Uteroreste ngau haga po ndi?
Konyima zokuhoroka uteroreste, kuvhura o lipure asi: ‘Karunga kutupakera mbili ndi? Morwasinke uteroreste au horokere? Uteroreste a ngau haga po ndi? Ngapi nani funda po woma ou na kara nawo ngesi?’ Bibeli za gava malimbururo komapuro ogo.
Ngapi Karunga a lizuvhu kuhamena uteroreste?
Karunga ga nyenga nyanya nouteroreste. (Episarome 11:5; Yisewe 6:16, 17) Jesus nage kwa nyokerere varongwa vendi apa va here kurugana yininke yonyanya. (Mateusa 26:50-52) Nampili ngomu vamwe ava rugana nyanya medina lyaKarunga, Karunga kapi ga yi va tantera va yi rugane. Age kapi hena a purakene komakanderero gawo.—Jesaya 1:15.
Karunga ga kara nosinka kwanavenye ava ava hepa, kukwatera mo ava au kundama uteroreste. (Episarome 31:7; 1 Peturusa 5:7) Bibeli za uyunga asi Karunga nga gusa po nyanya.—Jesaya 60:18.
Eyi ayi retesa po uteroreste
Bibeli za tumbura eyi ayi retesa po uteroreste: “Mouzuni omu mwa kara vanankondo ava ava hepekere mo vakwaawo.” (Muudisi 8:9) Vantu ava va kara nononkondo kuhepekera mo vakwawo, ngoyitundwamo, vamwe kuruganesa uteroreste moku likida runyegenyo rwawo.—Muudisi 7:7.
Uteroreste ngau haga
Karunga ga tumbwidira kuka hagekesa po nyanya noku ka retesa po mbili pevhu. (Jesaya 32:18; Mika 4:3, 4) Age nga:
Zonagura po eyi ayi retesa po uteroreste. Karunga nga zonagura po mapangero noku tura po epangero lyendi. Mupangeli goUhompa owo, Jesus Kristusa, nga tekura navenye kuhetakana ntani nga gusa po nyanya. (Episarome 72:2, 14) Posiruwo oso, kapi ngau kara ko uteroreste. Vantu “ngava hafera mpora zonene.”—Episarome 37:10, 11.
Nga wapeka eyi au zonagura uteroreste. Karunga nga wapeka nayinye eyi au zonagura uteroreste. (Jesaya 65:17; Ehororo 21:3, 4) Age kwa tumbwidira hena kukavhumbura vafe ntani awo ngava ka paruka pevhu nombili.—Johanesa 5:28, 29.
Bibeli za gava konda zeyi natu pulira asi nga rugana ko yuma. Nye nampo kuna kulipura asi, ‘Morwasinke Karunga ga dira kuhagekesa po uteroreste?’ Mokugwana elimbururo, tarera vidiyo Morwasinke ga pulisilira Karunga ruhepo?
a “Uteroreste” kwa tamba kuruganesa matjiliso pokutjilisa varangwekwa, yipo va kare noutjirwe yipo va ninke vantu va kwateseko upolitika nonongereka. Nye vamwe kuvhura va dire ku yi kwatesa ko asi yininke yokufana ngoso kuna kara uteroreste.