VANGARARENI!
Vanapolitika kuna kurondora asi Harumagedoni pepi zina kara—Yisinke za uyunga ko Bibeli?
MoMandaha ngurangura mo-10 Sikukutu 2022, noboma domoRussia kava di royere moyitata yomoUkraine morwa yeeyi vaUkraine kava zonagwire ntopa ezi za kwatakanesa Crimea naRussia, mazuva gavali gana ka pita. Yihorokwa eyi ka yi horokere tupu konyima za pa vanapolitika vamwe kava rondwere asi ntaantani tupu Harumagedoni zi wize.
“Ose kapi twa kara rumwe pepi noHarumagedoni kutundilira kwa [peresidente gwaAmerika John F.] Kennedy ntani Cuban Missile Crisis. . . . Kapi nasihuguvara asi kuvhura kuruganesa yirwiso youhungu nokudira kutwaredesa koHarumagedoni.”—Peresidente gwaAmerika Joe Biden, 6 Sikukutu 2022.
“Na yi kwatesa ko asi ntaantani Harumagedoni zi wize, uzuni mudima mosiponga una kara.”—eyi yiyo ka uyungire peresidente gwaUkraine Volodymyr Zelensky, apa ka va mu pulire kuhamena kuruganesa yirwiso youhungu, BBC News, 8 Sikukutu 2022.
Kuruganesa yirwiso youhungu kuvhura ngayi twaredese koHarumagedoni ndi? Yisinke za uyunga ko Bibeli?
Yirwiso youhungu kuvhura ngayi retese po Harumagedoni ndi?
Hawe. Nkango “Harumagedoni” kuzi gwana tupu rumwe moBibeli mEhororo 16:16. Kapi za tamba koyita yopokatji koyirongo nye kwa tamba koyita yopokatji kaKarunga ntani “kohompa womouzuni naunye.” (Ehororo 16:14) Karunga nga ruganesa yita yaHarumagedoni mokuhagekesa po mapangero govantu.—Ndaniyera 2:44.
Mokudiva ko yoyinzi eyi ngazi tanta Harumagedoni kevhu, resa sirongwa Yisinke yita yaHarumagedoni? moRuingilisa.
Yirwiso youhungu ngayi zonagura evhu neyi ya kara mo ndi?
Hawe. Nampili vapangeli ngava ruganese yirwiso youhungu komeho, Karunga kapi nga pulisira evhu va li zonagure. Bibeli kuuyunga asi:
“Nye uzuni kapi au, runduruka.”—Muudisi 1:4.
“Muhungami nga gusa sirongo nga tunge mo narunye-narunye.”—Episarome 37:29.
Nye mauporofete gomoBibeli ntani noyihorokwa yina kuhoroka ngesi kulikida asi ntaantani pa kare malitjindjo gomanene. (Mateusa 24:3-7; 2 Timoteusa 3:1-5) Tara eyi za uyunga ko Bibeli kuhamena meho pokurugana elirongo lyoBibeli lyomawokowoko.