Yisinke za uyunga ko Bibeli kuhamena nzara?
“Kwato nzara.” Nonkango odo kuna kara nonkango edi va uyungire vampitisili kuhamena udigu ou ava ligwanekere nawo vantu, sitambo sawo kwa kere sokugava nondya kovantu navenye. a Nye sili mouzuni ngamu dira nzara ndi? Yisinke za uyunga ko Bibeli?
Bibeli za pumba kuhamena nzara
Bibeli kwa pumbire asi pomazuva getu ngapa kara nzara, mazuva aga azi tumbura asi ‘mazuva gopouhura.’ (2 Timoteusa 3:1) Kapisi Karunga ana kuziretesa po, age kwa tu rondora tupu asi ngapa kara nzara. (Jakopo 1:13) Tara mauporofete gavali gomoBibeli.
“Nondya ngadi sesupa . . . komavango gokulisiga-siga.” (Mateusa 24:7) Mauporofete gomoBibeli ga tumbura kuhamena erumbu. Ava va kara nosinka sonondya kava tente asi: “Udigu kuhamena nondya, ntani kugwana nondya donongwa dokugwanena po kuna kuligwederera.” b Mamiliyona efere govantu mouzuni kapi vana kugwana nondya. Ano sinzi sawo kufa konzara.
“Makura tani mono nkambe zonsovagani, ano ogu ga rondere po kwa kwaterere siviha mokuwoko kwendi.” (Ehororo 6:5) Mouporefete ou, nkambe ntani nogu ga rondere po kwa fanekesa nzara ezi ngazi kara pomazuva gopouhura. c Ano siviha esi sa kere mokuwoko kwendi kwa kere sokuvihisa nondya yipo nkenye ogu a gwaneko nondya dononsesu. Ngomu nkambe zina kuduka, ezwi tali tanta asi mukoso gonondya ta gu zeruka ntani nokurondora vantu va pungure nondya. (Ehororo 6:6) Eyi kulikida nawa-nawa eyi yina kuhoroka mouzuni, vantu mabiliyona kapi vana kuvhura kuranda nondya.
Nzara kapi ngazi ka kara ko
Valirongo kwa tanta asi, planeta zetu kugava nondya dokugwanena po edi nava vhura kulya vantu navenye. Makura yisinke nye ayi retesa po nzara? Yisinke eyi za uyunga ko Bibeli kuhamena eyi Musiti gwetu Jehova d nga ka rugana ko mokugusa po nzara?
Udigu: Mapangero kapi taga vhuru kugusa po ruhepo ntani neninkiliromo eli ali ninkisa vantu va fe konzara.
Ekohonono: Mapangero govantu ngava ga pinganesera po noUhompa waKarunga. (Ndaniyera 2:44; Mateusa 6:10) Neina, vantu woruhepo kuvadigopera kuranda nondya, nye ayo ngayi ka litjindja moUhompa waKarunga. B’ibeli kwa uyunga asi Jesus Kristusa, Hompa goUhompa waKarunga: “Nga yoworora vahepwe ava ava mu kugu. . . . Ewogo lyoyisima ngali kara mosirongo; nondundu ngadi zura muzangu.’—Episarome 72:12, 16.
Udigu: Yita kuzonagura ekonomi lyosirongo, ano oyo kuninkisa vantu va dire kugwana nondya dokugwanena po.
Ekohonono: “Age [Jehova] kwa hageka yita mouzuni mudima; ga tezagura mauta, yiyo ga haraganesa magonga, yilikandwiso yiyo ga yi hwika momundiro!” (Episarome 46:9) Karunga nga hagekesa po yita ntani nokuzonagura po ava ava retesa po yita. Ano nkenye ogu nga gwana nondya noureru. Bibeli kwa tumbwidira asi: “Uhungami ngano tau lihana posiruwo sendi, mpora ngazi kare ko dogoro noku ngaku diminina kwedi.”—Episarome 72:7.
Udigu: Mukarompepo gomudona kuzonagura yimeno nokudipaga yikorama.
Ekohonono: Karunga nga pangera mukarompepo, ago ngagu kara gomuwa koyimeno. Bibeli kutanta asi: “Age [Jehova] kwa mwenekedere ekundungu, mankupi taga litura teete. . . . Age kwa pirwire mburundu zi kare madiva gomema. . . Makura ta ninki wonzara va hingire mo, kwa kunine mapya, tava tapeke yindjembere, tamu zanguka muzangu gomunzi.”—Episarome 107:29, 35-37.
Udigu: Vantu ava va hara yininke kurugana nondya dokudira kuwapera ndi kapi ava pe vantu ava vana hepa nondya.
Ekohonono: Karunga nga zonagura po vantu woufuki. (Episarome 37:10, 11; Jesaya 61:8) Bibeli kufaturura Karunga Jehova asi “age kupangwira ava ava hepeke, ta pe nondya wonzara.”—Episarome 146:7.
Udigu: Sinzi sonondya kuzonauka nkenye mvhura.
Ekohonono: Mepangero lyoUhompa waKarunga, ava ngava rugana kweyi yonondya ngava rugana monkedi zongwa. Apa Jesus ga kere pevhu, age kapi ga pulisilire vantu va hepeke nondya. Pasihonena, sikando simwe age kwa kutikire vantu wokupitakana po 5 000. Konyima, age kwa tanterere varongwa vendi asi: “Pongaikeni eyi yina hupu po, yipo tu dire kuhepeka nondya.”—Johanesa 6:5-13.
Morwa Uhompa waKarunga ngau hagekesa po eyi ayi retesa po esesupo lyonondya, vantu navenye ngava hafera nondya dononzi donongwa. (Jesaya 25:6) Mokudiva ko yoyinzi eyi Uhompa waKarunga ngau ka rugana, resa sirongwa “Siruwoke Uhompa waKarunga ngau pangera pevhu?”
a The 2030 Agenda for Sustainable Development, adopted by all United Nations Member States in 2015.
b A joint report by the Food and Agriculture Organization of the United Nations, the International Fund for Agricultural Development, the United Nations Children’s Fund, the United Nations World Food Programme, and the World Health Organization.
c Mokulironga ko yoyinzi kuhamena varondi navenye wononkambe ava va tumbura mEhororo, resa sirongwa “Wolye varondi vane wononkambe?”
d Jehova kuna kara edina lyaKarunga. (Episarome 83:18 NW) Resa sirongwa “Yilye Jehova?” MoRuingilisa.
Kuvhura o hafere hena
YIRONGWA YIMWE
Kuvhura yikwaeparu yi hetakane ndi?
Kolili epangero eli ngali pangera nawa, alyo ngali gusa po ruhepo ntani udigu woyikwaeparu.
