VANGARARENI!
Kuvhura sili nkinda zouzuni zi rete vantu mouumwe ndi?—Yisinke azi uyunga ko Bibeli?
Vantu wokusika keyovi lyomamiliyona ntano kuna kuva ndindira ngava tarere mbara zonkinda zouzuni ezi vana kudana kutundilira mwa-20 Mangundu dogoro mwa-18 Sindimba 2022. Wovanzi kulizuvha asi kutarera maudano kapi tupu ayi reta vantu moumwe nye ago kurugana ko yoyinzi.
“Maudano ga kara nononkondo dokutjindja uzuni. Ago ga kara nononkondo dokutumangeda vantu. Ago hena ga kara nononkondo dokureta vantu mouumwe monkendi nazopeke.”—Nelson Mandela, Peresidende gwanare gwaAfrika Mbindakano.
“Udano wombara . . . kureta vantu mouumwe morwa kuvaninkisa va kare nehuguvaro noruhafo noupampi nokuhara vakwawo ntani nokukara nositambo simwe.”—Gianni Infantino, Peresidende goFIFA. a
Nkinda zouzuni ndi nkenye maudano kuvhura ga sikise mo yitambo eyi ndi? Pwakara ehuguvaro lyombili nouumwe ndi?
Azo kureta vantu mouumwe ndi?
Nkinda zouzuni zomvhura ezi, za ninkisa vantu vagazadare momunene. Maudano ga ninkisa vantu va zogere kuhamena yininke yomonkarapamwe noupolitika omu mwahamena untu womuntu, elitondororo, ntani elininkiliromo kuhamena yikweparu.
Nye nampili ngoso, wovanzi kulizuvha asi maudano ngwendi nkinda zouzuni kuna kara yilihafeso yoyiwa. Nampili ngomu vantu vana hara asi ngano maudano ga sikise mo nayinye eyi, kapi nayi va tompoka kureta vantu mouumwe narunye. Awo nkenye apa kulikida nkareso zomaligaunuko ntani nokurugana yininke eyi za tumbura Bibeli asi ngava rugana vantu “po mazuva gopouhura.”—2 Timoteusa 3:1-5.
Ehuguvaro lyosili kuhamena uumwe mouzuni
MoBibeli mwa kara ehuguvaro lyosili kuhamena uumwe mouzuni mudima. Azo kwa tumbwidira asi vantu navenye vepevhu ngava kara mouumwe mepangero lyemeguru eli ava tumbura asi “Uhompa waKarunga.”—Rukasa 4:43; Mateusa 6:10.
Hompa goUhompa owo, Jesus Kristusa, nga divilisa asi pevhu mudima pwa kara mbili. Bibeli kuuyunga asi:
“Uhungami ngano tau lihana posiruwo sendi, mpora ngazi kare ko.”—Episarome 72:7.
“Age kuyoworora vahepwe ava ava mu kugu . . . Age kuvayoworora mompatakani nomomahepeko.”—Episarome 72:12, 14.
Nampili neina, mamiliyona govantu wokoyirongo yokusika po-239 kwa kara mouumwe morwa marongo gaJesus. Awo valironga omu nava hageka kunyenga wopeke. Mokulironga ko yoyinzi, resa sirongwa sosiparatjangwa “Omu natu nyokera po nkareso zonyengo.”
a Fédération Internationale de Football Association, Mbungagendesi zelipakerero lyoyirongo uzuni mudima lyoudano wombara (soka).