VANGARARENI!
Harumagedoni ngazi tamekera moIsraeli ndi?—Yisinke azi uyunga ko Bibeli?
Bibeli kapi azi faturura Harumagedoni asi yita eyi ngayi horoka pevango limwe tupu, nye ayo kuna kara yita eyi ngayi horoka uzuni mudima pokatji ko mapangero govantu ntani naKarunga.
“Nompepo odo kwa tunda konompepo donondona . . . ado kuza kovahompa vepevhu nalinye, di ka va pongaikire yita eyi ngayi horoka mezuva lyenene lyaKarunga Munankondo nadinye. . . . Nompepo makura tadi pongaike vahompa pevega limwe eli ava tumbura moRuhebeli asi Harumagedoni.”—Ehororo 16:14, 16.
Nkango “Harumagedoni” kwa tundilira konkango zoRuhebeli Har Meghid·dohnʹ, ezi azi tanta asi “Ndundu zaMegido.” Megido kwa kere sitata esi sa kere momukunda gwaIsraeli zanare. Morwa konda ozo, vantu vamwe kwa yipura asi yita yaHarumagedoni ngava yirwira moIsraeli. Evango apa sa kere sitata saMegido, kapi tava vhuru kugwaneka po ‘vahompa womouzuni naunye’ novakwayita vawo, morwa evango olyo enunu unene.
Buke zEhororo kwa zitjenge ‘momaneko,’ ndi moyidiviso. (Ehororo 1:1) Harumagedoni kapi za tamba, kevango lyongandi, nye kwatamba kweyi ngayi horoka mouzuni mudima apa nomuhoko ngadi ponga kumwe sikando sokuhulilira mokuhetekera ko kurwisa epangero lyaKarunga.—Ehororo 19:11-16, 19-21.