VANGARARENI!
Eyi no karera nehuguvaro mo-2023—Eyi azi uyunga ko Bibeli?
Ose kuna kundindira nomapata getu, yi tu horokere yininke yoyiwa mo-2023. Morwasinke natu karera nehuguvaro?
Bibeli kugava ehuguvaro
Bibeli kuuyunga asi maudigu aga tuna kuligwanekera nago ngesi, gopokaruwogona tupu ntani ntaantani ngava ka ga guse po. Nayinye eyi va tjanga moBibeli “kwa yi tjangera yipo yi tu ronge ntani ose twa kara nehuguvaro morwa Matjangwa kutunkondopeka noku tu vatera tu lididimike.”—Varoma 15:4.
Mokudiva ko yoyinzi eyi za tumbwidira Bibeli, resa sirongwa “Ehuguvaro lyewa lyokomeho.”
Ehuguvaro eli nali kuvatera ngesi
Ehuguvaro lyomoBibeli kuvhura li kare ngwendi “sisikameso separu lyetu.” (Vahebeli 6:19, nonkango dokonhi) Ehuguvaro olyo kuvhura li tu vatere tu lididimikire maudigu aga tuna kuligwanekera nago ngesi noku kara nomutaro gomuwa keparu ntani noku kara noruhafo. Pasihonena:
Tara omu ehuguvaro lyomoBibeli lya vaterere mugara ogu nga nu unene marovhu. Tarera vidiyo Mparukiso zange kapi ngazi hafesa nge.
Tara omu ehuguvaro lyomoBibeli na li tu vatera nsene tuna fisa. Tarera vidiyo Ehuguvaro kwava va fisa.
Nkondopeka ehuguvaro lyoge
Sinzi sovantu kundindira yininke yoyiwa yi va horokere nye kapi va diva nawa-nawa nsene kuvhura nga yi horoke. Nye eyi za tumbwidira Bibeli ya li siga. Morwasinke? Morwa eyi za tumbwidira Bibeli kwa tunda kwaKarunga Jehova a “ogu a dili kutanta yimpempa.” (Titusa 1:2) Jehova gelike ga kara nononkondo dokurugana eyi ga tumbwidira, “age kurugana nkenye eyi ana seya.”—Episarome 135:5, 6.
Twa hara o gwanene mo mauwa momatumbwidiro goBibeli. Ove kuvhura o nkondopeke ehuguvaro lyoge momatumbwidiro ogo poku “konakona Matjangwa.” (Yirugana 17:11) Heteka elirongo lyetu lyoBibeli lyomawoko-woko. Tameka 2023, poku tunga po ehuguvaro kuhamena meho!
a Jehova kuna kara edina lyaKarunga.—Episarome 83:18, NW.