VANGARARENI!
Ukarelikarunga noyita eyi yina kara moUkraine, yisinke azi uyunga ko Bibeli?
Resa eyi yina kukwama ko kuhamena vampitisili womaukarelikarunga gomanene neyi va rugana ko moyita eyi yina kara moUkraine:
Saitunga EUobserver, mo-7 Nsinano, 2022 kwa tanta asi: “Mupitisili gongereka zoOrthodox Patriach Kirill kwato eyi ga uyunga ko kuhamena eyi sina kurugana sirongo saRusia pokuhomokera Ukraine . . .Ngereka zendi kwa twikira kugava nombudi doyimpempa ano Putin kwa ruganesa nombudi odo yipo a twikire yita.”
“Mbunga zokugava nombudi ava tumbura asi AP News,mo-8 Nsinano 2022 kwa tanta asi: “Patriarch Kirill kwa kwatesa ko eyi sina kurugana sirongo saRusia pokuhomokera Ukraine pokuyunga asi yita eyi kuna kara ruha rokurwanesa nzo.”
Mbunga zokugava nombudi ava tumbura asi Jerusalem Post mo-16 Nsinano 2022 kwa tanta asi: “Mupitisili gongereka zaOrthodox moUkraine gedina Metropolitan Epiphanius I, moKyiv moMandaha age kwa tungikire vantu vendi yipo va ka rwanese ‘Rusia ogu ga homwene sirongo sawo’ . . . Age kwa tente hena asi kudipaga vakwayita vaRusia kapi zina kara nzo.”
Mbunga ezi za karera po maukarelikarunga moUkraine ava tumbura asi UCCRO a mo-24 Murongankuru 2022 kwa tanta asi: “Ose kuna kukwatesa ko vakwayita womoUkraine nava navenye vana kurwa, ose kuna kuvakwatesa ko kweyi vana kurwa mokupopera Ukraine kononkore ntani ose kuna kuvakanderera po.”
Ngapi ono kugazara ko? Ya wapa komaukarelikarunga aga aga tanta asi kukwama Jesus Kristusa mokukorangeda vahameni mo vawo va ze koyita ndi? Yisinke azi uyunga ko Bibeli?
Eyi ga rugana maukarelikarunga apa ayi horoka yita
Ehistoli kwa likida asi maukarelikarunga kulininkisa asi ago kukondjera mbili nye kwa kwatesa ko ntani nokukorangeda vantu va ze koyita. Nombangi daJehova kwa vatera vantu va mone asi eyi aga rugana maukarelikarunga kuna kara uyilipaki. Tara yihonena yimwe va tambura moyimbapiratjangwa yetu.
“Nombunga edi da retesa po siponga” kwa likida omu ngereka zaKatolika za kara nousima komadipago aga va ruganena medina lyaKarunga naKristusa. Sirongwa esi kusigwana moRuhingilisa
“Ngereka zaKatolika moAfrika” kwa faturura omu maukarelikarunga ga dira kuhagekesa po yita yoparudi ntani madipago. Sirongwa esi kusigwana moRuhingilisa
Yirongwa eyi yina kukwama ko “Ukarelikarunga wa kara nousima ndi?,” “Eyi wa rugana ko ukarelikarunga apa ayi horoka yita” ntani “Ukarelikarunga kuhama koruha rongandi” kwa faturura omu vampitisili wongereka zaKatolika nezi zaOrthodox ntani zoVaprostetande va kwatesa ko yita.
Ya wapa komaukarelikarunga aga aga litumbura asi Vakriste mokukwatesa ko yita ndi?
Eyi ga rongere Jesus: “O hare mukweni moomu wa lihara nyamoge.” (Mateusa 22:39) “omu hare nonkore deni.”—Mateusa 5:44-47.
Koneka: Ya wapa komaukarelikarunga mokutanta asi awo kukwama nompangera daJesus nye simpe kukorangeda vahameni vawo va dipage vantu moyita ndi? Mokugwana elimbururo resa sirongwa “Ngapi Vakriste wousili ava tara yita?” ntani “Kuvhura tu hare nonkore detu ndi?” yirongwa eyi kuyigwana moRuhingilisa.
Eyi ga tente Jesus: “Uhompa wange kapi wa hamena kouzuni ou, ngano asi Uhompa wange kwa hamena kouzuni ou, vantu vange ngano vana ru yipo va dire kugava nge koVajuda.” (Johanesa 18:36) “Yeeyi nkenye ogu a kwata rufuro, yiro ngaru mu lya rooro.”—Mateusa 26:47-52
Koneka: Nsene asi Vakriste kwa va pangerere asi va ha rwa apa va kwete Jesus, awo kuvhura va rwe morwa nokonda dimwe ndi? Resa sirongwa “Yita ya liza noUkriste ndi, moRuhingilisa? Yipo o mone omu Vakriste womosiruwo sovapostoli va kweme sihonena saJesus nerongo lyendi.
Yisinke ngayi horokera maukarelikarunga aga aga korangeda vantu va rwe yita?
Bibeli kuronga asi Karunga kapi a tambura maukarelikarunga aga aga tanta asi kukwama Jesus nye kapi aga kwama erongo lyendi.—Mateusa 7:21-23; Titusa 1:16
Buke zEhororo kulikida asi Karunga kutara maukarelikarunga ogo asi ga kara nousima wonomfa dovantu “navenye va dipaga pevhu.” (Ehororo 18:21, 24) Mokugwana konda, resa sirongwa “Yisinke Babironi zonene?” moRuhingilisa
Jesus kwa likidire asi maukarelikarunga nagenye aga a pili kutambura Karunga ngava ga zonagura po, morwa yirugana yawo yoyidona ngwendi moomu sitji sosidona esi asi reta yiyimwa yoyidona ‘ava si tete nokusizugumina momundiro.’ (Mateusa 7:15-20) Resa sirongwa “Maukarelikarunga goyipempa ntaantani ga hage po!” moRuhingilisa. Yipo o lironge omu ngayi horoka.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a UCCRO, kukwatera mo nongereka 15 da karera po Orthodox, Katolika zomoGereka ntani Katolika zomoRoma noVaprostetande Nevangeli ntani Vajuda novaMuslemu.