VANGARARENI!
Kuvhura tu nyokere po yita youzuni mudima ndi?—Yisinke azi uyunga ko Bibeli?
Nomvhura 30 dina kapita, vantu wovanzi kwa lizuvhire asi elikwatakano eli lya kere pokatji koyirongo kwa peme ntani kwa wepe. Nye yininke eyi yina kuhoroka ngesi kulikida asi eyi va pulire kapisi usili.
“Vantu kuna kara nosinka asi yita yomoGaza ngayi kundama yirongo yimwe ngomu Israeli naHezbollah ngava tameka kurwa pomururani gwaLebanon”—Reuters, 6 Murongagona 2024.
“Nombunga edi a pangere Iran kuna kuhomokera mavango gokulisiga-siga ntani Iran ana tameke kuninka noboma douhungu. Mokugwederera ko, Russia naChina ngesi kuna kukwatesa ko Iran ano eyi kuna kutjilisa yirongo eyi ya kara koutokero.”—The New York Times, 7 Murongagona 2024.
“VaRussia simpe kuna kutwikira kuhomokera nokuzonagura yininke yoyinzi moUkraine.”—UN News, 11 Murongagona 2024.
“Ngomu ekonomi lyaChina lina kukura ntani vakwayita vamo kuna kuligwederera, ano Vataiwan kuna kulikangangera sirongo sawo unene, ntani ediro kulizuvha pokatji kaChina naAmerika kuvhura kuretesa po maudigu.”—The Japan Times, 9 Murongagona 2024.
Koyili eyi za uyunga ko Bibeli kuhamena maukaro aga gana kuhoroka mouzuni naina ndi? Kuvhura ngayi twaredesere koyita youzuni mudima ndi?
Bibeli kwa pumba yininke eyi yina kuhoroka ngesi
Bibeli kapi za vyukilira kupumba yita yongandi eyi yina kuhoroka. Nye azo kwa pumba yita eyi yina kuhoroka mosiruwo setu ntani ayo kuna ‘kugusa mbili pevhu.’—Ehororo 6:4.
Buke zaNdaniyera kwa pumbire asi “apa ngasi sikilira mo nye siruwo,” mapangero aga aga lirumbasana nga ga ‘lirwisa,’ ndi nga ga kondja yipo ga kare gononkondo unene. Ayo kwa hamena mo kukara novakwayita wovanzi wononkondo ntani kuruganesa “emona” lyenzi ndi yiwaliwa yoyinzi.—Ndaniyera 11:40, 42, 43.
Yita eyi yina kuwiza
Bibeli kulikida asi ukaro wouzuni ngau donapa komeho u kawape. Jesus kwa pumbire asi “ngapa kara udigu wounene ou wa dilire kukara po kutunda ketameko lyouzuni.” (Mateusa 24:21) “Udigu wounene” ngau twaredesa koyita ava tumbura asi Harumagedoni, eyi va faturura asi “yita eyi ngayi horoka mezuva lyenene lyaKarunga Munankondo nadinye.”—Ehororo 16:14, 16.
Harumagedoni ngazi parura vantu, nye kapisi kuvazonagura po. Kupitira mo yita oyo, Karunga nga hagekesa po mapangero govantu, aga ga retesa po yita yoyinzi. Mokudiva omu Harumagedoni ngazi retesa po mbili zanarunye, resa yirongwa eyi yina kukwamako:
“Yisinke yita yaHarumagedoni?” moRuingilisa