Yisinke azi uyunga ko Bibeli kuhamena esesupo lyomema gokuzera uzuni mudima?
Natuvenye twa hepa mema gokuzera yipo tu paruke. Hamutjanga goUN António Guterres kwa rondwere asi nye “sivaro sovantu ava vana hara mema kuna kutwikira kuzeruka,” yipo nye ose kuligwanekera noudigu wesesupo mema unene.” Mabiliyona govantu kapi ava vhuru kugwana mema gomazera gokunwa.
Strdel/AFP via Getty Images
Ngatu kara tupu nomema gokuvhura kugwaneka vantu navenye ndi? Ndi ngorooro ngatu twikira kuligwanekera noudigu wesesupo lyomema? Yisinke za uyunga ko Bibeli?
Eyi za tumbwidira Bibeli kuhamena mema
Bibeli kwa uyunga asi ezuva limwe esesupo lyomema ngali ka haga po. Ntani ngatu ka kara nomema gomanzi gokuzera.
“Nomukuro domema ngadi pupa momburundu, muheke goupyu ngagu kara emudiva, nosirongo somburundu ngasi zura marunone.”—Jesaya 35:6, 7.
Morwasinke natu pulira metumbwidiro olyo lyomoBibeli? Koneka eyi za uyunga ko Bibeli kuhamena omu va lisita evhu eli twa tunga.
Eyi za uyunga ko Bibeli kuhamena evhu ntani nomu aga likunduruka mema
“[Karunga] kapi ga sita [uzuni] u kare ngorooro, siporongwa, nye kwa tura mo vantu va kare mo.”—Jesaya 45:18
Mokumona asi Karunga kwa sita uzuni yipo vantu va paruke mo, age kwa tura mo yininke eyi nayi vhura kugava mema gokuzera gomanzi.
“Karunga yige a gusa mema pevhu ta ga situnukisa ga kare mata gom vhura.”—Joba 36:27, 28.
Nonkango edi kufaturura unongo waKarunga wokusita yininke eyi nayi vhura kugava mema ntani nomu naga likunduruka mema. Mema kutunda pevhu ndi mefuta, nokulisitunuka yipo ga kare mema aga azi rokesa mvhura, azo kugava mema gomazera kovantu ntani koyikorama.—Muudisi 1:7; Amosa 5:8.
“Ngani mu tumina mvhura poruveze roruwa po, asi mapya ngaga yime muzangu, nokoyitji ngaku yime enyango.”—Levitikus 26:4.
Karunga kwa tumbwidire asi nga tungika Vaisraeli, muhoko omu mwakere vanandima, asi ngava zangura muzangu gomuwa pokuvapa nkenye apa mema. Age ga yi diva asi mokuninka tu zangure muzangu gomuwa yipo tu gwane nondya, ose twa hepa mvhura zokugwanena po posiruwo souhunga.
Eyi Karunga ga ruganenene Vaisraeli mosiruwo sanare yiyo simpe nga ka rugana ntaantani kevhu nalinye. (Jesaya 30:23) Pwangesi, komaruha gomanzi gomouzuni, esesupo lyomema kuna kuligwederera, eyi kuyiretesa po morwa mvhura kapi azi roko nawa-nawa. Yisinke hena za uyunga ko Bibeli kuhamena ekohonono po lyoudigu womema ou tuna kuligwanekera nawo neina?
Omu ngali haga po esesupo lyomema
Bibeli kwa uyunga asi kupitira moUhompa wendi, Karunga nga ka kohonona po maudigu aga aga kundama uzuni ou twa tunga, kukwatera mo esesupo lyomema. (Mateusa 6:9, 10) Uhompa waKarunga kuna kara epangero lyemeguru eli ngali ya pangera pevhu. (Ndaniyera 2:44; Ehororo 11:15) Ntani hena, Uhompa waKarunga ngau rugana yininke eyi aga dili kusikisa mo mapangero gepevhu—awo ngau gusa po eyi ayi retesa po esesupo lyomema.
Udigu: Elitjindjo lyomukarompepo kuna kuninkisa mema ga dire kulikunduruka nawa. Yitundwamo kwa kwatera mo ruteni rorunene yimo tupu hena noruhanzo rorunene,K yikare asi rokutundilira ko mvhura zonene ndi apa mema gemefuta aga furu.
Ekohonono: Uhompa waKarunga ngau ka wapukurura yininke nayinye yomonkarapamwe eyi ya zonauka yipo uzuni ngau ka wape. Karunga kwa tumbwidira asi: “Tara! Ame kuna kuninka yininke nayinye yi kare yoyipe.” (Ehororo 21:5) Pevhu ngapa ka kara mema gokuzera, nampili komavango oku ayi dili kuparuka yinamwenyo, yipo yinamwenyo yi kure. (Jesaya 41:17-20) Uhompa waKarunga, ou ngaka pangera Jesus Kristusa, ngau ka pangera hena nonkondo dopansitwe.
Apa Jesus ga kere pevhu, age kwa mwenekedere ekundungu ntani eyi kwa geve sihonena kuhamena nonkondo edi ga mu pere Karunga. (Marukusa 4:39, 41) Mepangero eli Jesus nga ka kara hompa goUhompa waKarunga, kapi ngamu ka kara hena yimpangwa yopaunsitwe. Vantu ngava ka kara mombili, ngava ka lizuvha epopero ntani kapi ngava tjira yimpangwa.
Udigu: Vantu ava ava dili kugazara yitundwamo yoyirugana yawo ntani nongesefa edi di kondjere ungawo kunyateka nomukuro noyidiva ntani mavango gemevhu omu ava pungwire mema, eyi kugwederera kesesupo lyomema gomazera.
Ekohonono: Karunga ngaka zeresa uzuni ntani ngaka wapukurura nomukuro noyidiva nefuta ntani evhu. Evhu ngali ka kara paradisa. Bibeli kuuyunga asi: “Mburundu ngazi hafa, ano nombya ngadi temuna mowiza.”—Jesaya 35:1.
Yisinke ngayi ka horokera vantu ava va dira kukara nosinka konkarapamwe ndi kovantu vakwawo? Karunga kwa tumbwidira asi nga ka “zonagura ava wokuzonagura evhu!”—Ehororo 11:18; Yisewe 2:21, 22.
Udigu: Vantu kuna kuruganesa mema momudona, ano ngoyitundwamo, awo kuruganesa mema gomanzi kupitakana aga au gava uzuni.
Ekohonono: Uhompa waKarunga ngau “sikisa mo” mpango zaKarunga pevhu, nye kapisi ngwendi mapangero gopasintu aga aga ninkilire mo vakwawo. (Mateusa 6:9, 10) Uhompa waKarunga ngau gava erongo lyewa po kovantu. Jesaya 11:9 kutanta asi: ‘Sirongo ngasi zura ediwo lyaJehova.’ a Vantu ngava pakera mbili uzuni wetu wouwa ntani noyiruganeso yopaunsitwe, morwa Karunga ngava pa unongo ou wapitakana unongo naunye ntani neharo lyokuhara Karunga noyisitwa yendi.
Mokugwana ko mauzera gomanzi kuhamena eyi ngau rugana ko Uhompa waKarunga, tara sirongwa “Yisinke Uhompa Wakarunga?”
Tara mobuke zaJesaya, egaununo 35, yipo o liresere ko nyamoge omu evhu ngava litjindja yipo li kare paradisa.
Tarera vidiyo Morwasinke Karunga ga sitira evhu? yipo o lironge yoyinzi kuhamena sitambo saKarunga kevhu ntani kovantu.
a Jehova kuna kara edina lyaKarunga. (Episarome 83:18) Tara sirongwa “Yilye Jehova?” moRuhingilisa.