Ka va yi ngungunyukire asi vantu wokusika pomabiliyona gatano ngava tarera vantu womoyirongo yokusika po-206 ava ngava lihamesera momaudano goOlympics gopokwenye mo-2024. Thomas Bach, presidente goInternational Olympic Committee kwa uyunga asi: “Maudano aga kureta kumwe uzuni ntani u kare mombili. Sitambo somaudano goOlympic kana kara asi yipo vantu va paruke kumwe mombili nomouumwe, nampili ngomu natuvenye twa tunda konompo dokulisiga-siga.

 Kuvhura sili maudano goOlympics ga sikise mo sitambo esi ndi? Kuvhura sili ngatu kare mombili nomouumwe ndi?

 Maudano goOlympic gomvhura ezi ka ga ninkisire vantu va gazare momunene kupitakana tupu maudano. Ka pa horokere yininke eyi ayi reta maligaunuko pokatji kovantu, ngwendi untu womuntu, elitondororo, elirwaneso lyomaukarelikarunga ntani kulitekura momudona.

 Vantu kuhafera kutarera maudano ngwendi goOlympics. Nye nampili ngoso, yihorokwa eyi kulikida asi vantu kugazara noku rugana yininke monkedi ezi azi va gaununa kovakwawo ntani kuninkisa vantu va twikire kugazara nokurugana yininke monkedi zokulifana, mevango lyokugazara nokurugana yininke monkedi ezi azi reta mbili nouumwe.

 Bibeli kwa pumba asi vantu ngava kara nonkareso ezi ngazi ninkisa mouzuni mu dire kukara uumwe. (2 Timoteusa 3:1-5) Mokulironga ko yoyinzi kuhamena uporofete ou womoBibeli, resa sirongwa “Did the Bible Predict the Way People Think and Act Today?” moRuhingilisa

 MoBibeli kwa kara mo nonkango dehuguvaro kuhamena eyi ngayi reta mbli nouumwe uzuni mudima. Azo kwa tumbwidira asi epangero lyemeguru eli ava tumbura asi “Uhompa waKarunga” ngali retera uumwe vantu navenye vepevhu.—Rukasa 4:43; Mateusa 6:10.

 Jesus Kristusa yige Hompa goUhompa owo. Age nga retera mbili vantu navenye vepevhu. Bibeli kuuyunga asi:

•   ‘Uhungami ngau lihana, mpora ngazi kare ko.’—Episarome 72:7.

•   “Age kuyoworora vahepwe ava ava mu kugu. . . . Age kuvayoworora mompatakani nomomahepeko.”—Episarome 72:12, 14.

 Eyi nga rongo Jesus kwa vatera mamiliyona govantu womoyirongo 239 va kare mouumwe nampili momazuva getu. NgoVakriste, Nombangi daJehova uzuni mudima kwa lironga omu nava kara mombili. Mokudiva omu ayi va tompoka, resa sifo soRuhungu sosiparatjangwa “Nyokera Po Nkareso Zonyengo.”