•    “MoChina kava rapotere asi mvhura ezi upyu unene ntani rwautatu mehistoli kava rapotere va kara noupyu wounene.”—The Guardian, 7 Sitarara 2022.

•    “Ezi mvhura zautano komavango gamwe moAfrica vana kara norukukutu.”—UN News, 26 Siwogedi 2022.

•    “Moyirongo yoyinzi moEuropa kwa kara mo rukukutu rorunene, oru kuna kara rukukutu rorunene oru rwa dilire ko monomvhura 500.”—BBC News, 23 Siwogedi 2022.

 Sinzi sovalirongi kwa kutanta asi rukukutu ta ru twikire ntani ta ru ligwederere unene. Ehuguvaro musinke twa kara nalyo kuhamena komeho? Yisinke azi uyunga ko Bibeli?

 Bibeli kwa pumba asi pomazuva getu:

•    “Nondya ngadi sesupa . . . komavango gokulisiga-siga.”—Mateusa 24:7.

 Rukukutu kutwaredesa kerumbu ndi kesesupo lyonondya. Esesupo lyonondya, ruhepo ntani nomfa kusikisa mo mauporofete gomoBibeli.—Ehororo 6:6, 8.

 Bibeli za gava konda zeyi rukukutu runa kuligwederera. Azo kwa tanta asi:

•    “Nzira zovantu kapi za kara mepangero lyamwene; kutupu ogu a pangere kukaramwenyo kwamwene.”—Jeremiya 10:23.

 Eyi kutanta asi vantu kapi tava vhuru kulipangera vene. Matokoro gawo gomadona kuretesa po rukukutu ntani esesupo lyomema.

•    Vadiviunsitwe va yi kwatesa ko asi yininke eyi ava rugana vantu ya retesa po upyu wounene ndi global warming, ano oyo kwa ninkisa mouzuni mudima mu kare rukukutu.

•    Yirugana yovantu ava va hara yininke ntani novantu ava ava tura po noveta va hana kugazadara ko kweyi ngayi horoka komeho, ya ninkisa yitji yoyinzi va yi tete nokunyateka evhu, ngoyitundwamo, ose kuvhura kuzumbanesa nomulihu dopaunsitwe domema.

 Nye Bibeli za gava ehuguvaro.

 Bibeli za tumbwidira asi Karunga nga kohonona po udigu wesesupo lyomema. Ngapi nga yi rugana?

1.  1. Karunga nga ‘zonagura po ava vana kuzonagura evhu.’ (Ehororo 11:18) Nga zonagura po vantu wovadona ava vana kuretesa po esesupo lyomema ntani ava ava rugana yininke yoyidona eyi yina kuzonagura unsitwe.—2 Timoteusa 3:1, 2.

2.  2. “Muheke goupyu ngagu kara emudiva.” (Jesaya 35:1, 6, 7) Karunga nga wapeka evhu nokulininka li kare paradisa.

3.  3. “Ove kumonekesa epakerombili lyoge lyosirongo pokutuma mvhura; to li gawopeke to li paka mboresa.” (Episarome 65:9) Evhu nga li zura nondya donongwa nomema gomawa gomazera.