Ntaantani tupu vapitisili womouzuni novadiviunsitwe ntani nava va diva yokuhamena yikwakompyuta kava kumbwilire ko kuhamena kuruganesa elikwamo lyomokompyuta ndi eli va kutumbura asi AI. Awo kava yi kwatesere ko asi alyo elikwamo lyewa nye hena va kara nosinka asi vantu kuvhura va liruganese mepuko.

•   Mo 4 Kudumonkuru 2023, Peresidentegona gomoAmerika Kamala Harris ka tente asi: “AI kuna kara elikwamo lyenene po, alyo kuvhura kuvatera eparu lyovantu . . . Nye elikwamo olyo kuvhura kukara siponga koukalinawa wovantu ntani kuvhura tu zumbanese untu womuntu ntani kuvhura li tu ninkise tu dire kuhuguvara mapangero.”

•   “Elikwamo eli kuvhura kuvatera ukangi wovantu nye kuvhura li kare siponga koukali nawa wovantu ntani noku tu kundama pomalizuvho,” kwayi tjenge mbunga zovandokotora nava va kara noudivi weyi youhaku ezi ga pitisilire Dr. Frederik Federspiel, mosirongwa esi va pwagesere mo 9 Kudumonkuru 2023, moBMJ Global Health. a

•   “Vantu kuvhura va ruganese elikwamo eli mokuhanesa nombudi doyipempa. Elikwamo eli kuvhura ngali ninkise vantu va dire kukara noyirugana. Vantu ava va kara noudivi woyikwakonentu va kara nosinka asi elikwamo eli kuvhura ngali kare siponga kovantu.”—The New York Times, 1 Kudumonkuru 2023.

 Ngomu ngasi pita siruwo, ngatu vhura kudimburura asi vantu ngava ruganesa elikwamo eli nawa ndi momudona. Yisinke azi uyunga ko Bibeli?

 Bibeli za gava konda eyi vantu nava dilira kukara nehuguvaro asi malikwamo gomape gomokompyuta ngava ga ruganesa tupu monkedi zongwa.

1.  1. Nampili vantu va kare nositambo sosiwa seyi vana kuruganena sininke songandi, awo kapi tava vhuru kudiva yitundwamo.

   •   “Vantu wovadona kugwana eyi ava liruganene. Ano ava wovawa ngava va futa payirugana yawo.”—Yisewe 14:12.

2.  2. Muntu kapi ga kara nononkondo kuhamena omu vantu nava ruganesa sininke esi ga rugana.

   •   “Nayimwesi eyi na ruganena ndi yeeyi na lipongaikira, ayi tanta yuma kwange, morwa na diva asi, ngani yi sigira ogu nga kwama nge, kuvhura nga kare munongo ndi mugova-yilye gokuyidiva? Nye yige tupu kugusa eyi nayinye eyi na ruganena, nayinye eyi wa pongaikira nge unongo wange mouzuni ou.”—Muudisi 2:18, 19.

 Nokonda odo kutuvatera tu kwate egano eyi twa hepera mavyukiso gokutunda kwaKarunga.

 Musiti gwetu kwa tumbwidira asi kapi nga pulisira vantu ndi yikwakonentu yi zonagure evhu ndi vantu.

•   “Uzuni kapi au runduruka.”—Muudisi 1:4.

•   “Muhungami nga gusa sirongo nga tunge mo narunye-nanarunye.”—Episarome 37:29.

 Kupitira moBibeli, Musiti gwetu ga tupa mavyukiso aga naga tu vatera tu ka gwane eparu lyombili ntani lyewa komeho. Mokudiva ko yoyinzi eyi za uyunga ko Bibeli, resa yirongwa “Pwa kara mavyukiso aga naga ku vatera o kare nomeho zongwa ndi?” ntani “Ehuguvaro lyokomeho, moRuingilisa.”