The Guardian kwa tanta asi: “Mukarompepo kuna kulitjindja. Vantu kapi vana kuvhura kuparuka po pevhu.”

 Vantu kuna kara noudigu ou va retesa po vene. Vadiviunsitwe nawo va yi kwatesa ko asi yininke eyi va kurugana vantu kwa kuninkisa upyu uligwederere. Mukarompepo gwa litjindja morwa upyu wa ligwederera, ano eyi kwa reta yitundwamo yoyidona; kukwatera mo:

•   Upyu, erumbu ntani makundungu, yininke eyi kureta ruhanzo nomundiro.

•   Materengenze kwa kuhemuka.

•   Efuta kwa kufura

 Mukarompepo kuna kukundama uzuni mudima. Konyima zokukonakona mukarompepo gomoyirongo yokusika po-193, The New York Times kwa tanta asi: “Planeta kuna kulikida asi za hepa evatero.” Mbunga zoUhaku zomoUzuni kwa tumbura elitjindjo lyomukarompepo asi “sininke sosiponga koukanguki wovantu.” Morwa elitjindjo lyomukarompepo kwa retesa po nomfa ntani ruhepo.

 Nye ose twa kara nokonda zeyi natu karera nehuguvaro kuhamena meho. Bibeli za pumba yihorokwa eyi ya kuhoroka ngesi ntani neyi Karunga nga ka rugana ko mokupopera eparu lyetu.

 Nhi. Yitundwamo eyi agu retesa po mukarompepo ya lizi noyihorokwa eyi za pumba Bibeli kuhamena mazuva aga twa kuparuka ngesi.

 Uporofete: “Ove diva asi pomazuva gopouhura, ngapa kara yiruwo yoyidigu. Yeeyi vantu ngava lihara tupu vene, ngava dowokera yimaliwa, . . . ngava siga vakwawo, . . . kapi ngava lizuvha novakwawo, . . . ngava gombeka vakwawo, ngava kara ndino.” 2 Timoteusa 3:1-4.

 Bibeli za pumba nonkareso edi ngava kara nado vantu edi ngadi va ninkisa va zonagure mukarompepo. Mapangero ntani vanangesefa kutura yikwaeparu muhowo, awo kapi ava gazara ko kuhamena omu eparu ngali ka kara komeho. Nampili apa ava hara kuhetekera ko kuhagekesa po yininke eyi ayi retesa po upyu unene, awo kapi ava lizuvhu.

 Uporofete ou kulikida asi, kapisi tu ndindire asi vantu ngava tjindja yirugana yawo nonkareso zawo ntani nokupopera evhu. Bibeli kwa uyunga asi vantu ava ava ligazara vene “udona wawo ngau pitakanena.”—2 Timoteusa 3:13.

 Bibeli kwa uyunga asi Jehova a Karunga, Musiti gwetu ga hara planeta zetu ntani nava va tunga mo. Tara novelise ntatu domoBibeli edi adi likida asi Karunga nga rugana ko yuma.

1.  1. Karunga “kapi ga u sita u kare ngorooro, siporongwa, nye kwa tura mo vantu va kare mo.”—Jesaya 45:18.

    Karunga nga sikisa mo sitambo sendi kevhu. (Jesaya 55:11) Kapi nga li tarerera va li zonagure ndi va dire kuvhura kutunga po vantu.

2.  2. “Valinunupiki yiwo ngava hingira sirongo, awo ngava hafera mpora zonene. Muhungami nga gusa sirongo nga tunge mo narunye-narunye.”—Mapisarome 37:11, 29.

    Karunga kwa tumbwidira asi vantu ngava tunga pevhu narunye moukaro wouwa.

3.  3. “Nye Karunga nga nyafura mo vadinikarunga mosirongo.”—Yisewe 2:22.

    Karunga ga tumbwidira ku ka zonagura po vadinikarunga ntani nava ava zonagura evhu.

 Ngapi omu Karunga nga ka sikisa mo sitambo sendi kevhu? Age ngayi rugana oyo kupitira mepangero lyoUhompa wemeguru. (Mateusa 6:10) Uhompa owo ngau pangera kutundilira meguru. Alyo kapi ngali kara nomazuvhasano nomapangero govantu kuhamena evhu. Alyo ngali pinganena po mapangero govantu.—Ndaniyera 2:44.

 Uhompa waKarunga ngau reta mauwa gomanzi kovantu ntani kevhu. (Mapisarome 96:10-13) Tara eyi Jehova karunga nga ka rugana kupitira moUhompa wendi.

•   Nga ka wapeka evhu

   Eyi za uyunga ko Bibeli: “Mburundu ngazi hafa, ano nombya ngadi temuna mowiza.”—Jesaya 35:1.

   Eyi ayi tanta: Jehova nga wapeka planeta, nampili mavango aga va zonagura unene vantu.

•   Nga pangera mukarompepo

   Eyi za uyunga ko Bibeli: Jehova “kwa mwenekedere ekundungu, mankupi taga litura teete.”—Mapisarome 107:29.

   Eyi ayi tanta: Jehova ga kara nononkondo dokupangera mukarompepo. Vantu kapi ngava hepa hena koukarompepo.

•   Nga ronga vantu va pakere mbili evhu

   Eyi za uyunga ko Bibeli: “Ame tani ku rongo nzira ezi no genda.”—Mapisarome 32:8.

   Eyi ayi tanta: Karunga kwa pere vantu nonkondo dokupangera evhu. (Genesis 1:28; 2:15) Age nga ka tu ronga omu ngatu ka pakera mbili evhu ntani ngatu ka paruka monkedi ezi ngazi dira kuzonagura evhu.