VANGARARENI!
Yita moUkraine kuna kuretesa po esesupo lyonondya
Mo-19 Kudumonkuru 2022, Vana veta wopontambo zokuzeruka kava tanterere wosigongi sombunga zelipakerero lyonomuhoko asi “Korona ntani nelitjindjo lyounsitwe kwa retesa po esesupo lyonondya, nye nondya kwa kusesupa unene mouzuni mudima morwa yita eyi ya kara moUkraine, awo kwa kungungunyikira asi koyirongo yimwe kuvhura ngaku kare erumbu.” Konyima, ava ava konakona omu yina kugenda po yikwaeparu kava tente asi “mouzuni maudigu manzi mo nare, ano yita kuna kugwederera komaudigu.” Bibeli za pumba nare asi oyo yiyo ngayi horoka pomazuva getu, nye za gava hena magano omu natu lididimikira maudigu ogo.
Bibeli za pumba asi nondya ngadi sesupa
Jesus kwa pumbire asi: “Yeeyi nomuhoko ngadi lirwanesa-rwanesa, ano yirongo nayo ngayi lirwanesa-rwanesa ntani nondya ngadi sesupa.”—Mateusa 24:7.
Buke zEhororo kwa zogera kuhamena varondi vane wononkambe. Murondi gumwe kwa fanekesa yita. Ano murondi ogu ga mu kweme kwa fanekesa erumbu ndi nzara. Siruwo esi nga kudira kukara nondya dokugwanena po ntani vantu ngava zerura mukoso gonondya. “Makura tani mono nkambe zonsovagani, ano ogu ga rondere po kwa kwaterere siviha mokuwoko kwendi. Ame kwa zuvhire ezwi . . . lina kutanta asi, ‘Lita zorukokotwa kuna kuzirandesa edenali ntani nolita ntatu doyilya kuna kudirandesa edenali, takameseni nawa magadi gononzwe novhinyu.’”—Ehororo 6:5, 6, moBibeli Contemporary English Version.
Mauporofete aga kuhamena erumbu ndi esesupo lyonondya kuna kusika mo “pomazuva gopouhura.” (2 Timoteusa 3:1) Mokulironga ko yoyinzi kuhamena ‘mazuva gopouhura’ ntani varondi vane ava va tumbura mEhororo, tarera vidiyo Uzuni kwa runduruka kutundilira mo-1914 ntani resa sirongwa “Wolye varondi vane wononkambe?”
Omu Bibeli nazi tu vatera
MoBibeli kwa kara mo mapukururo gomawa aga naga kuvatera o lididimikire maudigu, kukwatera mo udigu wonondya. Resa sirongwa “Omu no paruka noyimaliva yoyisesu.”
Bibeli ku tu pa ehuguvaro asi yininke ngayi wapa. Azo kwa uyunga asi “Ewogo lyoyisima ngano tali kara mosirongo” ntani nkenye ogu nga kara neyi yoyinzi yokulya. (Mapisarome 72:16) Mokulironga ko yoyinzi eyi za tumbwidira Bibeli ntani neyi nohuguvarera eyi za uyunga, kuvhura o rese sirongwa “Ehuguvaro lyokomeho.”