MwaPembagona 2022 Peresidente ogu ga karera po mbanga zouzuni mudima ka tente asi: “Yikwaeparu mouzuni mosiponga yina kara. Ngesi nondando doyininke kuna kuronda unene, nye vantu kapi vana kara noyimaliwa yokugwanena po.”

 Mbunga zouzuni mudima ezi azi vatere nongesefa nokuvatera vantu woruhepo kazi tjenge asi: “Mukoso gomaholi nonondya kuna kuzeruka, ano eyi kuna kukundama unene vantu ava va kara moyirongo yoruhepo.

 Bibeli kutuvatera tu kwate egano eyi tuna kuligwanekerera nomaudigu ogo. Ngapi omu natu lididimikira ntani ngapi omu maudigu ogo ngava ga gusa po.

•    Bibeli kuuyunga asi ose kuna kuparuka “pomazuva gopouhura.”—2 Timoteusa 3:1.

•    Jesus kwa uyungire asi “mamoneko gokutjilisa,” ngaga horoka posiruwo esi ndi pomazuva aga tuna kuparuka. (Rukasa 21:11) Apa mukoso goyininke agu rondo, kuretesa po utjirwe. Vantu kukara nosinka kuhamena meho zawo ntani nsene kuvhura ngava yi vhure kupakera mbili mapata gawo.

•    Buke zEhororo za pumba asi mukoso goyininke ngagu zeruka pomazuva ndi posiruwo esi tuna kuparuka. Ehororo 6:6 kutanta asi: “Ame kwa zuvhire ezwi. . . . lina kutanta asi: “Lita zorukokotwa kuna kuzirandesa edenali ntani nolita ntatu doyilya kuna kudirandesa edenali.’”

 Mokulironga ko yoyinzi kuhamena ‘mazuva gopouhura’ ntani uporofete wemEhororo, tarera vidiyo Uzuni kwa runduruka kutundilira mo-1914 ntani resa sirongwa “Wolye varondi vane wononkambe?”

•    “Vantu ngava litungira mambo omu ngava kara – nagumwe si ogu nga va ruganesa. Awo ngava tapeka moyipata, tava lipanda vhinyu – azo kapi ngava zi nwa vapeke. Vantu vange, ngava kara nomwenyo gomure ngwendi yitji. Awo ngava hafera unene yininke eyi va rugana vene.”—Jesaya 65:21, 22.

•    “Ewogo lyoyisima ngano tali kara mosirongo; nondundu ngano tadi zura muzangu, ngwendi daLibanoni. Yitata ngano tayi zura vantu, moomu wa kara wayi mezana.”—Episarome 72:16.

•    “‘Morwa vahepwe kuvahepeka, ano vehudi kuna kumona udigu, yiyo nye nani sikamena, yimo ana kutanta HOMPA-ndi Jehova, ni popere ogu ana harerere epopero.”—Episarome 12:5. a

 Karunga ntaantani nga ya guse po maudigu goyikwaeparu, kapisi mosirongo simwe tupu nye uzuni mudima. Pokudiva asi ngapi nga ya yirugana, resa sirongwa “Maudigu goyikwaeparu ngaga haga po ndi?”

 Nye nampili naina, Bibeli kuvhura zi kuvatere o lididimikire udigu woyikwaeparu. Ngapi omu nazi kuvatera? MoBibeli kwa kara mo magano gomawa kuhamena omu noruganesa nawa yimaliva yoge. (Yisewe 23:4, 5; Muudisi 7:12) Mokulironga ko yoyinzi, resa sirongwa “Popera eparu lyoge” ntani “Omu no paruka noyimaliwa yoyisesu.”