 Yipurupuru ngayi hafere novidiyo odo. Nye yikasete nonoDVD kapi ya kere ureru ku yi ruganesa ngamoomu ya tamekere kuligwederera. Momaukaro gamwe, pwa hepere noDVD dononzi mokurugana buke zimwe zomoBibeli. Munazinyetu gomugara Gilnei gomoBrazil kwa tanta asi: “Nkenye apa ngatu hara kuresa etjangwa lyongandi, ntudi twa hepa kupapara kasete nokupapara etjangwa olyo. Ayo ngayi tu digopere.” Munazinyetu gomukadi Rafayane ogu ga ruganesa noDVD dorupurupuru kwa tanta asi: “Ngayi digopere nge kurugana elirongo lyanyamwange. Ngayi gusa siruwo sosire mokupapara etjangwa nomauzera.” Ano apa vanavazinyetu ngava zi mokuzuvhisa va hepere kusimba yikasete nonoDVD eyi ngava ruganesa va likida ogu ana likida elituromo pokuruganesa TV zendi. Ano vanavazinyetu vamwe ngava zi nonoDVD players dawo. Nare, pwa kere noDVD players edi da kere noscreen, ano sinzi sovanavazinyetu yido ngava ruganesa. Bobby gomoAmerika kwa tanta asi: “Nsene ko likida etjangwa limwe makura o hara kulikida etjangwa lyapeke ntudi wa hepa kuruganesa DVD za peke. Eyi ngayi gusa siruwo ntani ngayi tu digopere kuzuvhisira vantu.”

 Mo-2013, Nombangi daJehova kwa pwagesere JW Library Sign Language app, azo kuvatera vanavazinyetu va kwateke ndi va dane novidiyo domorupurupuru konofunguna dawo. Pomuhowo koapp ozo kwa kere ko tupu rupurupuru romoAmerika. Makura mo-2017 yipo va zi wapukwilire zi kwateke nomaraka gorupurupuru gapeke. Vanavazinyetu mouzuni mudima kwa hefe. Munazinyetu gomugara Juscelino ogu ga tunga moBrazil kwa tanta asi: “Kapi na yi pulire! Ame kwa gazadarere ko omu Mbungagendesi a zi likida eharo kwetu ose yipurupuru ntani awo va tu harere nose tu ture po ezokomeho lyopampepo ngwendi vantu navenye. Ame kwa hefe ntani app ozo kwa korangedere nge ni lironge Bibeli unene.”

 Neina ose kurugana novidiyo dorupurupuru noku di tura ko JW Library Sign Language app. Ngoyitundwamo, yimbapiratjangwa yorupurupuru kuvhura ku yi toroka nokuyikwateka ntani kuyihanesa ndi kuyigavera momazuva gongandi. Momaraka gomanzi gorupurupuru, yimbapiratjangwa yawo kuyipwagesa siruwo sokulifana nesi ava pwagesa yimbapiratjangwa yomaraka aga ava uyunga.

 Tareni eyi va uyunga ko vanavazinyetu worupurupuru. Munazinyetu gomukadi Klízia kwa tanta asi: “Mbunga musinke azi pakere mbili yipurupuru ezi azi gava mauzera aga naga tu vatera tu nkondopeke epuro lyetu monkedi zoureru? Kwato oku noyihetakanesa mouzuni eyi azi tu ruganene mbunga zaJehova.” Vladimir kwa tanta asi: “Novidiyo edi atu gwana kulikida asi Jehova kutupakera nose mbili ngamoomu a pakere mbili vantu ava ava uyunga.”

 Kehagero lyonovidiyo dorupurupuru kuuyunga asi: “Simbapiratjangwa esi kwa si wapaika si kare ruha rwerongo lyoBibeli lyomouzuni mudima nevatero lyoyigava yokutunda komutjima.” Mpandu koyigava yeni, eyi omu gava kupitira ko donate.pr418.com. Yigava oyo kutuvatera tu rugane noBibeli ntani noyiruganeso eyi atu ruganesa mokuronga vantu navenye kukwatera mo veraka lyorupurupuru.