Uzuni kuna kuhaga po ndi? Ezonauko musinke lyokulikarera za pumba Bibeli?
Yisinke a yi wiza momagano goge apa o zuvhu nkango “ezonauko”? Nampo ove kugazara kuhamena simpagwa ndi ezonauko eli ngali zonagura po yininke nayinye yepevhu. Vantu vamwe kwa pura asi uzuni kuna kuza uka ligwanekere nosimpagwa oso, apa ava resa nombudi ngwendi dedi dina kukwama ko:
Bulletin of the Atomic Scientists kwa tanta asi: “Kuvhura kukara ko yita yoyinene ntani yita oyo kuvhura kuyiretesa po va hana kuyidivira ndi nampo morwa madiro kulizuvha.
National Geographic kwa tanta asi: “Nomvhura murongo dina ka pita, yimpagwa ngwendi ekankamo lyevhu, mpire, erumbu, upyu wounene ntani noruhanzo, kwa horoka uzuni mudima.”
The Associated Press kwa tanta asi: “Simbonde ana li gwederere moAfrica ntani kuna kuzonagura unene yininke kupitakana nomvhura dina ka pita.”
Yimpagwa yiyo ngayi zonagura po uzuni ndi? Yisinke za uyunga ko Bibeli?
Evhu ngava li zonagura po ndi?
Hawe. Nonkango daKarunga Bibeli kwa tumbwidira asi evhu ngali karerera po narunye. (Muudisi 1:4) Mevango lyokuzonagura po evhu eli ga sita, Karunga nga ‘zonagura po ava vana kuzonagura evhu.’— Ehororo 11:18.
Uzuni ngau haga po ndi?
Kuliza noBibeli, “uzuni” ou ngau haga po, kwa tamba vantu ava ava dili kukwama mavyukiso gaKarunga nokurugana yeeyi vana hara. Ngwendi moomu ga yi rugene momazuva gaNowa, Karunga nga zonagura po “uzuni wovadinikarunga.”—2 Peturusa 2:5; 3:7.
1 Johanesa 2:17 kwa tanta asi: “Uzuni kuna kuhaga po kumwe nomadowo gawo.” Velise ezi kulikida asi Karunga kapi nga zonagura uzuni, nye age nga zonagura po vantu ava ava twikire kurugana yininke yoyidona.
Siruwoke uhura ngau wiza?
Bibeli kapi azi tu tantere kuvyukilira asi siruwo musinke ngau wiza uhura. (Mateusa 24:36) Nye azo za likida asi uhura pepi una kara. Bibeli za pumba:
Yihorokwa ngwendi yita, esesupo lyonondya, mauvera gomukagu ntani makankamo gevhu aga ngaga kara “komavango gokulisiga-siga.”—Mateusa 24:3, 7, 14; Rukasa 21:10, 11; Ehororo 6:1-8.
Vantu ngava ligazara tupu vene. Pasihonena, awo “ngava dowokera yimaliwa,” “kapi ngava kara norupandu,” ntani “kapi ngava lipangera.”—2 Timoteusa 3:1-5.
Sinzi sovantu nawo va yi kwatesa ko asi kutundilira mo-1914, yininke eyi ya kuhoroka mouzuni ya liza neyi za pumba Bibeli ntani va yi kwatesa ko asi uhura pepi una kara. Komauzera gomanzi, resa yirongwa “Yisinke ayi likida yihorokwa yomoBibeli kuhamena mvhura 1914?” ntani “Yidiviso yopomazuva gopouhura.”
Ezonauko musinke lyokulikarera za pumba Buke zokuhulilira zomoBibeli?
Buke zokuhulilira zomoBibeli kuuyunga kuhamena “apa nga horoka Hompa Jesus.” Azo kufaturura eyi ngayi horoka apa Jesus nga wiza nokulikida asi age yige ga kara nononkondo dokuzonagura po vadinikarunga navenye pevhu ntani noku gava mfeto kwava ava karere Karunga.—2 Vatesaronika 1:6, 7; 1 Peturusa 1:7, 13.
Buke zokuhulilira moBibeli kwahorora yihorokwa eyi ngayi horoka komeho. (Ehororo 1:1) Mobuke ozo kwa kara mo mbudi zongwa zehuguvaro. (Ehororo 1:3) Azo kulikida asi, Karunga nga gusa po uhahungami ntani noku ninka evhu nalinye li kare Paradisa. Apa nga ka yi rugana, vantu kapi hena ngava ka ligwanekera nokukora noruhepo ndi nampili nomfa.—Ehororo 21:3, 4.
Ono hara kulironga kuhamena eyi za tumbwidira Bibeli ndi? Nombangi daJehova kugava elirongo lyoBibeli lyomawoko-woko, eli na li kuvatera. Kuvhura o va pure ndi?