Kuvhura yikwaeparu yi hetakane ndi?
Moyirongo yokulisiga-siga, vantu kuna kulyatera morwa yikwaeparu. Uvera woKorona wa ninkisa udigu owo u ligwederere, ano oyo kapi ya hafesa vantu. Eyi ya horoka ya likida elisigo lyenene eli lyakara pokatji konongawo nonohepwe.
Kuvhura udigu wekonomi ndi woyikwaeparu ngau hage po ndi? Nhi. Bibeli za likida eyi nga ka rugana Karunga mo ku ka gusa po maudigu aga tuna kuligwanekera nago ngesi.
Maudigu goyikwaeparu aga nga ka gusa po Karunga
Udigu: Vantu kapi va vhura kuvatera vantu navenye va gwane eyi vana hepa.
Ekohonono: Karunga nga pinganesera mapangero govantu nepangero lyendi eli ava tumbura asi Uhompa waKarunga. Alyo ngali pangera pevhu kutundilira meguru.—Ndaniyera 2:44; Mateusa 6:10.
Yitundwamo: Uhompa waKarunga ngau vhura kupangera pevhu. Vantu kapi ngava hepa hena ndi va kare nosinka soyihepwa yopanyama. (Episarome 9:7-9, 18) Awo ngava hafera yirugana yawo ntani ngava hafera eparu kumwe nomapata gawo. Bibeli kwa tumbwidira asi: “Vantu ngava litungira mambo omu ngava kara – nagumwe si ogu nga va ruganesa. Awo ngava tapeka moyipata, tava lipanda vhinyu – azo kapi ngava zi nwa vapeke.”—Jesaya 65:21, 22.
Udigu: Vantu kapi tava vhuru kuhenduka ruhepo.
Ekohonono: Kupitira moUhompa wendi, Karunga nga gusa po nayinye eyi ayi reta woma.
Yitundwamo: Mepakero mbili lyaKarunga, vantu kapi ngava ligwanekera noyininke eyi ngayi va ninkisa va zumbanese yihepwa yawo yopanyama. Pasihonena, yita, erumbu ndi esesupi lyonondya ntani mauvera kapi ngayi kara ko hena. (Episarome 46:9; 72:16; Jesaya 33:24) Karunga kwa tanta asi: “Vantu vaKarunga kapi ngava kara hena nosinka, mambo gawo ngaga kara nombili negameno.”—Jesaya 32:18.
Udigu: Vantu ava ava ligazara vene kuhepekera mo vakwawo.
Ekohonono: Vantu ava ngava kara mepangero lyaKarunga ngava lironga kuhara vakwawo ntani no ku tura yihepwa yovakwawo muhowo.—Mateusa 22:37-39.
Yitundwamo: Mepangero lyaKarunga, nkenye ogu nga kara neharo eli ali dili ‘kukondjera uwa walyene.’ (1 Vakolinte 13:4, 5) Bibeli kuuyunga asi: “KoSiyoni, ndundu zokupongoka, kapi ngaku kara yokuremeka ndi yoyidona. Sirongo ngasi zura ediwo lyaHOMPA a moomu lya zura efuta mema.”—Jesaya 11:9.
Bibeli kutanta asi ose kuna kuparuka posiruwo souhura wouzuni ntani ntaantani Karunga nga ka sikise mo etumbwidiro lyendi lyokugusa po udigu woyikwaeparu. b (Episarome 12:5) Nye ngesi ngomu tuna kundindira yi ka horoke oyo, nompango domoBibeli kuvhura di kuvatere o lididimikire maudigu goyikwaeparu aga ono kuligwanekera nago ngesi. Pasihonena, resa sirongwa “Omu no paruka noyimaliwa yoyisesu” ntani “Kukara nehetakano koyimaliwa” moRuhingilisa.
a Jehova kuna kara edina lyaKarunga, ngamoomu va yi tumbura moBibeli.—Episarome 83:18 NW.
b Mokulironga ko yoyinzi eyi no huguvarera Bibeli, resa sirongwa “Bibeli, Ntundiliro zousili.”
Kuvhura o hafere hena
RUHUNGU
Yisinke ngau sikisa mo Uhompa waKarunga?
Jesus ga yi divire asi Uhompa waKarunga yiwo welike epangero ngali gusa po maudigu apa pevhu. Yisinke wa rugana Uhompa waKarunga?
