Sean Gladwell/Moment via Getty Images
VANGARARENI!
Yimaliwa eyi va ruganesa moyita ya pitakana ponotriyona mbali—Yisinke azi uyunga ko Bibeli?
Yimaliwa eyi va ruganesa mouzuni koyita kwa sikire ponodola daAmerica notriyona 2.24 mo 2022, morwa yita eyi ya kara pokatji kaRusia naUkraine. Kuliza nerapoto eli kava pwagesere mwaKudumogona 2023 woStockholm International Peace Research Institute (SIPRI), mo-2022:
MoEuropa kwa “ligwederera nonoperesenta 13, ayo kwa zeruka unene kupitakana yimaliwa eyi va ruganesa moyita yanare.”
“Rusia…kwa zerukire nonoperesenta 9.2, kwa kere pevango lyautano nye ngesi kuna kara pevango lyautatu, ngosirongo esi sa ruganesa unene yimaliwa yoyinzi koyita mouzuni mudima.”
Sirongo saAmerika simpe yiso sina kara pevango lyokuhova mouzuni esi sa ruganesa yimaliwa yoyinzi koyita, “nonoperesenta 39.”
Dr. Nan Tian, gumwe ogu ga tjanga Stockholm International Peace Research Institute ndi asi SIPRI ka tente asi “Mouzuni mudima kwa kuruganesa yimaliwa yoyinzi koyita, eyi kulikida asi kapi tuna kara mepopero.”
Bibeli za pumba asi mapangero kapi ngaga lizuvha ntani za tumbura oku natu gwana mbili.
Va yi pumba nare asi ediro kulizuvha ngali li gwederera
Bibeli kutumbura siruwo esi tuna kuparuka asi ‘ruveze rwehagero.’—Ndaniyera 8:19.
Buke zaNdaniyera za pumba asi posiruwo oso, mapangero ngaga lirwanesa. Mapangero aga ngaga li “rwisa.” Ano moyirwa oyo ngamu hamena mo “emona” ndi yimaliwa.—Ndaniyera 11:40, 42, 43.
Mokudiva ko yoyinzi kuhamena uporofete ou, tarera vidiyo Mauporofete aga ga sikamo—Ndaniyera egaununo 11.
Omu ngava tulisa po mbili
Bibeli kuuyunga asi Karunga nga gusa po mapangero govantu. Age “nga dika sirongo esi ngasi kererera narunye. Aso kapi ngava si funda nampili kanunu, nye ngasi hanagura yirongo oyo nayinye, makura tasi kara dogoro narunye.”—Ndaniyera 2:44.
Jehova a Karunga nga retesa po mbili ezi vana kudira kuvhura kuretesa po vantu. Ngapi omu ngayi rugana? Uhompa wendi wemeguru ngau zonagura po yirwiso nayinye ntani nokuhagekesa po nyanya.—Episarome 46:8, 9.
Mokudiva ko yoyinzi eyi uhompa ngau ka sikisa mo, resa sirongwa “ ‘Mpora ngazi kara’ moUhompa waKarunga”. moRuingilisa
a Jehova kuna kara edina lyaKarunga.—Episarome 83:18.