VANGARARENI!
Nombangi daJehova ntani siruwo esi va dipagere Vajuda—Yisinke a zi uyunga ko Bibeli?
Mo-27 Murongagona 2023, vantu wovanzi ngava diworoka ezuva eli va dipagere Vajuda wovanzi ndi asi Holocaust. Yininke eyi yoyidona ya horokere nomvhura 75 dina ka pita, kuvhura yi ku ninkise o lipure eyi Karunga ga yi pulisilire yi horoke.
Pokudiva eyi za uyunga ko Bibeli, resa sirongwa “Morwasinke za horokerere Holocaust? Morwasinke Karunga ga dilire kurugana ko yuma?” moRuingilisa.
Vajuda wovanzi kwa hepere unene. Mamiliyona goVajuda kwa ga dipagere. Ntani vantu vamwe ava va kere asi kapisi Vajuda nawo kwa va hepekere noku va dipaga posiruwo oso. Vantu owo kwa hamenene mo Nombangi daJehova, awo kwava hepekere morwa epuliro lyawo.
Komauzera gomanzi resa sirongwa “Yisinke ya horokerere Nombangi daJehova posiruwo soHolocaust?” moRuingilisa.
“Magazaro gokuhamena yokomeho”
Vantu wovanzi va kara nowoma asi sihorokwa ndi yininke yokufana ngoso kuvhura kuhoroka hena. Nye Bibeli za tumbwidira asi komeho yininke oyo kapi ngayi ka horoka hena.
“Nyamelike na diva magazaro aga na kara nago gokumuhamena, magazaro gokumuretera erago kapisi simpagwa, magazaro gokuhamena yokomeho eyi muna ndindire.”—Jeremiya 29:11.
Etumbwidiro olyo nga li sika mo apa Karunga Jehova nga rugana ko yuma mokuhagekesa po udona naunye ntani neyi wa retesa po. Age ntaantani nga:
Ka zonagure po ava ava koresa wopeke.—Yisewe 2:22.
Ka verura ava vana kuhepa.—Ehororo 21:4.
Ka vhumbure ava va fa.—Johanesa 5:28, 29.
Ove kuvhura o huguvare matumbwidiro gomoBibeli. Mokudiva asi morwasinke nohuguvarera eyi za tumbwidira Bibeli, kuvhura o heteke elirongo lyetu lyoBibeli lyomawokowoko.