MwaPembankuru ntani mwaSiwogedi 2020, kuna kara sikando sokuhova mouzuni mudima vanavazinyetu ngava tarera sigongi somazuva gatatu posiruwo simwe tupu. Mokututompoka eyi, yiuyungwa va hepere kuyikwateka momaraka gokupitakana 500. Narunye, ayo kugusa mvhura ndi kupikakana opo mokuwapaika sirugana esi, nokukwateka novidiyo ntani kutoroka yiuyungwa. Morwa ukaro ou wouvera wocoronavirus, vatoroki va hepere kumana kutokora momakwedi gane tupu sigongi somazuva gatatu 2020 “Omu hafe nkenye apa”!

 Ava va hamena moyirugana yetoroko neyi yokurandanga va kara koMberewa zononene zoNombangi daJehova nawo kwa vaterere mosirugana esi. Womoyirugana yetoroko va dimbwillire asi sinzi sovatoroki mokuvatompoka mosirugana esi va hepa yikwamambako yokupwagesa nawa ezwi. Ano ava va hamena moyirugana yokurandanga yipo va rende yikwamambako yokusika 1 000 ntani nokuyituma komavango gokusika 200.

 Mokudira kuhepeka yimaliwa, ava ava rugana kokurandanga kwa rende yikwamambako yoyinzi nokuyituma kovatoroki mouzuni mudima. Morwa kuranda yikwamambako yoyinzi posikando simwe tupu, eyi kwa ninkisire va va gusire ko komukoso gwankenye embako, makura yipo va yi rende kombiliha.

 Womoyirugana yokurandanga kwa rende yininke oyo nokutura po mawapaiko gokuyituma mokwedi kwaKudumogona noku kwaKudumonkuru 2020, posiruwo esi da pete sinzi sonongesefa morwa uvera wocoronavirus. Nampili ngoso, kehagero lyaKudumonkuru sinzi sonomberewa detoroko nonobeteli ntani nokomavango gamwe ava ruganene etoroko va gwene yikwamambako oyo.

 Jay Swinney, mutareli gweyi yokurandanga kwa tanta asi: “Nodepartemende doBeteli nonongesefa edi da hamenene mo kwa ruganenene kumwe mosirugana esi. Nevatero lyompepo zaJehova, ayo ya tu tompokere kurugana sirugana esi usimbu-simbu ntani nokuruganesa nawa yigava mokuvatera vanavazinyetu.”

 Nicholas Ahladis, ogu a rugana moyirugana yetoroko kwa tanta asi: “Vatoroki kapi va va pulisilire va rugane kumwe, makura apa va gwene yikwamambako oyo ayo kwava korangedere. Nye nampili ngoso, awo ya va tompokere mokutoroka nokukwateka yiuyungwa noyidanauka ntani nononsumo momaraka gokupitakana 500.”

 Yikwamambako oyo yiyo ya tu vatera unene yipo sigongi esi somazuva gatatu 2020 “Omu hafe nkenye apa”! si sike mouta wa kora. Nkareso zeni zokugava yigava kupitira donate.pr418.com ntani nayimwe ngoso yiyo ya tu ninkisa yi tu tompoke kuranda yikwamambako oyo.