VANGARARENI!
Ehetakano lyoparudi nzodi tupu ndi?—Yisinke azi uyunga ko Bibeli?
Sinzi sovantu, ehetakano parudi kuna kara tupu nzodi.
“Mouzuni mudima elitondororo kuna kara ngwendi uhungu ou una kundama nombunga dokulisiga-siga ntani nkarapamwe zovantu. Elitondororo kuninkisa vantu va tekure vakwawo momudona.”—António Guterres, Hamutjanga gombunga zelipakerero.
Elitondororo ngali haga ndi? Yisinke azi uyunga ko Bibeli?
Omu Karunga a tara elitondororo
Bibeli kuturonga omu Karunga a tara vantu womarudi gokulisiga-siga.
“Age [Karunga] kwa panga asi momuntu gumwe mu tunde nomuhoko nadinye di tunge pevhu nalinye.”—Yirugana 17:26.
“Karunga kapi ga kara nompongo, nye mwankenye muhoko, nkenye ogu a mu tjira noku rugana youhunga, age kumutambura.”—Yirugana 10:34, 35.
Bibeli kuuyunga asi vantu navenye kwa tundilira momuntu gumwe ntani Karunga kutambura vantu womarudi nagenye.
Vantu navenye ngava va tekura monkedi zokuhetakana
Vantu ngava va tekura monkedi zokuhetakana moUhompa waKarunga, Uhompa waKarunga kuna kara epangero lyemeguru. Epangero olyo ngali ronga vantu omu nava tekura vakwawo monkedi zokuhetakana. Vantu ngava lironga kunyokera po malizuvho gelitondororo.
“Navenye ngava lirongera mo asi uhungami yinke.”—Jesaya 26:9.
“Morwa navenye ngava rugana youhunga, makura ngamu kara mpora negameno dogoro narunye.”—Jesaya 32:17.
Naina, kupitira moBibeli mamiliyona govantu kuna kulironga omu nava tekura wopeke nefumadeko.
Mokudiva ko yoyinzi, resa Awake! zosiparatjangwa “Elitondororo ngali haga ndi?” moruhingilisa.
Resa sirongwa “Omu no zogera novanona kuhamena elitondororo” yipo o dive omu nomu zogera sirongwa esi membo.