Sigongi selipakerero lyonomuhoko edi adi hetekerere ko kukohonona po maudigu gomukarompepo, ka si hege moSondaha 10 Mangundu 2022. Vapitisili novalirongi ava ka va kere pepongo olyo ka va lizuvhire asi ngava pungura yimaliwa mokukwatesako yirongo yoruhepo eyi yina hepa evatero morwa yimpagwa yomukarompepo. Sinzi sawo kava dimbwilire asi eyi kapi nayi kohonona po ntundiliro zoudigu ou.

•   Mo-19 Mangundu 2022, hamutjanga gElipakerero lyonomuhoko António Guterres kauyungire asi: “Ame kuna kukwatesa ko etekoro lyokupungura yimaliwa mokuvatera ava una kundama udigu womukarompepo. Nye eyi kapi yina gwanenepo . . . Morwa evhu kuna kara mosiponga unene.”

•   Mo-20 Mangundu 2022, Mary Robinson Peresidente gwa nare age hena mukarelipo gwa nare gElipakerero lyonomuhoko neyi Yountu womuntu, ka uyungire asi: “Uzuni kuna kara peepi noudigu wounene womukarompepo.”

 Vadinkantu kuna kara nosinka kuhamena meho zevhu. Nye nomuhoko kuvhura di sikisemo etumbwidiro lyawo lyokuhagekesa po maudigu gomukarompepo ndi? Yisinke za uyunga ko Bibeli?

 Bibeli kwa yilikida asi nampili nomuhoko di ruganene kumwe mokukohonona po udigu womukarompepo, kapi ngayi va tompoka nawa-nawa. Koneka nokonda mbali deyi nayi dira kuvatompoka:

•   “Kapi to vhuru kuvyura esi sa penga.”—Muudisi 1:15.

   Kutanta asi: Mapangero kapi nayi va tompoka kurugana nayinye eyi vana hara kusikisa mo. (Jeremiya 10:23) Nampili nomuhoko diruganene kumwe, simpe kapi nayi va tompoka kukohonona po maudigu gomouzuni, yikare asi ngapi omu nava hetekera ko.

•   “Yeeyi vantu ngava lihara tupu vene, ngava dowokera yimaliwa, . . . kapi ngava lizuvha novakwawo.”—2 Timoteusa 3:2, 3.

   Kutanta asi: Bibeli za pumba nawa-nawa asi vantu wopo siruwo setu ngava lihara tupu vene ntani kapi ngava hara kuruganena vakwawo yininke yoyiwa.

 Meho zevhu kapi za korera momatumbwidiro gomapangero. Karunga ga tu pa Mupangeli gokuwapera, Jesus Kristusa. Bibeli kwauyunga kuhamena Jesus asi:

•   “Age yige nga kara mupanguli gwetu. Age ngava mu tumbura asi: “Mutetuli, Mupukuruli,” “Karunga Munankondo,” “Guhya Gwanarunye,” “Hompa gombili.”—Jesaya 9:6.

 Jesus yige Hompa goUhompa waKarunga, ndi uhompa wemeguru. (Mateusa 6:10) Age kwa kara nononkondo nounongo ntani neharo lyokupakerambili evhu ntani nava va tunga po. (Episarome 72:12, 16) Mepangero lyendi, uhompa ou wemeguru ngau hagekesa navenye ava vana “kuzonagura evhu” ntani evhu ngava li wapukurura.—Ehororo 11:18; Jesaya 35:1, 7.

 Mokulironga ko yoyinzi kuhamena omu ngava kohonona po maudigu aga aga wiza po morwa mukarompepo, resa sirongwa “Eyi za uyunga ko Bibeli kuhamena mukarompepo neparu lyetu?”