VANGARARENI!
Morwasinke maupolitika aga gawinine vantu—Eyi azi uyunga ko Bibeli?
Mouzuni mudima nomuhoko dononzi kuna kuligaunuka morwa maupolitika. Kuliza nepaparo eli ava tambura asi Pew Research Center survey eli va rugene mo-2022, “noperesenta 65 dovakondi moyirongo 19 kwa uyunga asi mwa kara malipatano gomanene mosirongo sawo pokatji kovantu ava ava kwatesa ko nombungapolitika dokulisiga-siga.”
Wa yinongonona asi mosirongo esi wa kara vantu kwa ligaunuka morwa maupolitika ndi? Mowasinke ayi horokere? Pa kara ekohonono ndi? Tara eyi za uyunga ko Bibeli.
Nonkareso edi adi retesa po maligaunuko
Bibeli kwa pumbire asi momazuva getu ndi asi “pomazuva gopouhura,” vantu wovanzi ngava kara nonkareso ezi ngazi va digopera mokukara mouumwe.
“Pomazuva gopouhura, ngapa kara yiruwo yoyidigu. Yeeyi vantu ngava lihara tupu vene, . . . kapi ngava lizuvha novakwawo.”—2 Timoteusa 3:1-3.
Nampili ngomu vantu wovanzi ava rugana unene mokuninka mapangero yi ga tompeke, eyi kapi ya sika mo. Vantu ava va kara nomagano gokurwanesa kuvadipogera kuruganena kumwe yipo va kohonone po maudigu. Yitundwamo eyi kulikida eyi za uyungire ko Bibeli nare.
“Mouzuni omu mwa kara vanankondo ava ava hepekere mo vakwaawo.”—Muudisi 8:9.
Nye nampili ngoso, Bibeli kwa likida omu ngayi vhura kukatompoka, apa epangero eli ngaka pitisira gumwe ngali ga gusa po maudigu aga aga ninkisa vantu va hepe.
Mupitisili gokusikilira mo ogu a pakere mbili vantu
Bibeli kwa faturura mupitisili ogu ga kara nononkondo dokuvhura kugusa po maudigu aga: Jesus Kristusa. Jesus kwa kara nononkondo noupangeli ntani neharo lyokureta uumwe nombili kovantu navenye.
“Uhungami ngano tau lihana posiruwo sendi, mpora ngazi kare ko.”—Episarome 72:7.
“Nomuhoko nadinye ngadi mu karera.”—Episarome 72:11.
Jesus kuna kara mupitisili gomuwa morwa age kupakera mbili nokuvatera vantu, unene po ava va tekura momudona.
“Age kuyoworora vahepwe ava ava mu kugu, nomapongo aga va zumbilira. Age kuretera nkenda varupiranonkondo novahepwe; age kuparura nomwenyo dava vana kara moruhepo. Age kuvayoworora mompatakani nomomahepeko.”—Episarome 72:12-14.
Lironga ko yoyinzi kuhamena Uhompa waKarunga, epangero lyemeguru eli nga pitisira Jesus. Lironga ko yoyinzi omu no gwanena mo mauwa ntani omu no kwatesa ko upangeli wendi.
Tarera vidiyo Yisinke Uhompa waKarunga?
Resa sirongwa “Uhompa waKarunga—Epangero lya hana ufuki.”