Rusia kwa homokera Ukraine
Momazuva 24 gaMurongankuru 2022, sirongo saRusia kwa homokerere sirongo saUkraine nampili ngomu vampitisili wokoyirongo yokulisiga-siga va hetekerere ko kuyihagekesa po. Ngapi omu yita eyi nga yi kundama uzuni? Hamutjanga gombunga zelipakerero, António Guterres ka tente asi: “Yita eyi nga yi retesa po maudigu gokulisiga-siga ntani nga yi zonagura epopero lyomoyirongo yaEuropa ntani mouzuni naunye.”
Yisinke azi uyunga ko Bibeli kuhamena yihorokwa eyi?
Jesus Kristusa kwa pumbire siruwo apa ‘nomuhoko noyirongo ngayi lilimba-limba.’ (Mateusa 24:7) Resa sirongwa “Yidiviso yopomazuva gopouhura” yipo o tare omu Bibeli za yi likida asi yita kuna kusikisa mo mauporofete aga ga pumbire Jesus.
Mobuke zEhororo kwa tumbura mo murondi gonkambe ogu ga rondere ‘ponkambe zongeha’ ntani age kwa gusa “mbili pevhu.” (Ehororo 6:4) Resa sirongwa “Wolye varondi vane wononkambe?” yipo o dive omu uporofete ou wa kusikilira mo neina.
Buke zaNdaniyera kwa pumba mo kuhamena yita pokatji ‘kahompa gokomuzogo nahompa gokombindakano.’ (Ndaniyera 11:25-45) Tarera vidiyo Mauporofete aga ga sikamo —Ndaniyera egaununo 11 o lironge asi morwasinke Rusia ava mu tumbwire asi hompa gokoMuzogo. a
Ehororo kwa faturura hena kuhamena “yita eyi ngayi horoka mezuva lyenene lyaKarunga Munankondo nadinye.” (Ehororo 16:14, 16) Nye eyi kapisi yita eyi nga yi kara pokatji koyirongo. Resa sirongwa “Yisinke yita yaHarumagedoni?” yipo o gwane mauzera kuhamena sihorokwa oso ngasi horoka komeho.
Morwasinke natu karera nehuguvaro asi yininke nga yi ka wapa komeho?
Bibeli kuuyunga asi karunga nga ‘hagekesa po yita mouzuni mudima.’ (Mapisarome 46:9) Resa sirongwa “Ehuguvaro lyewa lyokomeho” yipo o lironge kuhamena meho ezi ga tumbwidira Karunga.
Jesus kwa rongere vasikuli vendi va kanderere asi Uhompa waKarunga u wize. (Mateusa 6:9, 10) Uhompa owo kuna kara epangero lyemeguru eli nga li ya sikisa mo sitambo saKarunga kevhu, ntani nokuretesa po mbili. Lironga mauwa aga nga u retesa po Uhompa waKarunga pokutarera vidiyo Yisinke Uhompa waKarunga?
MoUkraine kwa kara mo Nombangi daJehova dokupitakana po-129,000. Ngwendi Nombangi dokoyirongo yapeke, Nombangi odo da kara moUkraine kuhonena Jesus pokudira kulihameka moupolitika nomoyita. (Johanesa 18:36) Mouzuni mudima, Nombangi daJehova kuna kutwikira kuzuvhisa “mbudi zongwa zoUhompa” asi yiwo tupu ngau ya kohonona po maudigu kukwatera mo yita. (Mateusa 24:14) Tatu ku korangeda o pure Nombangi daJehova o lironge ko yoyinzi kuhamena ehuguvaro eli za gava Bibeli.
a Nsene ono hara kugwana ko mauzera gomanzi kuhamena uporofete ou, resa sirongwa “‘Yilye hompa gokoMuzogo pomazuva gopouhura?’ ntani “Yilye hompa gokoMuzogo gwanaina?”
Kuvhura o hafere hena
VANGARARENI!
Vatjwayuki moUkraine—Eyi azi uyunga ko Bibeli
Bibeli kwa faturura eyi ayi retesa po maudigu ntani nomu nga ga ka haga po.
YIRONGWA YIMWE
Uzuni kuna kuhaga po ndi? Ezonauko musinke lyokulikarera za pumba Bibeli?
Nampili ngomu Bibeli azi uyunga asi uzuni ngau karerera po narunye, koyili ngayi haga po.
