Mwa 9 Sikukutu 2024, mbunga ezi azi pakere mbili yikorama yomowiza kwa geve erapoto kuhamena omu yininke eyi ava rugana vantu ayi kundama yikorama. Erapoto olyo kwa likida asi “monomvhura 50 dakapita (1970-2020) yikorama kwa sesupa nonoperesenta 73.”Alyo kwa tente hena asi: “eyi ngayi horokera yikorama monomvhura ntano dina kuwiza ngayi likida omu eparu ngali fana komeho.”

 Vantu wovanzi ku va tetukisa marapoto gangoso. Ose kwa hara planeta zetu ntani ayo kutuguvisa apa atu mono omu yikorama yina kuhepa. Ose kulizuvha ngoso morwa Karunga kwa tu sita neharo lyo kupakera mbili yikorama.—Genesis 1:27, 28; Yisewe 12:10.

 Kuvhura o lipure asi, ‘kuvhura sili yitutompoke kupakera mbili yikorama yomowiza ndi? Yisinke azi uyunga ko Bibeli?’

 Kapi tatu vhuru kupopera yikorama nampili tu kondje paapa twa hulira, morwa Karunga yige gelike gokuvhura kuyirugana. MEhororo 11:18 Bibeli kwa pumba asi Karunga nga ‘zonagura po ava vana kuzonagura evhu.’ Velise ozo kuturonga yininke yivali:

1.  1. Karunga kapi nga pulisira vantu va zonagure po evhu.

2.  2. Karunga ntaantani nga ka rugane ko yuma. Ngapi omu tuna yi diva? Vantu kuna kudipaga unene yikorama kupitaka pwa nare.

 Yisinke nga rugana ko Karunga mokukohonona po udigu ou? Nga ruganesa Uhompa wendi mokuyapangera evhu nalinye. (Mateusa 6:10) Uhompa owo ngau ronga vantu wovalimburukwi omu nava pakera mbili yikorama.—Jesaya 11:9.