VANGARARENI!
Maroyango goposure—Yisinke za uyunga ko Bibeli?
Mo 24 Kudumonkuru 2022 sihorokwa sosidona ka si horokere modoropagona Uvalde, Texas, moAmerika. Kuliza noThe New York Times “mugara ka royere nokudipaga vanona 19 novarongi vavali posure zaRobb Elementary.”
Yihorokwa oyo kuhorauka. Mosaitunga zedina USA Today kwa rapota neina asi “yikando 249 ya horoka mvhura za ka pita, kupitakana nomvhura nadinye kutundilira mo-1970.”
Morwasinke yininke yokufana ngesi a yi horokere? Ngapi natu lididimikira yininke yokufana ngesi? Nyanya ngazi ha ga po ndi? Bibeli za gava malimbururo.
Morwasinke nyanya zina kuvhukira mouzuni?
Bibeli za faturura siruwo esi twa kuparuka asi “mazuva gopouhura” siruwo apa vantu ngava dira ‘kukara neharo’ ntani “ngava kara wonyanya.” Awo ngava rugana yininke yonyanya. Ano vantu owo va kara nonkareso ozo “udona wawo ngau pitakanena.” (2 Timoteusa 3:1-5, 13) Mokulironga ko yoyinzi, resa sirongwa “Bibeli za pumba omu vantu ngava kara neina ndi?”
Sinzi sovantu kulipura asi ‘Morwasinke Karunga a dilire kukandana po yininke yoyidona?’ Mokugwana eyi za uyunga ko Bibeli, resa sirongwa “Morwasinke yininke yoyidona ayi horokerere vantu wovawa?” moRuhingilisa
Ngapi natu lididimikira yininke yokufana ngesi?
“Yininke nayinye eyi va tjenge nare, kwa yi tjangera yipo yi tu ronge . . . morwa Matjangwa kutunkondopeka noku tu vatera tu lididimike.”—Varoma 15:4.
Nompango domoBibeli kuvhura di kuvatere o lididimikire. Komauzera gomanzi, tara Awake! zosiparatjangwa “Nyanya ngazi haga po ndi?” moRuhingilisa.
Komauzera gamwe omu vakondi nava vatera vana vawo va lididimikire nombudi donondona edi va kurapota kombudi, resa sirongwa “Nombudi donondona ntani vana woge” moRuhingilisa.
Nyanya ngazi ha ga po ndi?
“Age kuvayoworora mompatakani nomomahepeko.”—Mapisarome 72:14.
“Nomfuro dawo ngava di hambura yipururu ano magonga gawo matemo. Nomuhoko narumwe si hena kuza koyita, narumwe si hena kuliwapaikira yita.” —Mika 4:3.
Karunga nga rugana eyi ava dili kuvhura kurugana vantu. Epangero lyendi lyemeguru ngali ya zonagura po yirwiso nayinye ntani noku ya hagekesa po nyanya. Mokudiva ko yoyinzi eyi uhompa waKarunga ngau ya sikisa mo, resa sirongwa “Mouhompa waKarunga ‘Mpora ngazi kara mo.’”
