MwaPembankuru 2022, Ukorokotji kuna kuhoroka mouzuni mudima:

•   Mo-10 Pembankuru 2022, kuliza noThe Japan Times “Mupolitika gomunene gomoJapan [ogu ga kere Ministeli Shinzo Abe] kava mu dipagere, ano eyi kayi tetukisire vantu womosirongo morwa moJapan kapi mwa kara ukorokotji unene ntani kwa kara nonoveta dononene kuhamena kuruganesa mauta.”

•   Mo-4 Pembankuru 2022, kuliza noReuters “Vakorokotji kava dipagere vantu vatatu momall zaCopenhagen.”

•   Mo-10 Pembankuru 2022, kuliza noThe Guardian “MoAfrika Mbindakano: Vantu 15 kava fire konyima za pa vantu kava royangere pombaha za kara moSoweto.”

•   Mo-5 Pembankuru 2022, kuliza noCBS News “Vantu wokupitakana po-220 kava va royere nokuvadipaga moAmerika mepwizumuko eli kali kere mo-4 Pembankuru.”

 Ukorokotji ngau haga ndi? Yisinke za uyunga ko Bibeli?

 Bibeli kufaturura mazuva aga tuna kuparuka asi ‘mazuva gopouhura,’ mazuva aga vantu ngava kara nonyanya ntani ngava rugana yininke yonyanya. (2 Timoteusa 3:1, 3) Ukorokotji kuninkisa vantu va paruke nowoma. (Rukasa 21:11) Nye Bibeli za tumbwidira siruwo apa ukorokotji ngau haga ntani “vantu vaKarunga kapi ngava kara hena nosinka, mambo gawo ngaga kara nombili negameno.” (Jesaya 32:18) Ngapi omu ngau haga po?

 Karunga nga zonagura po vantu wovadona noyirwiso yawo.

•   “Nye Karunga nga nyafura mo vadinikarunga mosirongo.”—Yisewe 2:22.

•   “Age kwa hageka yita mouzuni mudima; ga tezagura mauta, yiyo ga haraganesa magonga, yilikandwiso yiyo ga yi hwika momundiro!”—Episarome 46:9.

 Karunga nga ronga vantu omu nava paruka kumwe nombili.

•   “KoSiyoni, ndundu zokupongoka, kapi ngaku kara yokuremeka ndi yoyidona. Sirongo ngasi zura ediwo lyaHOMPA moomu lya zura efuta mema.”—Jesaya 11:9.

•   Nampili neina, Karunga kuna kuronga vantu uzuni mudima yipo va hageke kurugana ukorokotji nokuruganesa yirwiso, ano “nomfuro dawo ngava di hambura yipururu ano magonga gawo matemo.”—Mika 4:3.

 Mokudiva ko yoyinzi kuhamena uzuni wokudira nyanya, resa sirongwa “Kuvhura tu paruke twa hana kukara nowoma ndi?” moRuhingilisa.

 Mokudiva ko yoyinzi kuhamena omu ngava ka hagekesa po ukorokotji, resa sirongwa “Mbili pevhu!” moRuhingilisa.