Kuliza nerapota eli za geve mbunga zoUnited Nations:

•   Kutundilira mwa 7 Sikukutu dogoro 23 Sikukutu 2023, Yita pokatji kaGaza-Israeli kwa dipaga vantu wokusika po 6,400 ntani vantu wokusika po 15,200 kwaremana, sinzi sawo kuna kara vantu ava ava pili kurwa yita. Mokugwederera ko, vantu wovanzi kwa siga mambo gawo.

•   Ano mo 24 Sitarara, 2023, yita pokatji kaRussia naUkraine kwa dipaga vantu wokusika po 9,701 ntani vantu wokusika 17,748 kwa remana moUkraine.

 Ehuguvaro musinke a zi gava Bibeli kwava vana kuhepa morwa yita?

 Bibeli kwa pumba asi Karunga nga “hagekesa yita mouzuni mudima.” (Episarome 46:9) Age nga ruganesa epangero lyemeguru, ndi Uhompa, mokupinganesera po mapangero govantu nagenye. (Ndaniyera 2:44) Uhompa waKarunga ngau reta mbili kovantu navenye.

 Koneka eyi Jesus Kristusa, hompa goUhompa waKarunga, ngaka rugana:

•   “Age kuyoworora vahepwe ava ava mu kugu, nomapongo aga va zumbilira. Age kuretera nkenda varupiranonkondo novahepwe, age kuparura nomwenyo dava vana kara moruhepo. Age kuvayoworora mompatakani nomomahepeko.”—Episarome 72:12-14.

 Kupira moUhompa wendi, Karunga nga gusa po ruguwo ntani ruhepo oru aru retesa po yita ntani nyanya .

•   “Age nga kokota mahodi nagenye komeho gawo, Nomfa kapi ngadi kara ko hena, ntani kuguva nomalirankali nokukora, kapi ngayi kara ko hena, yeeyi yininke yanare yina dongonoka po.”—Ehororo 21:4.

 Ntaantani Uhompa waKarunga ngau rete malitjindjo pevhu. Bibeli kwa pumba “yita nonombudi doyita” edi dina kara ko ngesi. (Mateusa 24:6) Yihorokwa eyi ntani yimwe hena kulika asi ose kuna kuparuka “pomazuva gopouhura” gepangero lyovantu.—2 Timoteusa 3:1.