Eparu ngali kara hena ngwendi moomu lya fene komeho Korona zi wize ndi? Omu Bibeli nazi ku vatera
Angela Merkel, ogu a pakere mbili yininke yomoGerman kwa tanta asi: “Natuvenye kuna hara eparu li kare ngwendi moomu lya kere nare komeho uvera woKorona u wize.”
Ngamoomu uvera ou woKorona una kutwikira kukundama vantu uzuni mudima, ove kuvhura o yi kwatese ko eyi ga uyungire. Yisinke ayi tanta “eparu li kare ngwendi moomu lya kere?” Yisinke vana hara vantu?
Kuparuka ngwendi moomu ngava paruka komeho uvera woKorona u wize. Vamwe kuna hara kukara novakwawo, kulidingira ntani kulimorora momawoko. Ndokotora Anthony Fauci a kwa tanta asi: “Vantu kulizuvha asi nsene va za ngwendi konorestauranda nokomavango oku ava ruganene yilika, ngoso awo kulizuvha asi kuna kuhafera eparu.
Kuwapukurura eparu lyawo. Vamwe kugazara asi awo kuvhura kuwapeka eparu lyawo. Awo kulizuvha asi yininke yimwe ngwendi yirugana eyi a yi ninkisa vantu va rugane novili dononzi, elitondororo ntani mauvera ya hepa kuhaga po. Klaus Schwab Mukurona gokampani zouzuni mudima ezi za karera po yirugana nonongesefa kwa tanta asi: “Uvera woKorona kwa kutupa mpito tu gazadareko kuhamena eparu lyetu ntani omu tuna harere uzuni u kare ntani nokutura po marunduruko, nye mpito ezi zopokaruwogona tupu.”
Vamwe uvera woKorona wa va kundama unene, ano oyo kuva ninkisa va lizuvhe asi eparu kapi ngali wapa hena ndi yininke kapi ngayi tengura yi kare ngwendi moomu ya kere. Pasihonena, sinzi sovantu va zumbanesa yirugana yawo, mambo gawo, ukanguki wawo ntani novahali vawo monomfa.
Kwato ogu a diva asi ngapi ngali fana eparu apa ngazi haga Korona. (Muudisi 9:11) Nye Bibeli kuvhura zi tu vatere tu kare nomutaro gomuwa keparu ntani noku tu vatera tu lididimikire. Bibeli kuuyunga kuhamena eparu eli o dili kugazara.
Kukara nomutaro gomuwa kouvera woKorona
Bibeli za pumba nare asi mauvera ndi “mahamba gomukagu” nga ga kara “pouhura wouzuni.” (Rukasa 21:11; Mateusa 24:3) Nsene tu kara nomutaro ogo kouvera woKorona nokoyihorokwa yimwe ngwendi; yita, ekankamo lyevhu nerumbu, ayo ngayi tu vatera tu dimburure asi ayo kuna kara yihorokwa yomulyo eyi yina kulikida asi mauporofete goBibeli kuna kusika mo.
Omu kudiva eyi na yi tu vatera: Nampili uvera ou u liture ndi u hage, Bibeli kuturondora asi ose kuna kuparuka ‘poyiruwo yoyidigu.’ (2 Timoteusa 3:1) Kudiva eyi na yi tu vatera tu dive omu eparu nga li kara posiruwo esi soudigu.
Bibeli kututantera asi: Uzuni ou wa zura maudigu ntaantani ngau litjindje. Malitjindjo musinke ngaga horoka?
Mouzuni omu ngamu ka dira mauvera
Bibeli kapi tupu za pumba kuhamena maudigu aga nga tu ligwanekera nago nye azo hena kwa pumba kuhamena meho zongwa. Azo kwa faturura eparu lyewa lyokupitakana eli mapangero ga hara kuretesa po, eparu eli Karunga tupu ngali retesa po. “Age nga kokota mahodi nagenye komeho gawo. Nomfa kapi ngadi kara ko hena, ntani kuguva nomalirankali nokukora, kapi ngayi kara ko hena.”—Ehororo 21:4.
Jehova b Karunga kwa tumbwidira asi: “Tara! Ame kuna kuninka yininke nayinye yi kare yoyipe.” (Ehororo 21:5) Age nga gusa po maudigu nagenye aga gana kara mouzuni nampili gaga za kuretesa poKorona. Age nga gava:
Ukanguki wouwa wopanyama nopomalizuvho, mauvera nonomfa kapi ngayi kara ko hena.—Jesaya 25:8; 33:24.
Yirugana yoyiwa eyi ngayi pa vantu yihepwa yawo yopanyama, kapisi yirugana eyi ngayi rorora vantu.—Jesaya 65:22, 23.
Kwato ogu nga hepa, nzara noruhepo kapi ngayi kara ko hena.—Mapisarome 72:12, 13; 145:16.
Kwato ogu nga li zuvha kukora pomagazaro, vantu ava va fa ngava va vhumbura.—Jesaya 65:17; Yirugana 24:15.
Omu kudiva eyi na yi tu vatera: Bibeli kuuyunga asi: “Ehuguvaro lyetu kwa fana ngwendi sisikameso separu lyetu.” (Vahebeli 6:19) Ehuguvaro olyo kuvhura kutuvatera tu lididimikire maudigu aga tuna kuligwanekera nago ngesi, noku tu vatera tu sesupike yinka yetu ntani noku tu vatera tu kare tuna litura nokukara noruhafo.
Nye kuvhura o huguvare eyi za tumbwidira Bibeli ndi? Tara sirongwa “Bibeli, Ntundiliro zousili.”
Nompango doBibeli edi na di kuvatera o lididimikilire
Tara eparu asi mulyo
Etjangwa: “Unongo tau ku gamene.”—Muudisi 7:12.
Eyi ayi tanta: Tura po matokoro gomawa aga na ga kupopera o dire kukagura uvera. Diva eyi wa hepa kurugana mokulipopera kouvera, tara sivaro sovantu ava vana kara nouvera woKorona ntani tara asi vantu vangapi ava va wenda, wenda tintiko zoKorona.
Kara ono vangarara
Etjangwa: “Vantu wounongo kudimburura udona, tava u linapa, nye varengauki kutupu sinka, kurugana nkenye omu.”—Yisewe 14:16.
Eyi ayi tanta: Rugana eyi yina hepa po mokulikunga kouvera ou. Yindindira asi uvera woKorona nau twikira siruwo sosire.
Gwana mauzera gousili
Etjangwa: “Mugova kupura nkenye eyi, nye vanandunge kutakamesa nontambo dawo.”—Yisewe 14:15.
Eyi ayi tanta: Horowora nawa asi magano musinke nokwama. Kuvhura o ture eparu lyoge mosiponga nsene o tura po matokoro kuliza nonombudi depuko edi ono kugwana.
Kara nomagazaro gomawa
Etjangwa: “Walye o pura asi: “Yinke ya waperere yininke pwanare?” Epuro olyo kapisi lyonondunge.”—Muudisi 7:10.
Eyi ayi tanta: Demenena kuhafera ukaro ou ono kara nawo ngesi. Nyokera po kugazara omu lya fene eparu komeho Korona zi wize ntani kapisi o gazare unene kuhamena eyi ngano wa hepere kurugana komeho va tulise po masiliko gouvera woKorona.
Fumadeka wopeke
Etjangwa: “Omu fumadeke vantu navenye.”—1 Peturusa 2:17.
Eyi ayi tanta: Korona zina kundama vantu mononkedi dokulisiga-siga. Fumadeka matokoro gawo nye demenena komatokoro gomawa aga ono tulisa po. Gazadara ko kuhamena ava va dira kuwendwa wenda tintiko zoKorona, novakurupe ntani nava ava vera-vera.
Lididimikira
Etjangwa: “Eharo kwa kwata nedidimiko nounambili.”—1 Vakolinte 13:4.
Eyi ayi tanta: Kara nombili apa vantu nava sivana kuhamena yininke eyi vana kudira kurugana hena morwa uvera ou. Nsene ukaro hansa ko ntani kuna kugazara kurugana yuma, lididimikira.
Omu Bibeli zina kuvatera vantu va lididimikire uvera woKorona
Nombangi daJehova kugwana ehengagwido momatumbwidiro gomoBibeli, ano oyo kuvaninkisa va dire kudemenena kouvera woKorona. Awo kulivatera-vatera pokulimburukwa mpangera zomoBibeli zokuponga kumwe. (Vahebeli 10:24, 25) Nkenye ogu kuvhura kuponga komapongo goNombangi daJehova aga gana ku karera kozoom posiruwo esi souvera.
Vamwe va yi kwatesa ko asi kuponga kumwe noNombangi daJehova ya va vatera va lididimikire posiruwo esi. Pasihonena, mukadi gumwe ogu va kwatekere uvera woKorona kwa tambwire ezigido lyokuponga kumwe noNombangi daJehova kozoom. Mapongo ogo ga mu vaterere panandunge a lididimikire udigu woukanguki ou wa mu reterere uvera woKorona. Age kwa tanta asi: “Ame kulizuvha asi name kwa hamena kepata eli. Kuresa Bibeli kwa vatera nge ni kare nombili ntani ni kare nina litura. Kuvatera nge ni demenene komeho ezi zina kutundindira mevango lyokudemenenena komaudigu gange. Mpandu kweyi mwa vatera nge ni hedere kwaKarunga.”